ਫੋਟੋਆਂ: 1 – ਗੁਰਮੀਤ ਬਰਾੜ ਦੀ ਕਿਤਾਬ ਰਿਲੀਜ਼ ਕਰਦੇ ਹੋਏ, 2 – ਗੁਰਮੀਤ ਬਰਾੜ ਆਪਣੀਆਂ ਕਵਿਤਾਵਾਂ ਪੜ੍ਹਦੇ ਹੋਏ, 3 - ਮੁੱਖ-ਮਹਿਮਾਨ ਡਾ: ਸੁਖਦੇਵ ਸਿੰਘ, 4 – ਡਾ: ਯਾਦਵਿੰਦਰ ਸਿੰਘ ਪਰਚਾ ਪੜ੍ਹਦਿਆਂ, 5 – ਸ੍ਰੀ ਜਨਕ ਰਾਜ ਪਾਰੀਕ, 6 – ਹਾਜ਼ਿਰ ਮਹਿਮਾਨ
********
ਗੁਰਮੀਤ ਬਰਾੜ ਦਾ ਤੀਜਾ ਕਾਵਿ-ਸੰਗ੍ਰਹਿ ‘ਕੱਚੇ ਕੱਚ ਦੇ ਕੰਙਣ’ ਲੋਕ-ਅਰਪਣ - ਰਿਪੋਰਟ
ਰਿਪੋਰਟ: ਆਰਸੀ
ਸ੍ਰੀਗੰਗਾਨਗਰ, ਰਾਜਸਥਾਨ ਵਸਦੇ ਲੇਖਕ ਗੁਰਮੀਤ ਬਰਾੜ ਦਾ ਤੀਜਾ ਕਾਵਿ-ਸੰਗ੍ਰਹਿ ‘ਕੱਚੇ ਕੱਚ ਦੇ ਕੰਙਣ’ 12 ਫਰਵਰੀ, 2010, ਦਿਨ ਸ਼ੁੱਕਰਵਾਰ ਨੂੰ ਹੋਟਲ ਰਾਜ ਸ਼ਿਰੌਂਜ, ਸ੍ਰੀਗੰਗਾਨਗਰ ਵਿਖੇ ਲੋਕ-ਅਰਪਣ ਕੀਤਾ ਗਿਆ।ਇਸ ਤੋਂ ਪਹਿਲਾਂ ਉਹ 2005 ‘ਚ ਪੜਛਾਵਿਆਂ ਦੇ ਮਗਰੇ ਮਗਰ ਅਤੇ 2007 ‘ਚ ‘ਚੁੱਪ ਤੋਂ ਮਗਰੋਂ’ ( ਸਾਲ 2008 ਦੀ ਭਾਸ਼ਾ ਵਿਭਾਗ ਪੰਜਾਬ ਵੱਲੋਂ ਗੁਰਮੁਖ ਸਿੰਘ ਮੁਸਾਫ਼ਿਰ ਐਵਾਰਡ ਜੇਤੂ ਕਿਤਾਬ ) ਦੋ ਕਿਤਾਬਾਂ ਪ੍ਰਕਾਸ਼ਿਤ ਕਰਵਾ ਚੁੱਕਾ ਹੈ। ਨਵੀਂ ਪੁਸਤਕ ਲੋਕ ਗੀਤ ਪ੍ਰਕਾਸ਼ਨ, ਚੰਡੀਗੜ੍ਹ ਵੱਲੋਂ ਪ੍ਰਕਾਸ਼ਿਤ ਕੀਤੀ ਗਈ ਹੈ।
-----
ਇਸ ਮੌਕੇ ‘ਤੇ ਪੰਜਾਬੀ ਅਕੈਡਮੀ ਤੋਂ ਡਾ: ਸੁਖਦੇਵ ਸਿੰਘ ਮੁੱਖ-ਮਹਿਮਾਨ ਦੇ ਤੌਰ ਤੇ ਅਤੇ ਸਾਹਿਤ ਅਕਾਦਮੀ ਐਵਾਰਡ ਜੇਤੂ ਕਵੀ ਸ਼੍ਰੀ ਜਨਕ ਰਾਜ ਪਾਰਿਕ ਸਪੈਸ਼ਲ ਮਹਿਮਾਨ ਦੇ ਤੌਰ ਤੇ ਸ਼ਾਮਿਲ ਹੋਏ।ਪ੍ਰਧਾਨਗੀ ਮੰਡਲ ‘ਚ ਡਾ: ਯਾਦਵਿੰਦਰ ਸਿੰਘ, ਡਾ: ਸੁਖਦੇਵ ਸਿੰਘ, ਹਿੰਦੀ ਦੇ ਪ੍ਰਸਿੱਧ ਕਵੀ ਤੇ ਕਹਾਣੀਕਾਰ ਸ੍ਰੀ ਜਨਕ ਰਾਜ ਪਾਰੀਕ, ਰਾਜਸਥਾਨੀ ਕਵੀ ਸ੍ਰੀ ਮੋਹਨ ਆਲੋਕ, ਰਾਜਸਥਾਨ ਸਾਹਿਤ ਅਕਾਦਮੀ ਦੇ ਸਾਬਕਾ ਚੇਅਰਮੈਨ ਡਾ: ਵਿਦਿਆ ਸਾਗਰ ਸ਼ਰਮਾ ਅਤੇ ਗੁਰਮੀਤ ਬਰਾੜ ਸੁਸ਼ੋਭਿਤ ਸਨ।
-----
ਇਸ ਮੌਕੇ ‘ਤੇ ਡਾ: ਯਾਦਵਿੰਦਰ ਸਿੰਘ ਨੇ ਗੁਰਮੀਤ ਬਰਾੜ ਦੀ ਨਵੀਂ ਕਾਵਿ-ਸੰਗ੍ਰਹਿ ‘ਕੱਚੇ ਕੱਚ ਦੇ ਕੰਙਣ’ ਤੇ ਖੋਜ ਭਰਪੂਰ ਪਰਚਾ ਪੜ੍ਹਿਆ ਅਤੇ ਆਖਿਆ ਕਿ ਗੁਰਮੀਤ ਬਰਾੜ ਦੀ ਇਸ ਪੁਸਤਕ ਵਿਚ ਸ਼ਾਮਿਲ ਕਵਿਤਾਵਾਂ ਮਨੋ-ਵਿਗਿਆਨਕ ਅਧਿਐਨ ਅਤੇ ਮੁਲਾਂਕਨ ਤੇ ਅਧਾਰਿਤ ਹਨ, ਚਾਹੇ ਉਹ ਮੁਹੱਬਤ ਦਾ ਜ਼ਿਕਰ ਕਰਦਾ ਹੈ, ਚਾਹੇ ਸਮਾਜਕ ਕਦਰਾਂ-ਕੀਮਤਾਂ ਜਾਂ ਆਪਣੇ ਆਲ਼ੇ-ਦੁਆਲ਼ੇ ਨੂੰ ਲਿਖਤਾਂ ਵਿਚ ਚਿਤਰਦਾ ਹੈ। ਉਹਨਾਂ ਇਹ ਵੀ ਕਿਹਾ ਕਿ ਉਸਦੀਆਂ ਕਵਿਤਾਵਾਂ ਕਰਮ-ਕਾਂਡਾਂ ਦਾ ਵਿਰੋਧ ਕਰਦੀਆਂ ਹਨ ਅਤੇ ਸਵੈ ਦੇ ਰੂ-ਬ-ਰੂ ਹੋ ਕੇ ਉਮੀਦ ਕਰਦੀਆਂ ਹਨ ਕਿ ਕੋਈ ਹੱਲ ਅੰਦਰੋਂ ਹੀ ਨਿੱਕਲ਼ੇਗਾ।ਦਰਅਸਲ ਇਹ ਕਵਿਤਾਵਾਂ ਹਰ ਸ਼ਖ਼ਸ ਦਾ ਮਨੋ-ਵਿਗਿਆਨਕ ਅਧਿਐਨ ਕਰਦੀਆਂ ਹਨ। ਗੁਰਮੀਤ ਨੇ ਛੁਪੇ ਹੋਏ ਪ੍ਰਤੀਕਾਂ ਅਤੇ ਭਾਵਾਂ ਨੂੰ ਉਜਾਗਰ ਕੀਤਾ ਹੈ।
-----
ਮੁੱਖ-ਮਹਿਮਾਨ ਡਾ: ਸੁਖਦੇਵ ਸਿੰਘ ਨੇ ਕਿਹਾ ਕਿ ਅੱਜ-ਕਲ੍ਹ ਹਰ ਕੋਈ ਨਾਨਕ ਅਤੇ ਅਮੀਰ ਖ਼ੁਸਰੋ ਨੂੰ ਸੁਣਨਾ ਨਹੀਂ ਚਾਹੁੰਦਾ। ਇਹ ਵਿਚਾਰ ਸ਼ੂਨਯਤਾ ਦਾ ਸਮਾਂ ਹੈ ਤੇ ਐਸੇ ਵਕਤ ‘ਕੱਚੇ ਕੱਚ ਦੇ ਕੰਙਣ’ ਦਾ ਪ੍ਰਕਾਸ਼ਿਤ ਹੋਣਾ ਬਹੁਤ ਵਧੀਆ ਸੰਕੇਤ ਹੈ। ਸੂਚਨਾ ਕ੍ਰਾਂਤੀ ਦਾ ਦੌਰ ਆਦਮੀ ਨੂੰ ਚੁੱਪ ਕਰਾ ਦੇਣ ਵਾਲ਼ਾ ਦੌਰ ਹੈ, ਜਿਸ ਵਿਚ ਬੋਲਣਾ ਸਹਿਣ ਨਹੀਂ ਕੀਤਾ ਜਾ ਰਿਹਾ। ਬਜ਼ਾਰ ਉਨ੍ਹਾਂ ਦੇ ਦਿਲ ਵਿਚ ਦਹਿਸ਼ਤ ਪੈਦਾ ਕਰ ਰਿਹਾ ਹੈ ਜਿਨ੍ਹਾਂ ਦੀ ਜੇਬ ਖ਼ਾਲੀ ਹੈ। ਬਜ਼ਾਰ ਸਾਡੀ ਜੇਬ ਨਹੀਂ ਸਾਡੇ ਜ਼ਿਹਨ ਵਿਚ ਘਰ ਕਰ ਗਿਆ ਹੈ।
-----
ਸ੍ਰੀ ਜਨਕ ਰਾਜ ਪਾਰਿਕ ਜੀ ਨੇ ਇਸ ਮੌਕੇ ‘ਤੇ ਬੋਲਦਿਆਂ ਕਿਹਾ ਕਿ ਗੁਰਮੀਤ ਬਰਾੜ ਨੇ ਜੀਵਨ ਦੀਆਂ ਦੁਸ਼ਵਾਰੀਆਂ ਨੂੰ ਰੇਖਾਂਕਿਤ ਕੀਤਾ ਹੈ ਅਤੇ ਪਿਛਲੇ ਕੁਝ ਸਮੇਂ ਤੋਂ ਉਸਦੀਆਂ ਸੰਵੇਦਨਾਵਾਂ ਦੀ ਭਾਵ-ਭੂਮੀ ਹੋਰ ਵਸੀਹ ਹੋਈ ਹੈ।
-----
ਬੀਕਾਨੇਰ ਤੋਂ ਆਏ ਉਰਦੂ ਦੇ ਸ਼ਾਇਰ ਨਿਸਾਰ ਅਹਿਮਦ ਨਿਸਾਰ ਨੇ ਕਿਹਾ ਕਿ ‘ਕੱਚੇ ਕੱਚ ਦੇ ਕੰਙਣ’ ਵਿਚਲੀਆਂ ਨਜ਼ਮਾਂ ਦਾ ਉਰਦੂ ਅਤੇ ਹੋਰਨਾਂ ਭਾਸ਼ਾਵਾਂ ‘ਚ ਤਰਜੁਮਾ ਹੋਣਾ ਬਹੁਤ ਜ਼ਰੂਰੀ ਹੈ ਕਿਉਂਕਿ ਇਹ ਨਜ਼ਮਾਂ ਬਹੁਤ ਉੱਚੇ-ਪੱਧਰ ਦੀਆਂ ਹਨ।
-----
ਮੈਡਮ ਮੀਨਾਕਸ਼ੀ ਅਹੂਜਾ ਨੇ ਕਿਹਾ ਕਿ ਗੁਰਮੀਤ ਬਰਾੜ ਦੀ ਲਿਖਤ ਨੂੰ ਸਮਝਣ ਲਈ ਉਸਦੀਆਂ ਤਿੰਨੇ ਕਿਤਾਬਾਂ ਧਿਆਨ ਪੂਰਵਕ ਪੜ੍ਹਨ ਦੀ ਜ਼ਰੂਰਤ ਹੈ।
-----
ਇਸ ਮੌਕੇ ‘ਤੇ ਗੁਰਮੀਤ ਬਰਾੜ ਨੇ ਆਪਣੀ ਨਵੀਂ ਕਿਤਾਬ ਬਾਰੇ ਜਾਣਕਾਰੀ ਦਿੱਤੀ ਅਤੇ ਉਸ ਵਿੱਚੋਂ ਪੰਜ ਖ਼ੂਬਸੂਰਤ ਨਜ਼ਮਾਂ ਪੜ੍ਹ ਕੇ ਸੁਣਾਈਆਂ।
-----
ਸਵੇਰੇ ਸਾਢੇ ਗਿਆਰਾਂ ਵਜੇ ਸ਼ੁਰੂ ਹੋਇਆ ਇਹ ਸਮਾਗਮ ਬਾਅਦ ਦੁਪਹਿਰ ਸਾਢੇ ਤਿੰਨ ਵਜੇ ਤੱਕ ਚੱਲਿਆ। 80 ਦੇ ਕਰੀਬ ਸਾਹਿਤਕਾਰਾਂ ਨੇ ਆਪਣੀ ਹਾਜ਼ਰੀ ਨਾਲ਼ ਸਮਾਗਮ ਦੀ ਸ਼ੋਭਾ ਵਧਾਈ। ਅੰਤ ਵਿਚ ਗੁਰਮੀਤ ਬਰਾੜ ਨੇ ਆਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ।
*******
No comments:
Post a Comment