ਫੋਟੋ ਕੈਪਸ਼ਨ:- ਸੁਖਪਾਲ ਸੋਹੀ ਦੀ ਪੁਸਤਕ ਸੰਦਲੀ ਬੂਹੇ ਨੂੰ ਲੋਕ ਅਰਪਣ ਕਰਦੇ ਹੋਏ ਸ਼੍ਰੀਮਤੀ ਬਲਬੀਰ ਕੌਰ ਡਾਇਰੈਕਟਰ ਭਾਸ਼ਾ ਵਿਭਾਗ, ਪੰਜਾਬ, ਨਾਲ ਸ਼੍ਰੀਮਤੀ ਹਰਜੀਤ ਕੌਰ ਸੰਯੁਕਤ ਡਾਇਰੈਕਟਰ, ਸ. ਚੇਤਨ ਸਿੰਘ ਸੰਯੁਕਤ ਡਾਇਰੈਕਟਰ, ਸੁਖਪਾਲ ਸੋਹੀ ਮਾਲਵਾ ਰਿਸਰਚ ਸੈਂਟਰ ਦੀ ਸਰਪ੍ਰਸਤ ਪ੍ਰੋ: ਸ਼ੇਰ ਸਿੰਘ ਢਿੱਲੋ, ਡਾ. ਭਗਵੰਤ ਸਿੰਘ। *****
ਰਿਪੋਰਟ: ਸੰਦੀਪ ਸਿੰਘ ਮਾਲਵਾ ਰਿਸਰਚ ਸੈਂਟਰ
ਪਟਿਆਲਾ: ਅਗਸਤ 2010
“ਪੰਜਾਬੀਅਤ ਦੇ ਵਿਕਾਸ ਵਿੱਚ ਸਾਹਿਤ ਦਾ ਬਹੁਤ ਵੱਡਾ ਯੋਗਦਾਨ ਹੈ। ਪੰਜਾਬ ਨੂੰ ਦਰਪੇਸ਼ ਚੁਣੌਤੀਆਂ ਅਤੇ ਕਾਵਿਕ ਗੁਣਾਂ ਨੂੰ ਉਭਾਰਨ ਵਾਲਾ ਸਾਹਿਤ ਹਮੇਸ਼ਾਂ ਅਮਰ ਰਹਿੰਦਾ ਹੈ। ਭਾਰਤੀ ਦਰਸ਼ਨ ਅਤੇ ਸਾਹਿਤ ਦੇ ਪ੍ਰਭਾਵ ਅਧੀਨ ਆਪਣੀ ਗੀਤਕਾਰੀ ਕਰਨ ਵਾਲਾ ਸੁਖਪਾਲ ਸੋਹੀ ਆਪਣੀ ਨਵੀਂ ਪੁਸਤਕ “ਸੰਦਲੀ ਬੂਹੇ” ਰਾਹੀਂ ਇੱਕ ਅਗਰਗਾਮੀ ਸਾਹਿਤਕਾਰ ਦੇ ਤੌਰ ਤੇ ਉਭਰ ਕੇ ਸਾਹਮਣੇ ਆਇਆ ਹੈ। ਸੋਹੀ ਨੇ ਆਪਣੀ ਸ਼ਾਇਰੀ ਦੇ ਰਾਹੀਂ ਪੰਜਾਬੀ ਜੀਵਨ ਨੂੰ ਚਿਤ੍ਰਣ ਦੇ ਨਾਲ ਬਹੁਤ ਹੀ ਸੂਖਮਤਾ ਸਹਿਤ ਸਮਾਜੀ ਰਿਸ਼ਤਿਆਂ ਨੂੰ ਪੇਸ਼ ਕੀਤਾ ਹੈ। ਉਸਦੀ ਗੀਤਕਾਰੀ ਨੂੰ ਘਰ ਪਰਿਵਾਰ ਵਿੱਚ ਆਨੰਦ ਨਾਲ ਗਾਇਆ ਜਾ ਸਕਦਾ ਹੈ। ਉਸਦੇ ਕਈ ਗੀਤ ਤਾਂ ਅੰਤਰ ਆਤਮਾ ਨੂੰ ਝੰਜੋੜਦੇ ਹਨ। ਉਸ ਕੋਲ ਸ਼ਬਦਾਂ ਦੀ ਅਮੀਰੀ ਤੇ ਪੇਸ਼ ਕਰਨ ਦੀ ਸਮਰਥਾ ਹੈ। “ਇਹੋ ਜਿਹੇ ਸੰਵੇਦਨਸ਼ੀਲ ਸਾਹਿਤਕਾਰ ਪੰਜਾਬ ਵਿੱਚ ਹਮੇਸ਼ਾਂ ਮੋਹਰੀ ਭੂਮਿਕਾ ਨਿਭਾਉਣਗੇ।” ਇਹ ਭਾਵ ਸ਼੍ਰੀਮਤੀ ਬਲਬੀਰ ਕੌਰ ਡਾਇਰੈਕਟਰ ਭਾਸ਼ਾ ਵਿਭਾਗ ਪੰਜਾਬ ਨੇ ਅੱਜ ਭਾਸ਼ਾ ਭਵਨ ਪਟਿਆਲਾ ਵਿਖੇ ਪ੍ਰੋੜ੍ਹ, ਸਾਹਿਤਕਾਰ ਸੁਖਪਾਲ ਸੋਹੀ ਦੀ ਪੁਸਤਕ “ਸੰਦਲੀ ਬੂਹੇ” ਨੂੰ ਲੋਕ ਅਰਪਣ ਕਰਨ ਸਮੇਂ ਅਭਿਵਿਅਕਤ ਕੀਤੇ।
-----
ਉਨ੍ਹਾਂ ਨੇ ਹੋਰ ਕਿਹਾ ਕਿ “ਸੁਖਪਾਲ ਸੋਹੀ ਦਾ ਜੀਵਨ ਦ੍ਰਿਸ਼ਟੀਕੋਣ ਬਹੁਤ ਤੀਖਣ ਅਤੇ ਸੁਹਜ ਭਰਪੂਰ ਹੈ। ਉਸਨੇ ਹੰਢਾਈਆਂ ਸੱਚਾਈਆਂ ਨੂੰ ਕਾਵਿ ਰੂਪ ਦੇ ਕੇ ਲੋਕ ਮੁੱਖੀ ਬਣਾ ਦਿੱਤਾ ਹੈ। ਉਸਦੇ ਕਈ ਗੀਤ ਲੋਕ ਗੀਤਾਂ ਦਾ ਭੁਲੇਖਾ ਪਾਉਂਦੇ ਹਨ। ਲੋਕ ਸਰੋਕਾਰਾਂ ਦੀ ਬਾਤ ਕਰਨ ਵਾਲਾ ਸੋਹੀ ਭਵਿੱਖ ਵਿੱਚ ਪੰਜਾਬ ਦੀ ਆਵਾਜ ਬਣਨ ਦੀ ਸਮਰੱਥਾ ਰੱਖਦਾ ਹੈ।” ਮੈਂ ਇਸਨੂੰ ਮੁਬਾਰਕਬਾਦ ਦਿੰਦੀ ਹੋਈ ਗੀਤਕਾਰਾਂ ਨੂੰ ਸੁਝਾਅ ਦਿੰਦੀ ਹਾਂ ਕਿ ਉਹ ਸੁਖਪਾਲ ਸੋਹੀ ਦੇ ਸੰਕਲਪਾਂ ਦੇ ਪੈਰੋਕਾਰ ਬਣਨ।
-----
ਇਸ ਮੌਕੇ ‘ਤੇ ਸ਼੍ਰੀਮਤੀ ਹਰਜੀਤ ਕੌਰ ਸੰਯੁਕਤ ਡਾਇਰੈਕਟਰ, ਨੇ ਵੀ ਸੋਹੀ ਦੀ ਪੁਸਤਕ ਸੰਦਲੀ ਬੂਹੇ ਨੂੰ ਪੰਜਾਬੀ ਗੀਤਕਾਰੀ ਦਾ ਮੀਲ ਪੱਥਰ ਦੱਸਿਆ ਅਤੇ ਕਿਹਾ ਕਿ, “ਅਜਿਹੀ ਸੁਥਰੀ ਤੇ ਜੀਵਨ ਮੁੱਲਾਂ ਦੀ ਅਨੁਸਾਰੀ ਗੀਤਕਾਰੀ ਸੁੱਧ ਤੇ ਤੰਦਰੁਸਤ ਸਮਾਜ ਦੀ ਸਿਰਜਣਾ ਕਰੇਗੀ। ਉਨ੍ਹਾਂ ਨੇ ਪੰਜਾਬੀ ਗਾਇਕਾਂ ਨੂੰ ਲੱਚਰ ਗਾਇਕੀ ਛੱਡ ਕੇ ਸੋਹੀ ਵਰਗੇ ਗੀਤਕਾਰਾਂ ਦੇ ਗੀਤਾਂ ਨੂੰ ਗਾਉਣ ਦਾ ਸੁਝਾਅ ਦਿੱਤਾ।” ਸ. ਚੇਤਨ ਸਿੰਘ ਸੰਯੁਕਤ ਡਾਇਰੈਕਟਰ ਨੇ ਇਸ ਪੁਸਤਕ ਦੇ ਵਿਸ਼ੇ ਅਤੇ ਰੂਪ ਪੱਖ ਬਾਰੇ ਗੰਭੀਰ ਟਿਪਣੀਆਂ ਕੀਤੀਆਂ। ਉਨ੍ਹਾਂ ਨੇ ਪੁਸਤਕ ਦੀ ਖ਼ੂਬਸੂਰਤ ਛਪਾਈ ਦੀ ਪ੍ਰਸ਼ੰਸਾ ਕੀਤੀ।
-----
ਨਿਰਮਲਾ ਵਿਦਿਅਕ ਅਤੇ ਚੈਰੀਟੇਬਲ ਟਰੱਸਟ ਦੇ ਚੇਅਰਮੈਨ, ਜਾਗੋ ਇੰਟਰਨੈਸ਼ਨਲ ਦੇ ਪ੍ਰਕਾਸ਼ਕ ਅਤੇ ਚਿੰਤਕ ਡਾ. ਸ਼ੇਰ ਸਿੰਘ ਢਿੱਲੋਂ ਨੇ ਸੁਖਪਾਲ ਸੋਹੀ ਦੇ ਗੀਤਾਂ ਦੀ ਅਧਿਆਤਮਕ ਸੁਰ ਦੀ ਚਰਚਾ ਕਰਦੇ ਹੋਏ ਕਿਹਾ ਕਿ ਆਤਮਾ ਤੇ ਪ੍ਰਮਾਤਮਾ ਦੇ ਮੇਲ ਵਿੱਚ ਕਲਾਮ ਬਹੁਤ ਮਹੱਤਤਾ ਰੱਖਦਾ ਹੈ। ਅਜਿਹੀ ਸ਼ਾਇਰੀ ਮਨੁੱਖ ਨੂੰ ਅੰਤਰਆਤਮਾ ਤੱਕ ਝੰਜੋੜਦੀ ਹੈ। ਇਨ੍ਹਾਂ ਬਾਰੇ ਪੰਜਾਬੀ ਸਾਹਿਤ ਵਿੱਚ ਗੰਭੀਰ ਉਪਰਾਲੇ ਕਰਨ ਦੀ ਲੋੜ ਹੈ। ਡਾ. ਭਗਵੰਤ ਸਿੰਘ ਨੇ ਸੁਖਪਾਲ ਸੋਹੀ ਦੀ ਗੀਤਕਾਰੀ ਬਾਰੇ ਕਿਹਾ ਕਿ ਇਹ ਸਿਸਕਦੇ ਸਾਜ਼ ਤੇ, ਕੋਹਿਨੂਰ ਦੇ ਰਾਹੀਂ ਪੰਜਾਬੀ ਗੀਤਕਾਰੀ ਵਿੱਚ ਮਹੱਤਵਪੂਰਨ ਥਾਂ ਬਣਾਉਣ ਲੈਣ ਤੋਂ ਬਾਅਦ ਸੋਹੀ ਨੇ ਆਪਣੀ ਪ੍ਰਤਿਭਾ ਦਾ ਪ੍ਰਗਟਾਵਾ ਸੰਦਲੀ ਬੂਹੇ ਵਿੱਚ ਕੀਤਾ ਹੈ। ਇਸ ਵਿੱਚ ਹਰ ਗੀਤ ਸੁਹਜ ਤੇ ਸੋਜ਼ ਭਰਪੂਰ ਹੈ। ਗੀਤਕਾਰ ਨੇ ਮਾਨਵੀ ਮੁੱਲਾਂ ਨੂੰ ਸੰਵੇਦਨਸ਼ੀਲ ਸ਼ੈਲੀ ਵਿੱਚ ਪੇਸ਼ ਕਰਕੇ ਆਪਣੇ ਵਿਸ਼ਾਲ ਸ਼ਾਬਦਿਕ ਗਿਆਨ ਅਤੇ ਪ੍ਰੋੜ ਸ਼ੈਲੀ ਦਾ ਪ੍ਰਗਟਾਵਾ ਕਰਨ ਲਈ ਬਹੁਤ ਸੂਖਮ ਸ਼ਬਦਾਵਲੀ ਵਰਤੀ ਹੈ। ਅਜਿਹੇ ਸਾਹਿਤਕਾਰਾਂ ਬਾਰੇ ਯੂਨੀਵਰਸਿਟੀਆਂ, ਅਕਾਦਮਿਕ ਅਦਾਰਿਆਂ ਨੂੰ ਖੋਜ ਕਰਨ ਦੇ ਜਤਨ ਕਰਨੇ ਚਾਹੀਦੇ ਹਨ। ਸੁਖਪਾਲ ਸੋਹੀ ਨੇ ਆਪਣਾ ਗੀਤ (“ਅਸੀਂ ਉੱਚੀ-ਉੱਚੀ ਰੋ ਪਏ ਅਲਵਿਦਾ ਕਹਿਣ ਵੇਲੇ, ਉਨ੍ਹਾਂ ਆਹ ਵੀ ਭਰੀ ਨਾ ਸ਼ੁਕਰੀਆ ਕਹਿਣ ਵੇਲੇ” ਸੁਣਾ ਕੇ ਮੰਤਰ ਮੁਗਧ ਕੀਤਾ। ਇਸ ਸਮਾਗਮ ਵਿੱਚ ਡਾਇਰੈਕਟਰ ਭਾਸ਼ਾ ਵਿਭਾਗ ਨੇ ਸੁਖਪਾਲ ਸੋਹੀ ਤੇ ਡਾ. ਸ਼ੇਰ ਸਿੰਘ ਢਿੱਲੋ ਨੂੰ ਪੁਸਤਕਾਂ ਦੇ ਸੈਟ ਭੇਂਟ ਕੀਤੇ।
No comments:
Post a Comment