ਆਰਸੀ ਸਰਗਰਮੀਆਂ

ਕਾਫ਼ਲੇ ਵੱਲੋਂ ਕਰਵਾਇਆ ਗਿਆ ਗੋਸ਼ਟੀ ਸਮਾਗਮ ਬੇਹੱਦ ਸਫ਼ਲ ਰਿਹਾ - ਰਿਪੋਰਟ

2011-06-23T18:11:00.000-07:00

ਟਰਾਂਟੋ:- (ਕੁਲਵਿੰਦਰ ਖਹਿਰਾ) 'ਪੰਜਾਬੀ ਕਲਮਾਂ ਦਾ ਕਾਫ਼ਲਾ ਟਰਾਂਟੋ' ਵੱਲੋਂ 28 ਅਤੇ 29 ਮਈ ਨੂੰ ਕਰਵਾਏ ਗਏ ਸਮਾਗਮ ਵਿੱਚ ਚਾਰ ਭਾਸ਼ਾਵਾਂ ਦੇ ਸਾਹਿਤ ਬਾਰੇ ਹੋਈ ਵਿਚਾਰ ਗੋਸ਼ਟੀ ਵਿੱਚ ਮੌਜੂਦਾ ਸਮੇਂ ਵਿੱਚ ਪ੍ਰਗਤੀਸ਼ੀਲ ਸਾਹਿਤ ਦੀ ਦਸ਼ਾ ਅਤੇ ਦਿਸ਼ਾ ਬਾਰੇ ਖੁੱਲ੍ਹ ਵਿਚਾਰ-ਵਟਾਂਦਰਾ ਕੀਤਾ ਗਿਆ ਅਤੇ ਇਸ ਦੇ ਨਾਲ਼ ਹੀ ਇੱਕ ਸ਼ਾਨਦਾਰ ਕਵੀ ਦਰਬਾਰ ਵੀ ਹੋਇਆ ਜਿਸ ਵਿੱਚ 40 ਤੋਂ ਵੱਧ ਸ਼ਾਇਰਾਂ ਨੇ ਭਾਗ ਲਿਆ।

ਪਹਿਲੇ ਦਿਨ ਜਰਨੈਲ ਸਿੰਘ ਕਹਾਣੀਕਾਰ ਨੇ ਆਏ ਹੋਏ ਮਹਿਮਾਨਾਂ ਦਾ ਸਵਾਗਤ ਕਰਦਿਆਂ ਹੋਇਆਂ ਕਾਫ਼ਲੇ ਦਾ ਇਤਿਹਾਸ ਸਾਂਝਾ ਕੀਤਾ ਅਤੇ ਸਮਾਗਮ ਦਾ ਉਦਘਾਟਨ ਕਰਦਿਆਂ ਵਰਿਆਮ ਸੰਧੂ ਹੁਰਾਂ ਕਿਹਾ ਕਿ 1935 ਵਿੱਚ ਇੰਗਲੈਂਡ ਵਿੱਚ ਹੋਈ ਕਾਨਫ਼ਰੰਸ ਤੋਂ ਬਾਅਦ 1935 ਵਿੱਚ ਲਖਨਊ ਵਿੱਚ ਮੁਨਸ਼ੀ ਪ੍ਰੇਮ ਚੰਦ ਵੱਲੋਂ ਕਰਵਾਈ ਗਈ ਕਾਨਫ਼ਰੰਸ ਨਾਲ਼ ਭਾਰਤ ਵਿੱਚ ਪ੍ਰਗਤੀਸ਼ੀਲ ਲਹਿਰ ਦਾ ਮੁੱਢ ਬੱਝਾ ਮਿਥਿਆ ਜਾਂਦਾ ਹੈ ਪਰ ਪੰਜਾਬੀ ਸਾਹਿਤ ਵਿੱਚ ਪ੍ਰਗਤੀਸ਼ੀਲ ਸਾਹਿਤ ਦੇ ਸਬੂਤ ਬਾਬੇ ਫ਼ਰੀਦ ਦੇ ਸ਼ਲੋਕਾਂ ਵਿੱਚ ਵੀ ਮਿਲਦੇ ਹਨ ਅਤੇ ਇਹ ਰਵਾਇਤ ਬਾਬੇ ਨਾਨਕ ਦੀ ਬਾਣੀ ਵਿੱਚ ਵੀ ਚੱਲੀ ਆ ਰਹੀ ਵਿਖਾਈ ਦਿੰਦੀ ਹੈ। ਸੁਰਿੰਦਰ ਧੰਜਲ ਹੁਰਾਂ ਕਿਹਾ ਕਿ ਜੋ ਸਾਹਿਤ ਸਾਡੇ ਅੰਦਰਲੇ ਗੰਦ ਨੂੰ ਧੋਣ ਵਿੱਚ ਸਹਾਈ ਨਹੀਂ ਹੁੰਦਾ ਉਹ ਪ੍ਰਗਤੀਸ਼ੀਲ ਸਾਹਿਤ ਨਹੀਂ ਅਖਵਾ ਸਕਦਾ। ਉਨ੍ਹਾਂ ਕਿਹਾ ਕਿ ਦੁਨੀਆਂ ਵਿੱਚ ਵਾਪਰਦੇ ਹਰ ਚੰਗੇ ਨੂੰ ਹਥਿਆਉਣ ਦੀ ਰਵਾਇਤ ਅਧੀਨ ਹੀ ਅਮਰੀਕਾ ਨੇ ਆਧੁਨਿਕਵਾਦ ਨੂੰ ਢਾਹ ਲਾਉਣ ਦੀ ਖਾਤਰ ਉੱਤਰ-ਆਧੁਨਿਕਵਾਦ ਚਲਾ ਕੇ ਸਾਹਿਤ ਦੇ ਖੇਤਰ ਵਿੱਚ ਨਿਘਾਰ ਲਿਆਂਦਾ ਹੈ। ਉੱਤਰ-ਆਧੁਨਿਕਵਾਦੀਆਂ ਵੱਲੋਂ ਆਧੁਨਿਕਵਾਦ ਉੱਤੇ ਦੂਸਰੀ ਸੰਸਾਰ ਜੰਗ ਛੇੜਨ ਦੇ ਲਾਏ ਗਏ ਦੋਸ਼ ਦਾ ਖੰਡਨ ਕਰਦਿਆਂ ਉਨ੍ਹਾਂ ਕਿਹਾ ਕਿ ਅਸੀਂ ਮੌਤ ਦੀ ਨਹੀਂ ਸਗੋਂ ਜ਼ਿੰਦਗੀ ਦੀ ਗੱਲ ਕਰਨ ਵਾਲ਼ੇ ਲੋਕ ਹਾਂ। ਗੁਰਨਾਮ ਢਿੱਲੋਂ ਹੁਰਾਂ ਕਿਹਾ ਕਿ ਸਾਹਿਤ ਅਤੇ ਸਿਧਾਂਤ ਦਾ ਆਪਸੀ ਰਿਸ਼ਤਾ ਰੁੱਖ ਅਤੇ ਜੜ੍ਹਾਂ ਵਾਲ਼ਾ ਹੈ। ਜਿਸ ਤਰ੍ਹਾਂ ਜੜ੍ਹਾਂ ਦਿਸਦੀਆਂ ਨਹੀਂ ਪਰ ਜੜ੍ਹਾਂ ਬਿਨਾਂ ਰੁੱਖ ਦੀ ਹੋਂਦ ਨਾਮੁਮਕਿਨ ਹੁੰਦੀ ਹੈ ਉਵੇਂ ਹੀ ਸਿਧਾਂਤ ਬਿਨਾਂ ਸਾਹਿਤ ਦੀ ਹੋਂਦ ਮੁਮਕਿਨ ਨਹੀਂ ਪਰ ਸਿਧਾਂਤ ਉਸੇ ਹੀ ਕਲਾਤਮਿਕ ਤਰੀਕੇ ਨਾਲ਼ ਸਿਧਾਂਤ ਵਿੱਚ ਲੁਕਿਆ ਹੋਣਾ ਚਾਹੀਦਾ ਹੈ ਜਿਸ ਤਰ੍ਹਾਂ ਰੁੱਖ ਦੀਆਂ ਜੜ੍ਹਾਂ ਧਰਤੀ ਹੇਠ ਰਹਿ ਕੇ ਆਪਣਾ ਰੋਲ ਨਿਭਾਉਂਦੀਆਂ ਹਨ।

ਉਰਦੂ ਸਾਹਿਤ ਬਾਰੇ ਜਿੱਥੇ ਨਦੀਮ ਪਰਮਾਰ ਨੇ ਪ੍ਰਗਤੀਸ਼ੀਲ ਲਹਿਰ ਦੇ ਇਤਿਹਾਸ ਅਤੇ ਇਸ ਵਿੱਚ ਕਾਰਜਸ਼ੀਲ ਲੇਖਕਾਂ ਦੀ ਗੱਲ ਕੀਤੀ ਓਥੇ ਸੱਯੀਅਦ ਅਜ਼ੀਮ ਨੇ ਮੌਜੂਦਾ ਸਮੇਂ ਵਿੱਚ ਪਾਕਿਸਤਾਨ ਵਿੱਚ ਪ੍ਰਗਤੀਸ਼ੀਲ ਸਾਹਿਤ ਦੇ ਰੋਲ ਬਾਰੇ ਗੱਲ ਕੀਤੀ। ਕੁਲਵਿੰਦਰ ਖਹਿਰਾ ਦੀ ਸੰਚਾਲਨਾ ਹੇਠ ਚੱਲੇ ਇਸ ਸੈਸ਼ਨ ਦੀ ਪ੍ਰਧਾਨਗੀ ਸੁਰਜਨ ਜ਼ੀਰਵੀ ਹੁਰਾਂ ਕੀਤੀ, ਮੁੱਖ ਮਹਿਮਾਨ ਵਜੋਂ ਇਸ਼ਫ਼ਾਕ ਹੁਸੈਨ ਪੇਸ਼ ਹੋਏ ਅਤੇ ਬਹਿਸ ਦਾ ਆਰੰਭ ਅਮੀਰ ਜਾਫ਼ਰੀ ਵੱਲੋਂ ਕੀਤਾ ਗਿਆ। ਹਿੰਦੀ ਸੈਸ਼ਨ ਦੀ ਸੰਚਾਲਨਾ ਕੁਲਜੀਤ ਮਾਨ ਨੇ ਕੀਤੀ ਜਦਕਿ ਪ੍ਰਧਾਨਗੀ ਜਰਨੈਲ ਸਿੰਘ ਕਹਾਣੀਕਾਰ ਨੇ ਕੀਤੀ ਅਤੇ ਮੁਖ ਮਹਿਮਾਨ ਹਿੰਦੀ ਅਖ਼ਬਾਰ ਦੇ ਸੰਪਾਦਕ ਸੁਮਨ ਘਈ ਸਨ। ਇਸ ਸੈਸ਼ਨ ਦਾ ਸ਼ਾਨਦਾਰ ਪਰਚਾ ਪ੍ਰੋਫੈਸਰ ਸ਼ੈਲਿਜਾ ਸਕਸੈਨਾ ਵੱਲੋਂ ਲਿਖਿਆ ਗਿਆ ਜਿਸ ਨੂੰ ਸਭ ਤੋਂ ਵਧੀਆ ਪਰਚਾ ਕਿਹਾ ਗਿਆ। ਅੰਗ੍ਰੇਜ਼ੀ ਸੈਸ਼ਨ ਦੀ ਸੰਚਾਲਨਾ ਅਮਰਜੀਤ ਸਾਥੀ ਅਤੇ ਪ੍ਰਧਾਨਗੀ ਇਕਬਾਲ ਰਾਮੂਵਾਲ਼ੀਆ ਨੇ ਕੀਤੀ ਜਦਕਿ ਪ੍ਰੋਫੈਸਰ ਸਲੀਮਾਹ ਵਲਿਆਨੀ ਅਤੇ ਬਰਜਿੰਦਰ ਗੁਲਾਟੀ ਵੱਲੋਂ ਪਰਚੇ ਪੜ੍ਹੇ ਗਏ।

ਰਾਤ ਸਮੇਂ ਕੁਲਵਿੰਦਰ ਖਹਿਰਾ ਦੀ ਸੰਚਾਲਨਾ ਹੇਠ ਸ਼ਾਨਦਾਰ ਕਵੀ ਦਰਬਾਰ ਹੋਇਆ ਜਿਸ ਦੀ ਸ਼ੁਰੂਆਤ ਹਰਜੀਤ ਸਿੰਘ ਅਤੇ ਸ਼ਿਵਰਾਜ ਸਨੀ ਦੀ ਗਾਇਕੀ ਨਾਲ਼ ਹੋਈ। ਕਲਾਮ ਪੇਸ਼ ਕਰਨ ਵਾਲ਼ੇ ਸ਼ਾਇਰਾਂ ਵਿੱਚ ਪਰਮਜੀਤ ਢਿੱਲੋਂ, ਜਗਦੇਵ ਨਿੱਝਰ, ਪ੍ਰੀਤਮ ਧੰਜਲ, ਗੁਰਜਿੰਦਰ ਸੰਘੇੜਾ, ਜਸਬੀਰ ਕਾਲਰਵੀ, ਗੁਰਦਾਸ ਮਿਨਹਾਸ, ਮਨਦੀਪ ਔਜਲਾ, ਪਿਆਰਾ ਸਿੰਘ ਕੁੱਦੋਵਾਲ਼, ਸੁਰਜੀਤ, ਉਂਕਾਰਪ੍ਰੀਤ, ਸੁਖਮਿੰਦਰ ਰਾਮਪੁਰੀ, ਭੁਪਿੰਦਰ ਦੁਲੇ, ਅਮਰ ਅਕਬਰਪੁਰੀ, ਕੁਲਵਿੰਦਰ ਖਹਿਰਾ, ਅਤੇ ਰਾਜਪਾਲ ਬੋਪਾਰਾਏ ਤੋਂ ਇਲਾਵਾ ਵੈਨਕੂਵਰ ਤੋਂ ਸੁਰਿੰਦਰ ਧੰਜਲ, ਕੈਲਗਰੀ ਤੋਂ ਗੁਰਬਚਨ ਬਰਾੜ, ਇੰਡੀਆ ਤੋਂ ਗੁਰਚਰਨ ਬੋਪਾਰਾਏ ਅਤੇ ਅਮਰੀਕਾ ਤੋਂ ਰਣਧੀਰ ਸਿੰਘ, ਦਲਜੀਤ ਮੋਖਾ, ਗੁਰਮੀਤ ਸੰਧੂ, ਸੁਖਵਿੰਦਰ ਕੰਬੋਜ, ਕੁਲਵਿੰਦਰ, ਰਵਿੰਦਰ ਸਹਿਰਾਅ, ਉਂਕਾਰ ਸਿੰਘ ਡੁਮੇਲੀ, ਅਤੇ ਸੁਰਿੰਦਰ ਸੋਹਲ, ਅਤੇ ਇੰਗਲੈਂਡ ਤੋਂ ਗੁਰਨਾਮ ਢਿੱਲੋਂ ਨੇ ਭਾਗ ਲਿਆ।

29 ਮਈ ਨੂੰ ਹੋਏ ਪੰਜਾਬੀ ਸੈਸ਼ਨ ਦੀ ਸੰਚਾਲਨਾ ਉਂਕਾਰਪ੍ਰੀਤ ਵੱਲੋਂ ਅਤੇ ਪ੍ਰਧਾਨਗੀ ਵਰਿਆਮ ਸੰਧੂ ਵੱਲੋਂ ਕੀਤੀ ਗਈ ਜਦਕਿ ਗੁਰਬਚਨ ਬਰਾੜ ਅਤੇ ਸੁਰਿੰਦਰ ਸੋਹਲ ਮੁੱਖ ਮਹਿਮਾਨ ਵਜੋਂ ਹਾਜ਼ਿਰ ਹੋਏ ਅਤੇ ਬਲਦੇਵ ਦੂਹੜੇ ਅਤੇ ਗੁਰਨਾਮ ਢਿੱਲੋਂ ਵੱਲੋਂ ਪੇਪਰ ਪੜ੍ਹੇ ਗਏ। ਦੋਹਾਂ ਦਿਨਾਂ ਦੀ ਗੱਲਬਾਤ ਵਿੱਚ ਕਿਰਪਾਲ ਪੰਨੂੰ, ਸੁਦਾਗਰ ਬਰਾੜ ਲੰਡੇ, ਵਕੀਲ ਕਲੇਰ, ਮਨਮੋਹਨ ਸਿੰਘ ਗੁਲਾਟੀ, ਪੂਰਨ ਸਿੰਘ ਪਾਂਧੀ, ਜਗੀਰ ਸਿੰਘ ਕਾਹਲੋਂ (ਇੰਡੀਆ), ਕਮਲਜੀਤ ਕੌਰ ਢਿੱਲੋਂ (ਇੰਡੀਆ), ਗੁਰਦੀਪ ਵਿਨੀਪੈੱਗ, ਇਕਬਾਲ ਸੁੰਬਲ, ਗੁਰਮੀਤ ਸਿੰਘ, ਇੰਦਰਜੀਤ ਸਿੰਘ, ਨਾਹਰ ਔਜਲਾ, ਆਦਿ ਨੇ ਭਾਗ ਲਿਆ।

ਨੌਟਿੰਘਮ ਵਿਖੇ ਮਹਾਨ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਸਮਾਗਮ - ਰਿਪੋਰਟ

2011-05-28T19:42:00.000-07:00

ਸ਼ਹੀਦੋਂ ਕੀ ਚਿਤਾਉਂ ਪਰ ਲਗੇਂਗੇ ਹਰ ਬਰਸ ਮੇਲੇ
ਵਤਨ ਪੇ ਮਰਨੇ ਵਾਲੋਂ ਕਾ ਯਹੀ ਬਾਕੀ ਨਿਸ਼ਾਂ ਹੋਗਾ।
ਰਿਪੋਰਟ: ਸੰਤੋਖ ਧਾਲੀਵਾਲ: ਯੂ.ਕੇ.: ੮ ਮਈ ਦਿਨ ਐਤਵਾਰ ੨੦੧੧ ਨੂੰ ਨੌਟਿੰਘਮ ਵਿਖੇ ਇੰਡੀਅਨ ਸੈਂਟਰ ਨੌਟਿੰਘਮ ਤੇ ੫੦+ ਅਸੋਸੀਏਸ਼ਨ ਵਲੋਂ ਅਜ਼ਾਦੀ ਲਈ ਭਗਤ ਸਿੰਘ ਤੇ ਹੋਰ ਮਹਾਨ ਸ਼ਹੀਦਾਂ ਨੂੰ ਸ਼ਰਧਾਂਜਲੀਆਂ ਭੇਂਟ ਕਰਨ ਲਈ ਇੱਕ ਸਮਾਗਮ ਆਯੋਜਿਤ ਕੀਤਾ ਗਿਆ।ਖਚਾ-ਖਚ ਭਰੇ ਇੰਡੀਅਨ ਸੈਂਟਰ ਦੇ ਖ਼ੂਬਸੂਰਤ ਹਾਲ 'ਚ ਚੈਂਚਲ ਸਿੰਘ ਬਾਬਕ ਪਰਧਾਨ ੫੦+ ਅਸੋਸੀਏਸ਼ਨ ਨੇ ਆਏ ਲੋਕਾਂ ਦਾ ਧੰਨਵਾਦ ਕਰਦਿਆਂ ਆਪਣੀ ਭਗਤ ਸਿੰਘ ਬਾਰੇ ਲਿਖੀ ਨਜ਼ਮ ਪੜ੍ਹ ਕੇ ਪ੍ਰੋਗਰਾਮ ਦਾ ਆਗਾਜ਼ ਕੀਤਾ। ਸਟੇਜ ਤੇ ਪਰਧਾਨਗੀ ਮੰਡਲ 'ਚ ਚੈਂਚਲ ਸਿੰਘ ਬਾਬਕ, ਕਸ਼ਮੀਰਾ ਸਿੰਘ, ਡਾ.ਗੁਰਨਾਮ ਸਿੰਘ ਸੰਘੇੜਾ ਕੈਨੇਡਾ, ਡਾ. ਸਰਜਿੰਦਰ ਸਿੰਘ ਗਲਾਸਗੋ ਤੇ ਅਵਤਾਰ ਜੌਹਲ I.W.A G.Britain ਸੁਸ਼ੋਭਿਤ ਸਨ।

ਪ੍ਰੋਗਰਾਮ ਰੀਫਰੈਸ਼ਮੈਂਟ ਜਿਹੜੀ ਕਿ ਕਸ਼ਮੀਰਾ ਸਿੰਘ ਮਾਲਕ (Red hot chain of restaurants) ਵਲੋਂ ਪਰਦਾਨ ਕੀਤੀ ਗਈ ਸੀ ਮਗਰੋਂ ਸ਼ੁਰੂ ਕੀਤਾ ਗਿਆ। ਆਪਣੇ ਪ੍ਰੋਗਰਾਮਾਂ ਦੀ ਰਵਾਇਤ ਨੂੰ ਕਾਇਮ ਰੱਖਦੇ ਹੋਏ ਪ੍ਰੋਗਰਾਮ ਠੀਕ ਤਿੰਨ ਵਜੇ ਸ਼ਰੂ ਕਰ ਦਿੱਤਾ ਗਿਆ।ਸਭ ਤੋਂ ਪਹਿਲਾਂ ਡਾ. ਗੁਰਨਾਮ ਸਿੰਘ ਸੰਘੇੜਾ ਨੇ ਭਗਤ ਸਿੰਘ ਤੇ ਉਸਦੇ ਸਾਥੀਆਂ ਦੀਆਂ ਕੁਰਬਾਨੀਆਂ ਪਿਛੇ ਜਿਹੜੀ ਸੋਚ ਸੀ ਉਸਨੂੰ ਬਹੁਤ ਹੀ ਸੁਚੱਜੇ ਢੰਗ ਤੇ ਵਿਸਥਾਰ ਨਾਲ ਪੇਸ਼ ਕੀਤਾ।ਪੰਜਾਬ ਦੀਆਂ ਸਾਰੀਆਂ ਹੀ ਰਾਜਨੀਤਕ ਪਾਰਟੀਆਂ ਹੁਣ ਭਗਤ ਸਿੰਘ ਦੀ ਸ਼ਖ਼ਸੀਅਤ ਤੇ ਉਸਦੀ ਕੁਰਬਾਨੀ ਨੂੰ ਮੂਹਰੇ ਰੱਖ ਕੇ ਲੋਕਾਂ ਨੂੰ ਕਿਵੇਂ ਵਰਗਲਾ ਰਹੀਆਂ ਹਨ ਇਸ ਦਾ ਪੂਰਨ ਤੇ ਬਹੁਤ ਹੀ ਵਿਦਵਤਾ ਭਰੀਆਂ ਉਦਾਹਰਨਾਂ ਦੇ ਕੇ ਖੁਲਾਸਾ ਕੀਤਾ ਤੇ ਉਨ੍ਹਾਂ ਲੋਕਾਂ ਦਾ ਖੰਡਨ ਕੀਤਾ ਜਿਹੜੇ ਉਸਦੇ ਨਾਂ ਨੂੰ ਵਰਤ ਕੇ ਆਪਣੀ ਹੋਂਦ ਨੂੰ ਜੀਉਂਦਾ ਰਖਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਤੇ ਉਨ੍ਹਾਂ ਦੇ ਪਾਜ ਬੜੇ ਹੀ ਸੱਭਿਅਕ ਲਫ਼ਜ਼ਾਂ ਰਾਹੀਂ ਉਧੇੜੇ।

ਡਾ. ਸੁਰਜਿੰਦਰ ਸਿੰਘ ਨੇ ਆਪਣੇ ਤੇ ਇਸ ਪ੍ਰੋਗਰਾਮ ਦੇ ਪ੍ਰਮੁੱਖ ਕਰਤਾ ਕਸ਼ਮੀਰਾ ਸਿੰਘ ਨਾਲ ਆਪਣੇ ਨਿੱਘੇ ਤੇ ਚਿਰ ਸਦੀਵੀ ਰਿਸ਼ਤੇ ਨੂੰ ਬਿਆਨਣ ਤੋਂ ਬਾਅਦ ਭਗਤ ਸਿੰਘ ਤੇ ਉਸਦੇ ਸਾਥੀਆਂ ਵੇਲੇ ਹਿੰਦੋਸਤਾਨ ਦੀ ਸਿਆਸਤ ਤੇ ਲੋਕਾਂ 'ਚ ਅਜ਼ਾਦੀ ਲਈ ਭਖਵੀਂ ਲਹਿਰ ਦਾ ਵਿਸਥਾਰ 'ਚ ਬਿਆਨ ਕੀਤਾ ਤੇ ਉਸ ਸਮੇ ਦੀ ਦਸ਼ਾ ਨੂੰ ਤਾਰੀਖੀ ਨੁਕਤਾ ਨਿਗਾਹ ਨਾਲ ਘੋਖਦਿਆਂ ਬਹੁਤ ਹੀ ਭਾਵਪੂਰਤ ਸ਼ਬਦਾਂ ਰਾਹੀਂ ਬਿਆਨ ਕੀਤਾ।

ਅਵਤਾਰ ਜੌਹਲ ਨੇ ਭਗਤ ਸਿੰਘ ਤੇ ਉਸਦੇ ਸਾਥੀਆਂ ਦੇ ਸੁਪਨੇ ਨਾਲ ਕੀ ਵਾਪਰਿਆ ਤੇ ਕੀ ਵਾਪਰ ਰਿਹਾ ਹੈ ਅੰਕੜਿਆਂ ਨਾਲ ਖੋਲ੍ਹ ਕੇ ਬਹੁਤ ਹੀ ਵਿਸਥਾਰ 'ਚ ਲੋਕਾਂ ਸਾਮ੍ਹਣੇ ਰੱਖਿਆ।ਭਗਤ ਸਿੰਘ ਨੂੰ ਸ਼ਹੀਦਾਂ ਦਾ ਸਿਰਤਾਜ ਕਿਉਂ ਮੰਨਿਆ ਜਾ ਰਿਹਾ ਹੈ ਇਸਦਾ ਵੀ ਪੂਰੀ ਤੇ ਸੁਲਝੀ ਤੇ ਭਾਵਪੂਰਤ ਬੋਲੀ ਰਾਹੀਂ ਬਿਆਨ ਕੀਤਾ ਕਿ ੨੩ ਸਾਲ ਦੀ ਉਮਰ 'ਚ ਉਸਦਾ ਅਧਿਐਨ ਏਨਾ ਵਿਸ਼ਾਲ ਸੀ ਕਿ ਉਸਨੇ ਧਾਰਮਕ ਗ੍ਰੰਥਾਂ ਤੋਂ ਲੈ ਕੇ ਕਾਰਲ ਮਾਰਕਸ ਤੱਕ ਨੂੰ ਪੂਰੀ ਤਰ੍ਹਾਂ ਗ੍ਰਹਿਣ ਕਰ ਲਿਆ ਸੀ।ਸਮੇ ਦੇ ਕਿਸੇ ਵੀ ਲਾਲਚ ਨੇ ਉਸਦੇ ਅਕੀਦੇ 'ਚ ਤ੍ਰੇੜ ਨਹੀਂ ਆਉਣ ਦਿੱਤੀ। ਉਸਨੂੰ ਪੂਰਨ ਯਕੀਨ ਸੀ ਕਿ ਸ਼ਹਾਦਤਾਂ ਤੋਂ ਬਿਨਾ ਵਿਦੇਸ਼ੀ ਰਾਜ ਦੀਆਂ ਜੜ੍ਹਾਂ ਹਿਲਾਈਆਂ ਨਹੀਂ ਜਾ ਸਕਣੀਆਂ।

ਭਾਰਤ ਦੀ ਬਹੁ-ਚਰਚਿਤ ਤਰੱਕੀ 'ਚ ਆਮ ਲੋਕ ਹਾਲੀ ਵੀ ੨੦ ਰੁਪਏ 'ਚ ਦਿਹਾੜੀਆਂ ਕੱਟ ਰਹੇ ਹਨ।ਉਸ ਮਹਾਨ ਦੇਸ਼ 'ਚ ਅੰਤਾਂ ਦੀ ਗਰੀਬੀ ਹੈ।ਭਰੂਣ ਹੱਤਿਆ ਬਾਰੇ ਅੰਕੜਿਆਂ ਸਮੇਤ ਭਾਈਚਾਰਕ ਖੰਡਨ ਕੀਤਾ।ਸਰੋਤਿਆਂ ਨੇ ਸਾਰੀਆਂ ਹੀ ਤਕਰੀਰਾਂ ਪੂਰੇ ਧਿਆਨ ਤੇ ਉਤਸ਼ਾਹ ਨਾਲ ਸੁਣੀਆਂ ਤੇ ਬੁਲਾਰਿਆਂ ਨੂੰ ਆਪਣਾ ਪੂਰਾ ਪੂਰਾ ਸਹਿਯੋਗ ਦਿੱਤਾ।

ਅੰਤ 'ਚ ਕਸ਼ਮੀਰਾ ਸਿੰਘ ਨੇ ਸਾਰੇ ਆਏ ਲੋਕਾਂ ਦਾ ਧੰਨਵਾਦ ਕੀਤਾ ਤੇ ਇਹੋ ਜਿਹੇ ਪ੍ਰੋਗਰਾਮ ਕਰਦੇ ਰਹਿਣ ਦਾ ਇਕਰਾਰ ਵੀ ਕੀਤਾ ਤੇ ਉਨ੍ਹਾਂ ਦੇ ਸਹਿਯੋਗ ਲਈ ਆਸ ਪ੍ਰਗਟਾਈ।ਸਟੇਜ ਸੰਤੋਖ ਧਾਲੀਵਾਲ ਨੇ ਸੰਭਾਲੀ ਤੇ ਅੰਤ 'ਚ ਉਸਨੇ ਇੰਡੀਨ ਸੈਂਟਰ ਦੀ ਕਮੇਟੀ, ਸਟਾਫ ਤੇ ਕਸ਼ਮੀਰਾ ਸਿੰਘ ਦਾ ਧੰਨਵਾਦ ਕੀਤਾ।

ਇਸ ਤੋਂ ਮਗਰੋਂ ਦੋ ਘੰਟੇ ਲਈ ਕਵੈਂਟਰੀ ਦੇ ਪੰਜਾਬੀ ਡੈਸਕੋ ਗਰੁਪ ਨੇ ਪਰਾਣੇ ਤੇ ਨਵੇਂ ਗੀਤ ਸਾਨਗੀ ਤੇ ਢੋਲ ਨਾਲ ਸੁਣਾ ਕੇ ਨਿਹਾਲ ਕੀਤਾ ਜਿਸਨੂੰ ਆਏ ਲੋਕਾਂ ਨੇ ਰੱਜਵੀਂ ਦਾਦ ਦਿੱਤੀ।ਪ੍ਰੋਗਰਾਮ ਠੀਕ ੬ ਵਜੇ ਸਮਾਪਤ ਕੀਤਾ ਗਿਆ।

ਨੌਟਿੰਘਮ ਦੇ ਇਸ ਪ੍ਰੋਗਰਾਮ ਤੋਂ ਪਹਿਲਾਂ ਕਸ਼ਮੀਰਾ ਸਿੰਘ ਦੇ ਸਹਿਯੋਗ ਨਾਲ ੨੪ ਅਪ੍ਰੈਲ ਨੂੰ ਗਲਾਸਗੋ ਵਿਖੇ ਵੀ ਇੱਕ ਸ਼ਰਧਾਂਜਲੀ ਪ੍ਰੋਗਰਾਮ ਆਯੋਜਤ ਕੀਤਾ ਗਿਆ ਸੀ ਜਿੱਥੇ ਭਰਵੀ ਹਾਜ਼ਰੀ ਨੂੰ ਵੀ ਡਾ. ਗੁਰਨਾਮ ਸੰਘੇੜਾ,ਡਾ. ਸਰਜਿੰਦਰ ਸਿੰਘ ਤੇ ਪਰਮਜੀਤ ਬਾਸੀ ਨੇ ਸੰਬੋਧਨ ਕੀਤਾ ।

ਅਜ਼ੀਮ ਸ਼ੇਖਰ ਦੇ ਗ਼ਜ਼ਲ-ਸੰਗ੍ਰਹਿ 'ਹਵਾ ਨਾਲ ਖੁੱਲ੍ਹਦੇ ਬੂਹੇ' ਉੱਪਰ ਭਰਵੀਂ ਵਿਚਾਰ ਚਰਚਾ ਹੋਈ - ਰਿਪੋਰਟ

2011-05-28T19:39:00.000-07:00

ਰਿਪੋਰਟ: ਰਾਜਿੰਦਰਜੀਤ: ਯੂ.ਕੇ. - 'ਪੰਜਾਬੀ ਸਾਹਿਤ ਕਲਾ ਕੇਂਦਰ ਸਾਊਥਾਲ' ਦਾ ਸਾਲਾਨਾ ਸਮਾਗਮ ਸਥਾਨਕ ਅੰਬੇਦਕਰ ਹਾਲ ਵਿਖੇ ਪੁਸਤਕ ਚਰਚਾ ਅਤੇ ਕਵੀ ਦਰਬਾਰ ਦੇ ਰੂਪ 'ਚ ਮਨਾਇਆ ਗਿਆ । ਇਸ ਵਾਰ ਨੌਜਵਾਨ ਸ਼ਾਇਰ ਅਜ਼ੀਮ ਸ਼ੇਖਰ ਦੇ ਨਵੇਂ ਕਾਵਿ-ਸੰਗ੍ਰਹਿ 'ਹਵਾ ਨਾਲ ਖੁੱਲ੍ਹਦੇ ਬੂਹੇ' ਉੱਪਰ ਭਰਵੀਂ ਵਿਚਾਰ ਚਰਚਾ ਅਤੇ ਵਿਸ਼ਾਲ ਕਵੀ ਦਰਬਾਰ ਕਰਵਾਇਆ ਗਿਆ । ਲਗਭਗ ਛੇ ਘੰਟੇ ਚੱਲੇ ਇਸ ਯਾਦਗਾਰੀ ਸਮਾਗਮ ਵਿੱਚ ਕੁਝ ਨਵੀਆਂ ਆਈਆਂ ਪੁਸਤਕਾਂ ਨੂੰ ਜੀ ਆਇਆਂ ਵੀ ਆਖਿਆ ਗਿਆ ।

ਚਰਚਾ ਅਧੀਨ ਗ਼ਜ਼ਲ ਸੰਗ੍ਰਹਿ ਉੱਪਰ ਮੁੱਖ ਪਰਚਾ ਗ਼ਜ਼ਲਗੋ ਤੇ ਆਲੋਚਕ ਗੁਰਦਾਸ ਸਿੰਘ ਪਰਮਾਰ ਵੱਲੋਂ ਪੜ੍ਹਿਆ ਗਿਆ । ਉਸਨੇ ਅਜ਼ੀਮ ਸ਼ੇਖਰ ਨੂੰ ਸੁਹਿਰਦ, ਕੋਮਲ ਭਾਵੀ ਤੇ ਮਾਨਵੀ ਕਦਰਾਂ- ਕੀਮਤਾਂ ਦਾ ਪੈਰੋਕਾਰ ਸ਼ਾਇਰ ਆਖਿਆ । ਉਹ ਦਰਦ, ਉਦਾਸੀ ਤੇ ਉਮੀਦ ਦਾ ਸ਼ਾਇਰ ਹੈ। ਹੇਠਲੇ ਸ਼ਿਅਰ ਦੇ ਹਵਾਲੇ ਨਾਲ ਉਸਨੂੰ ਇੱਕ ਸੁਹਜਾਤਮਕ ਕਵੀ ਆਖਿਆ- ' ਬਣੇ ਜਦ ਖ਼ਾਬ ਅੰਬਰ ਦਾ ਹਵਾਵਾਂ ਦੀ ਵਫ਼ਾ ਵੇਖੀ, ਅਸੀਂ ਪਰਵਾਜ਼ ਤੋਂ ਪਹਿਲਾਂ ਪਰਿੰਦੇ ਦੀ ਅਦਾ ਵੇਖੀ ।' ਡਾ ਅਮਰਜੋਤੀ ਨੇ ਸ਼ੇਖ਼ਰ ਦੇ ਸ਼ਿਅਰਾਂ ਦੀਆਂ ਵੱਖ-ਵੱਖ ਪਰਤਾਂ ਨੂੰ ਫ਼ੋਲਦਿਆਂ ਉਸ ਅੰਦਰਲੇ ਸੰਵੇਦਨਸ਼ੀਲ ਕਵੀ ਦੀ ਸ਼ਨਾਖ਼ਤ ਕੀਤੀ । ਕੈਲਾਸ਼ਪੁਰੀ ਨੇ ਉਸਨੂੰ ਇੱਕ ਵਧੀਆ ਕਿਤਾਬ ਲਿਖਣ 'ਤੇ ਵਧਾਈ ਪੇਸ਼ ਕੀਤੀ । ਕਾਮਰੇਡ ਅਵਤਾਰ ਉੱਪਲ ਨੇ ਪੁਸਤਕ ਤੇ ਪਰਚੇ ਉੱਪਰ ਉਸਾਰੂ ਟਿੱਪਣੀਆਂ ਕਰਦਿਆਂ ਕਿਹਾ ਕਿ ਅਗਾਂਹਵਧੂ ਸਾਹਿਤ ਸਮਾਜ 'ਚ ਹਮੇਸ਼ਾ ਮੌਜੂਦ ਰਿਹਾ ਹੈ । ਹਰਬਖ਼ਸ਼ ਮਕਸੂਦਪੁਰੀ ਨੇ ਸਭਾ ਨੂੰ ਮੁਬਾਰਕਬਾਦ ਪੇਸ਼ ਕੀਤੀ । ਪ੍ਰੀਤਮ ਸਿੰਘ ਸਿੱਧੂ, ਦਰਸ਼ਨ ਬੁਲੰਦਵੀ, ਸ਼ਿਵਚਰਨ ਗਿੱਲ, ਪੂਰਨ ਸਿੰਘ, ਜਗਤਾਰ ਢਾਅ, ਦਲਵੀਰ ਕੌਰ, ਸਾਥੀ ਲੁਧਿਆਣਵੀ,ਸ੍ਰੀਮਤੀ ਕੁਲਵੰਤ ਢਿਲੋਂ, ਚਮਨ ਲਾਲ ਚਮਨ, ਗੁਰਸ਼ਰਨ ਅਜੀਬ, ਮਹਿੰਦਰਪਾਲ ਧਾਲੀਵਾਲ, ਵਰਿੰਦਰ ਸ਼ਰਮਾ ਐਮ ਪੀ, ਕਿਰਪਾਲ ਸਿੰਘ ਪੂਨੀ ਤੇ ਦਵਿੰਦਰ ਨੌਰਾ ਆਦਿ ਸਾਹਿਤਕਾਰਾਂ ਨੇ ਪੁਸਤਕ ਅਤੇ ਪਰਚੇ ਉੱਪਰ ਆਪਣੇ ਵਿਚਾਰ ਪੇਸ਼ ਕੀਤੇ ਅਤੇ ਉਸਾਰੂ ਸੁਝਾਅ ਦਿੱਤੇ। ਇਸ ਹਿੱਸੇ ਦਾ ਸੰਚਾਲਨ ਸਕੱਤਰ ਰਾਜਿੰਦਰਜੀਤ ਨੇ ਕੀਤਾ । ਕਹਾਣੀਕਾਰ ਯਸ਼ ਦੀ ਨਵੀਂ ਪੁਸਤਕ 'ਕ੍ਰੈਡਿਟ ਕਾਰਡ' ਅਤੇ ਦਰਸ਼ਨ ਬੁਲੰਦਵੀ ਦੀ ਪੁਸਤਕ ਦੇ ਹਿੰਦੀ ਅਨੁਵਾਦ 'ਹਾਰ ਕਰ ਭੀ' ਨੂੰ ਹਾਜ਼ਿਰ ਸਾਹਿਤਕਾਰਾਂ ਨੇ ਰਿਲੀਜ਼ ਕੀਤਾ । 'ਕ੍ਰੈਡਿਟ ਕਾਰਡ' ਨਾਲ ਜਾਣ-ਪਛਾਣ ਸਾਥੀ ਲੁਧਿਆਣਵੀ ਨੇ ਕਰਵਾਈ ।

ਸਮਾਗਮ ਦੇ ਦੂਸਰੇ ਭਾਗ ਵਿੱਚ ਵਿਸ਼ਾਲ ਕਵੀ ਦਰਬਾਰ ਵਿੱਚ ਹੋਇਆ । ਇਸ 'ਚ ਵਰਿੰਦਰ ਪਰਿਹਾਰ, ਅਜ਼ੀਮ ਸ਼ੇਖਰ, ਜਸਵਿੰਦਰ ਮਾਨ, ਦਲਵੀਰ ਕੌਰ ਵੁਲਵਰਹੈਂਪਟਨ, ਸੁਰਿੰਦਰਪਾਲ, ਕਿਰਪਾਲ ਸਿੰਘ ਪੂਨੀ, ਸਿਕੰਦਰ ਬਰਾੜ, ਰਾਜ ਸੇਖੋਂ, ਸ੍ਰੀਮਤੀ ਕੈਲਾਸ਼ਪੁਰੀ, ਸੰਤੋਖ ਹੇਅਰ, ਸੁਰਿੰਦਰ ਗਾਖਲ, ਡਾ ਅਮਰਜੋਤੀ, ਡਾ ਕਿਰਨਦੀਪ, ਗੁਰਨਾਮ ਗਿੱਲ, ਗੁਰਸ਼ਰਨ ਸਿੰਘ ਅਜੀਬ, ਗੁਰਬਚਨ ਆਜ਼ਾਦ, ਕੁਲਵੰਤ ਢਿੱਲੋਂ, ਗਗਨ ਕੁੱਸਾ, ਗੁਰਪ੍ਰੀਤ ਧਾਲੀਵਾਲ, ਮਨਜੀਤ ਕੌਰ, ਮਹਿੰਦਰ ਮਿੱਢਾ, ਪੱਤਰਕਾਰ ਮਨਦੀਪ ਖੁਰਮੀ , ਹੈਰੀ ਸੰਧੂ, ਮਨਜਿੰਦਰ ਖੰਗੂੜਾ, ਮਨਪ੍ਰੀਤ ਸਿੰਘ ਬੱਧਨੀ, ਸ਼ਿਵਚਰਨ ਗਿਲ, ਬਿੱਟੂ ਖੰਗੂੜਾ, ਸਿਮਰ ਪਾਂਗਲੀ, ਅਜੀਤ ਚੱਗੜ, ਰਣਧੀਰ ਸੰਧੂ ਆਦਿ ਕਵੀਆਂ ਨੇ ਆਪੋ-ਆਪਣੀਆਂ ਰਚਨਾਵਾਂ ਨਾਲ ਸਮਾ ਬੰਨ੍ਹੀ ਰੱਖਿਆ । ਮਨਪ੍ਰੀਤ ਸਿੰਘ ਬੱਧਨੀਕਲਾਂ ਨੇ ਕਵੀ ਦਰਬਾਰ ਦੀ ਕਾਰਵਾਈ ਚਲਾਈ ।

ਸਮਾਗਮ 'ਚ ਹੋਰਾਂ ਤੋਂ ਇਲਾਵਾ ਦਰਸ਼ਨ ਢਿੱਲੋਂ ( ਸੰਪਾਦਕ ਚਰਚਾ),ਗਲਪਕਾਰ ਹਰਜੀਤ ਅਟਵਾਲ, ਕੁਲਤਾਰ ਸਿੰਘ ਖਾਬੜਾ, ਜਸਵਿੰਦਰ ਛਿੰਦਾ ਬਰਮਿੰਘਮ, ਆਰਟਿਸਟ ਕੰਵਲ ਧਾਲੀਵਾਲ, ਸੰਤੋਖ ਸਿੰਘ ਸੈਂਹਭੀ, ਡਾ ਤਾਰਾ ਸਿੰਘ ਆਲਮ ਵੀ ਮੌਜੂਦ ਸਨ ।

ਦਾਦਰ ਪੰਡੋਰਵੀ ਦਾ ਨਵ-ਪ੍ਰਕਾਸ਼ਿਤ ਗ਼ਜ਼ਲ ਸੰਗ੍ਰਿਹ ‘ਆਲ੍ਹਣਿਆਂ ਦੀ ਚਿੰਤਾ’ ਰਿਲੀਜ਼ - ਰਿਪੋਰਟ

2011-05-28T19:35:00.000-07:00

ਰਿਪੋਰਟ: ਪ੍ਰੋ: ਸੁਰਜੀਤ ਜੱਜ; ਫਗਵਾੜਾ:- ਬੀਤੇ ਦਿਨੀਂ ਕੌਮਾਂਤਰੀ ਲੇਖਕ ਮੰਚ(ਕਲਮ)-ਫ਼ਗਵਾੜਾ ਵਲੋਂ ਪੰਜਾਬੀ ਦੇ ਨੌਜਵਾਨ ਸ਼ਾਇਰ ਦਾਦਰ ਪੰਡੋਰਵੀ ਦਾ ਨਵ-ਪ੍ਰਕਾਸ਼ਤ ਗ਼ਜ਼ਲ ਸੰਗ੍ਰਿਹ"ਆਲ੍ਹਣਿਆਂ ਦੀ ਚਿੰਤਾ" ਦਾ ਰਿਲੀਜ਼ ਸਮਾਗਮ ਸਥਾਨਕ ਬਲੱਡ ਬੈਂਕ(ਹਰਗੋਬਿੰਦ ਨਗਰ-ਫ਼ਗਵਾੜਾ) ਦੇ ਸੈਮੀਨਾਰ ਹਾਲ ਵਿਚ ਅਯੋਜਿਤ ਕੀਤਾ ਗਿਆ।

ਇਸ ਪ੍ਰੋਗਰਾਮ ਦੀ ਪ੍ਰਧਾਨਗੀ ਸਰਵਸ਼੍ਰੀ ਡਾ.ਰਜਨੀਸ਼ ਬਹਾਦਰ,ਐਸ ਬਲਵੰਤ,ਸ.ਅਮਰੀਕ ਸਿੰਘ (ਲੁਬਰਾਈਟ ਇੰਡਸਟ੍ਰੀਜ਼),ਅਵਤਾਰ ਜੌੜਾ ਤੇ ਮਲਕੀਤ ਸਿੰਘ ਰਘਬੋਤਰਾ ਨੇ ਕੀਤੀ।ਦਾਦਰ ਪੰਡੋਰਵੀ ਨੇ ਆਪਣੀਆਂ ਕੁਝ ਚੋਣਵੀਆਂ ਗ਼ਜ਼ਲਾਂ ਨਾਲ ਸਰੋਤਿਆਂ ਦੇ ਰੂਬਰੂ ਹੋ ਕੇ ਸਮਾਗਮ ਦੀ ਸ਼ੁਰੂਆਤ ਕੀਤੀ।

ਪ੍ਰਧਾਨਗੀ ਮੰਡਲ ਵਲੋਂ ਆਲ੍ਹਣਿਆਂ ਦੀ ਚਿੰਤਾ ਨੂੰ ਰਿਲੀਜ਼ ਕਰਨ ਉਪਰੰਤ ਡਾ.ਰਾਮ ਮੂਰਤੀ ਤੇ ਡਾ. ਜਗਵਿੰਦਰ ਜੋਧਾ ਵਲੋਂ ਪਰਚੇ ਪੜ੍ਹੇ ਗਏ।ਡਾ.ਰਾਮ ਮੂਰਤੀ ਨੇ ਗ਼ਜ਼ਲ ਸੰਗ੍ਰਿਹ ਸੰਬੰਧੀ ਪੜ੍ਹੇ ਆਪਣੇ ਪਰਚੇ ਵਿਚ ਕਵਿਤਾ ਤੇ ਖ਼ਾਸ ਕਰਕੇ ਗ਼ਜ਼ਲਗੋਈ ਵਿਚ ਚਿਹਨ ਸ਼ਾਸ਼ਤਰ ਦੀ ਮਹੱਤਤਾ ਵਾਰੇ ਵਿਸਥਾਰ ਪੂਰਵਕ ਚਾਨਣਾ ਪਾਇਆ ਤੇ ਦਾਦਰ ਦੀ ਸ਼ਾਇਰੀ ਵਿਚ ਇਸ ਦੀ ਸਾਰਥਕਤਾ ਦੀ ਟੋਹ ਲਗਾਈ।ਡਾ.ਰਾਮ ਮੂਰਤੀ ਨੇ ਕਿਹਾ ਕਿ ਦਾਦਰ ਦੀ ਸ਼ਾਇਰੀ ਵਿਚ ਚਿਹਨ ਤਾਂ ਮੌਜੂਦ ਹਨ ਪਰ ਇਨ੍ਹਾਂ ਚਿਹਨਾਂ ਨੂੰ ਵਰਤ ਕੇ ਸ਼ਿਅਰਾਂ ਨੂੰ ਬਹੁ-ਪਰਤੀ ਰੂਪਾਂ ਵਿਚ ਤਬਦੀਲ ਕਰਨ ਦੀ ਕਲਾ ਨੇ ਅਜੇ ਹੋਰ ਉਜਾਗਰ ਹੋਣਾ ਹੈ।ਡਾ. ਜਗਵਿੰਦਰ ਜੋਧਾ ਦੁਆਰਾ ਪੜ੍ਹੇ ਗਏ ਪਰਚੇ ਵਿਚ ਦਾਦਰ ਦੀ ਸ਼ਾਇਰੀ ਨੂੰ ਪ੍ਰੰਪਰਾ ਤੋਂ ਅਧੁਨਿਕ ਮੁਹਾਵਰੇ ਵੱਲ ਮੁੜਦੀ ਸ਼ਾਇਰੀ ਕਰਾਰ ਦਿੱਤਾ ਗਿਆ।ਡਾ. ਜੋਧੇ ਨੇ "ਆਲ੍ਹਣਿਆਂ ਦੀ ਚਿੰਤਾ" ਨੂੰ ਸਸ਼ੱਕਤ ਸ਼ਾਇਰੀ ਵਿਚ ਜ਼ਿਕਰਯੋਗ ਵਾਧਾ ਕਿਹਾ ਤੇ ਦਾਦਰ ਤੋਂ ਅਜੇ ਹੋਰ ਬਿਹਤਰ ਲਿਖਣ ਦੀ ਉਮੀਦ ਪ੍ਰਗਟਾਈ।

ਪ੍ਰੋ.ਸੁਰਜੀਤ ਜੱਜ ਨੇ ਕਿਹਾ ਕਿ ਹੁਣ ਦਾਦਰ ਦੀ ਸ਼ਾਇਰੀ ਉਘੜਵੇਂ ਰੂਪ ਵਿਚ ਪਾਠਕਾਂ ਨੂੰ ਮੁਖ਼ਾਤਿਬ ਹੋ ਰਹੀ ਹੈ।ਹਰਵਿੰਦਰ ਭੰਡਾਲ ਨੇ ਵੀ ਸ਼ਿਅਰਾਂ ਦੇ ਹਵਾਲੇ ਨਾਲ ਦਾਦਰ ਦੀ ਸ਼ਾਇਰੀ ਬਾਰੇ ਵਿਚਾਰ ਸਾਂਝੇ ਕੀਤੇ।ਉਪਰੋਕਤ ਤੋਂ ਇਲਾਵਾ ਡਾ. ਰਜਨੀਸ਼ ਬਹਾਦਰ,ਐਸ ਬਲਵੰਤ,ਮੈਡਮ ਗੁਰਚਰਨ ਕੌਰ ਕੋਚਰ ਤੇ ਸ਼ਮਸ਼ੇਰ ਮੋਹੀ ਨੇ ਵੀ ਰਿਲੀਜ਼ ਗ਼ਜ਼ਲ ਸੰਗ੍ਰਿਹ ਤੇ ਪੜ੍ਹੇ ਗਏ ਪਰਚਿਆਂ ਨੂੰ ਆਧਾਰ ਬਣਾ ਕੇ ਦਾਦਰ ਦੀ ਸ਼ਾਇਰੀ ਸੰਬੰਧੀ ਆਪਣੇ-ਆਪਣੇ ਵਿਚਾਰ ਰੱਖੇ।ਦੇਸ ਰਾਜ ਕਾਲੀ,ਭਗਵੰਤ ਰਸੂਲਪੁਰੀ,ਪ੍ਰੋ. ਭੁਪਿੰਦਰ ਕੌਰ ਤੇ ਗਾਇਕ ਮਕਬੂਲ ਨੇ ਵੀ ਇਸ ਸਮਾਗਮ 'ਚ ਆਪਣੀ ਹਾਜ਼ਰੀ ਲੁਆਈ।

ਇਸ ਮੌਕੇ ਕਵੀ ਦਰਬਾਰ ਵੀ ਕਰਵਾਇਆ ਗਿਆ ਜਿਸ ਵਿਚ ਸਰਵਸ਼੍ਰੀ ਭਜਨ ਸਿੰਘ ਵਿਰਕ,ਕੁਲਵਿੰਦਰ ਕੁੱਲਾ,ਸੋਮਦੱਤ ਦਿਲਗੀਰ,ਅਸ਼ੋਕ ਕਾਸਿਦ,ਜੁਗਿੰਦਰ ਮਤਵਾਲਾ,ਸੁਮਨ ਸ਼ਾਮਪੁਰੀ,ਜਗਦੀਸ਼ ਰਾਣਾ,ਸੋਹਣ ਸਿਹਜਲ,ਕੰਵਰ ਇਕਬਾਲ,ਅਸ਼ੋਕ ਕਾਸਿਦ,ਮਨੋਜ ਫ਼ਗਵਾੜਵੀ ਤੇ ਸਰਬਜੀਤ ਕਰੀਮਪੁਰੀ ਨੇ ਆਪਣੀਆਂ- ਆਪਣੀਆਂ ਰਚਨਾਵਾਂ ਪੇਸ਼ ਕੀਤੀਆਂ। ਸਮਾਗਮ ਦੇ ਅਖੀਰ 'ਚ ਪ੍ਰੋ.ਸੁਰਜੀਤ ਜੱਜ ਨੇ ਆਏ ਹੋਏ ਸਰੋਤਿਆਂ ਤੇ ਸ਼ਾਇਰ ਦੋਸਤਾਂ ਦਾ ਧੰਨਵਾਦ ਕੀਤਾ।ਮੰਚ ਸੰਚਾਲਨ ਪ੍ਰੋ. ਸੁਰਜੀਤ ਜੱਜ ਤੇ ਡਾ. ਜਗਵਿੰਦਰ ਜੋਧਾ ਨੇ ਸਾਂਝੇ ਤੌਰ ਤੇ ਕੀਤਾ।

ਕਾਫ਼ਲੇ ਵੱਲੋਂ ਇਨਕਲਾਬੀ ਸ਼ਾਇਰ ਸੰਤ ਰਾਮ ਉਦਾਸੀ ਬਾਰੇ ਭਰਪੂਰ ਗੱਲਬਾਤ ਕੀਤੀ ਗਈ - ਰਿਪੋਰਟ

2011-05-11T17:54:00.000-07:00

ਟਰਾਂਟੋ:- (ਕੁਲਵਿੰਦਰ ਖਹਿਰਾ) ‘ਪੰਜਾਬੀ ਕਲਮਾਂ ਦਾ ਕਾਫ਼ਲਾ ਟਰਾਂਟੋ’ ਦੀ ਅਪ੍ਰੈਲ ਮਹੀਨੇ ਦੀ ਮੀਟਿੰਗ ਵਿੱਚ ਜਿੱਥੇ ਇਨਕਲਾਬੀ ਸ਼ਾਇਰ ਸੰਤ ਰਾਮ ਉਦਾਸੀ ਦੀ ਕਾਵਿ-ਰਚਨਾ ‘ਤੇ ਖੁੱਲ੍ਹ ਕੇ ਗੱਲਬਾਤ ਹੋਈ ਓਥੇ ਚਾਰ ਨਵੀਆਂ ਕਿਤਾਬਾਂ ਵੀ ਰਲੀਜ਼ ਕੀਤੀਆਂ ਗਈਆਂ ਅਤੇ ਸੰਚਾਲਕਾਂ ਦੀ ਚੋਣ ਵੀ ਹੋਈ।

ਉਦਾਸੀ ਦੀ ਆਪਣੀ ਆਵਾਜ਼ ਵਿੱਚ “ਅਸੀਂ ਤੋੜ ਦੇਣੀ ਲਹੂ ਪੀਣੀ ਜੋਕ...” ਅਤੇ “ਤੂੰ ਮਘਦਾ ਰਹੀਂ ਵੇ ਸੂਰਜਾ ਕੰਮੀਆਂ ਦੇ ਵਿਹੜੇ” ਗੀਤ ਨਾਲ਼ ਮੀਟਿੰਗ ਦੀ ਸ਼ੁਰੂਆਤ ਕਰਦਿਆਂ ਉਂਕਾਰਪ੍ਰੀਤ ਨੇ ਦੱਸਿਆ ਕਿ ਧਾਰਮਿਕ ਪਰਵਾਰ ਵਿੱਚ ਪੈਦਾ ਹੋਇਆ ਹੋਣ ਕਰਕੇ ਸੰਤ ਰਾਮ ਉਦਾਸੀ ਦੀ ਲੇਖਣੀ ਕੂਕਾ ਲਹਿਰ ਦੇ ਪ੍ਰਭਾਵ ਹੇਠ ਹੋਈ। ਪਰ ਇਸ ਸੰਸਥਾ ਵਿੱਚ ਆ ਗਏ ਫ਼ਰਕ ਅਤੇ ਜਸਵੰਤ ਸਿੰਘ ਕੰਵਲ, ਸੰਤੋਖ ਸਿੰਘ ਧੀਰ, ਅਤੇ ਪ੍ਰੋਫ਼ੈਸਰ ਮੋਹਨ ਸਿੰਘ, ਆਦਿ ਲੇਖਕਾਂ ਦੀਆਂ ਰਚਨਾਵਾਂ ਨੇ ਉਦਾਸੀ ਨੂੰ ਮਾਰਕਸਵਾਦ ਵੱਲ ਖਿੱਚਿਆ। ਫਿਰ ਨਕਸਲਵਾਦੀ ਲਹਿਰ ਦੇ ਪ੍ਰਭਾਵ ਹੇਠ ਆ ਕੇ ਉਦਾਸੀ ਨੇ ਆਪਣਾ ਸਦੀਵੀ ਰਾਹ ਅਪਣਾਇਆ। ਉਂਕਾਰਪ੍ਰੀਤ ਨੇ ਇਸ ਗੱਲ ‘ਤੇ ਸ਼ਿਕਵਾ ਕੀਤਾ ਕਿ ਉਦਾਸੀ ਦੀ ਕਵਿਤਾ ਦੀਆਂ ਜੜ੍ਹਾਂ ਸਿੱਖ ਵਿਰਸੇ ਦੀ ਅਮੀਰੀ ਵਿੱਚ ਪਈਆਂ ਹੋਣ ਕਰਕੇ ਉਸ ਦੀ ਕਵਿਤਾ ਨੂੰ ਖ਼ਾਲਿਸਤਾਨੀ ਲਹਿਰ ਨਾਲ਼ ਜੋੜਨ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ। ਉਨ੍ਹਾਂ ਪਾਸ਼-ਉਦਾਸੀ ਬਾਰੇ ਛੇੜੇ ਜਾ ਰਹੇ ਸ਼ਰਾਰਤੀ ਵਿਵਾਦ ‘ਤੇ ਟਿੱਪਣੀ ਕਰਦਿਆਂ ਕਿਹਾ ਕਿ ਦੋਵਾਂ ਹੀ ਕਵੀਆਂ ਨੇ ਆਪਣੀਆਂ ਰਚਨਾਵਾਂ ਵਿੱਚ ਸਿੱਖ ਧਰਮ ਦੀ ਵਿਰਾਸਤ ਨੂੰ ਆਧਾਰ ਬਣਾਇਆ, ਦੋਵਾਂ ਨੇ ਹੀ ਨਿਮਨ-ਵਰਗ ਬਾਰੇ ਹੀ ਲਿਖਿਆ ਅਤੇ ਦੋਵੇਂ ਹੀ ਇਨਕਲਾਬੀ ਸੋਚ ਨੂੰ ਦਿਲੋਂ ਅਪਣਾਏ ਹੋਏ ਹੋਣ ਕਰਕੇ ਲੋਕਾਂ ਨਾਲ਼ ਜੁੜੇ ਹੋਏ ਕਵੀ ਸਨ ਜਿਸ ਕਰਕੇ ਇਸ ਤਰ੍ਹਾਂ ਦੀ ਬੇਹੂਦੀ ਦੂਸ਼ਣਬਾਜ਼ੀ ਬੇ-ਬੁਨਿਆਦ ਹੈ।

ਕੁਲਵਿੰਦਰ ਖਹਿਰਾ ਨੇ ਇਸ ਗੱਲ ‘ਤੇ ਅਫ਼ਸੋਸ ਪ੍ਰਗਟ ਕੀਤਾ ਕਿ ਆਪਣੇ ਆਪ ਨੂੰ ਅਗਾਂਹਵਧੂ ਵਿਚਾਰਧਾਰਾ ਅਤੇ ਸੰਤ ਰਾਮ ਉਦਾਸੀ ਦੇ ਹਮਦਰਦ ਹੋਣ ਦਾ ਵਿਖਾਵਾ ਕਰਦੇ ਹੋਏ ਕੁਝ ਲੇਖਕ ਉਦਾਸੀ ਨੂੰ ਫ਼ਿਰਕੂ ਲਹਿਰ ਨਾਲ਼ ਜੋੜਨ ਅਤੇ ਪਾਸ਼ ਅਤੇ ਉਦਾਸੀ ਵਿਚਾਲੇ ਜਾਤੀਵਾਦ ਦਾ ਵਖਰੇਵਾਂ ਪਾਉਣ ਦੀਆਂ ਗੱਲਾਂ ਕਰਕੇ ਇਨ੍ਹਾਂ ਮਹਾਨ ਕਵੀਆਂ ਦੇ ਕੱਦ ਨੂੰ ਨੀਵਿਆਂ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਇਸ ਸ਼ਰਾਰਤ ਨੂੰ ਸ਼ਹੀਦ ਭਗਤ ਸਿੰਘ ਦੇ ਸ਼ਹੀਦ ਹੋਣ ਬਾਰੇ ਛੇੜੇ ਜਾ ਰਹੇ ਵਿਵਾਦ ਨਾਲ਼ ਜੋੜਦਿਆਂ ਹੋਇਆਂ ਉਸ ਨੇ ਕਿਹਾ ਕਿ ਅਜਿਹਾ ਕਰਨ ਵਾਲ਼ੇ ਲੋਕ ਸਿੱਧੇ ਰੂਪ ਵਿੱਚ ਹਾਕਮ ਜਮਾਤਾਂ ਦੇ ਹੱਕ ਵਿੱਚ ਭੁਗਤ ਰਹੇ ਹਨ। ਉਸ ਨੇ ਕਿਹਾ ਕਿ ਇਹ ਹਸਤੀਆਂ ਪੰਜਾਬੀ ਵਿਰਸੇ ਦੇ ਉਹ ਥੰਮ੍ਹ ਹਨ ਜੋ ਕਿਸੇ ਵੀ ਆਉਣ ਵਾਲ਼ੀ ਸੰਘਰਸ਼ਮਈ ਲਹਿਰ ਖਾਤਰ ਪੰਜਾਬੀਆਂ ਲਈ ਰਹਿ-ਨੁਮਾਈ ਕਰ ਸਕਦੇ ਹਨ ਜਿਸ ਕਰਕੇ ਇਨ੍ਹਾਂ ਦੇ ਅਕਸ ਨੂੰ ਵਿਗਾੜਨਾ ਜਾਂ ਇਨ੍ਹਾਂ ਦੀ ਕੁਰਬਾਨੀ ‘ਤੇ ਬੇ-ਬੁਨਿਆਦ ਸਵਾਲੀਆ ਚਿੰਨ੍ਹ ਲਾਉਣੇ ਸਪੱਸ਼ਟ ਰੂਪ ਵਿੱਚ ਪੰਜਾਬੀ ਕੌਮ ਨਾਲ਼ ਗ਼ੱਦਾਰੀ ਹੈ। ਉਸ ਨੇ ਪਾਸ਼ ਅਤੇ ਉਦਾਸੀ ਨੂੰ ਇੱਕੋ ਹੀ ਗੱਡੀ ਦੇ ਦੋ ਪਹੀਏ ਦੱਸਿਆ ਜਿਨ੍ਹਾਂ ਵਿੱਚੋਂ ਇੱਕ ਆਮ ਜਨਤਾ ਨੂੰ ਸੰਬੋਧਨ ਹੋ ਕੇ ਅਤੇ ਦੂਸਰਾ ਅਕਾਦਮਿਕ ਪੱਧਰ ‘ਤੇ ਜਾ ਕੇ ਇੱਕੋ ਹੀ ਵਰਗ ਦੇ ਲੋਕਾਂ ਦੀ ਗੱਲ ਕਰਦਾ ਸੀ। ਪਾਸ਼ ਦੀ ਡਾਇਰੀ ਵਿੱਚੋਂ ਆਖਰੀ ਇੰਟਰੀ ਦਾ ਹਵਾਲਾ ਦਿੰਦਿਆਂ ਉਸ ਨੇ ਕਿਹਾ ਕਿ ਪਾਸ਼ ਵੱਲੋਂ ਏਨੇ ਸਪਸ਼ਟ ਰੂਪ ਵਿੱਚ ਉਦਾਸੀ ਦੇ ਵਡੱਪਣ ਦੀ ਦਾਦ ਦੇਣਾ ਆਪਣੇ ਆਪ ਇਸ ਗੱਲ ਦੀ ਗਵਾਹੀ ਦਿੰਦਾ ਹੈ ਕਿ ਦੋਵੇਂ ਕਵੀ ਇੱਕ-ਸੁਰ ਸਨ ਅਤੇ ਉਨ੍ਹਾਂ ਨੂੰ ਵੰਡਣ ਵਾਲ਼ੇ ਮੌਜੂਦਾ ਲੋਕ ਸਿੱਧੇ ਜਾਂ ਅਸਿੱਧੇ ਰੂਪ ਵਿੱਚ ਸਰਕਾਰ ਅਤੇ ਲੋਟੂ ਜਮਾਤ ਦੇ ਹੱਕ ਵਿੱਚ ਭੁਗਤ ਰਹੇ ਹਨ। ਜਸਵਿੰਦਰ ਸੰਧੂ ਨੇ ਕਿਹਾ ਕਿ ਸਾਨੂੰ ਕਵਿਤਾ ਵਿੱਚ ਅਕਾਦਮਿਕ ਅਤੇ ਸਧਾਰਨ ਪੱਧਰ ਵਰਗੀਆਂ ਵੰਡੀਆਂ ਵੀ ਨਹੀਂ ਪਾਉਣੀਆਂ ਚਾਹੀਦੀਆਂ। ਉਨ੍ਹਾਂ ਕਿਹਾ ਕਿ ਬੇਸ਼ੱਕ ਅਕਾਦਮਿਕ ਅਦਾਰਿਆਂ ਨੇ ਉਦਾਸੀ ਨੂੰ ਅਣਗੌਲ਼ਿਆ ਹੈ ਪਰ ਆਮ ਲੋਕਾਂ ਨੇ ਉਦਾਸੀ ਨੂੰ ਸਵੀਕਾਰਿਆ ਹੈ। ਪ੍ਰਿੰਸੀਪਲ ਸਰਵਣ ਸਿੰਘ ਨੇ ਕਿਹਾ ਕਿ ਕਮੀਆਂ-ਪੇਸ਼ੀਆਂ ਹਰ ਇਨਸਾਨ ਵਿੱਚ ਹੁੰਦੀਆਂ ਹਨ ਪਰ ਦੋ ਕਵੀਆਂ ਵਿੱਚ ਮੁਕਾਬਲਾ ਕਰਨਾ ਕਿਸੇ ਵੀ ਤਰ੍ਹਾਂ ਠੀਕ ਨਹੀਂ ਹੁੰਦਾ। ਉਨ੍ਹਾਂ ਕਿਹਾ ਕਿ ਜਿੱਥੇ ਪਾਸ਼ ਦਾ ਆਪਣਾ ਸਾਹਿਤਕ ਕੱਦ-ਬੁੱਤ ਹੈ ਓਥੇ ਉਦਾਸੀ ਨੇ ਆਪਣੀ ਲੇਖਣੀ ਅਤੇ ਆਵਾਜ਼ ਰਾਹੀਂ ਹਜ਼ਾਰਾਂ ਹੀ ਲੋਕਾਂ ਦੇ ਇਕੱਠਾਂ ਨੂੰ ਪ੍ਰਭਾਵਿਤ ਕੀਤਾ ਹੈ।

ਬ੍ਰਜਿੰਦਰ ਕੌਰ ਗੁਲਾਟੀ ਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ ਅਪ੍ਰੈਲ ਮਹੀਨੇ ਦੇ ਕਵਿਤਾ-ਮਾਹ ਵੱਜੋਂ ਮਨਾਏੇ ਜਾਣ ਬਾਰੇ ਲਿਖੇ ਆਪਣੇ ਲੇਖ ਵਿੱਚ ਕਿਹਾ ਕਿ ਕਵਿਤਾ ਵੱਲ ਲੋਕਾਂ ਦੀ ਰੁਚੀ ਵਧਾਉਣ ਲਈ, ਕਵੀਆਂ ਦੀਆਂ ਲਿਖਤਾਂ ਨੂੰ ਹੋਰ ਜ਼ਿਆਦਾ ਲੋਕਾਂ ਦੇ ਸਾਹਮਣੇ ਲਿਆਉਣ ਲਈ, ਅਤੇ ਸਕੂਲਾਂ ਦੇ ਸਿਲੇਬਸ ਵਿੱਚ ਕਵਿਤਾ ਨੂੰ ਹੋਰ ਅਹਿਮੀਅਤ ਦੁਆਉਣ ਦੇ ਵਿਚਾਰ ਨਾਲ ‘ਅਕੈਡਮੀ ਔਫ਼ ਅਮੈਰਿਕਨ ਪੋਇਟਸ” ਨਾਂ ਦੀ ਸੰਸਥਾ ਵੱਲੋਂ ਇਹ ਮੁਹਿੰਮ ਛੇੜੀ ਗਈ ਅਤੇ 1996 ਵਿੱਚ ਇਸ ਦਿਨ ਨੂੰ ਮਾਨਤਾ ਦਿੰਦਿਆਂ ਹੋਇਆਂ ਅਮਰੀਕੀ ਰਾਸ਼ਟਰਪਤੀ ਬਿਲ ਕਲਿੰਟਨ ਨੇ ਕਿਹਾ “ਕਵੀਆਂ ਦੀ ਲਿਖਤ ਅਤੇ ਉਨ੍ਹਾਂ ਦੇ ਸ਼ਬਦਾਂ ਦਾ ਭੰਡਾਰ ਸਾਡੇ ਕਲਚਰ ਨੂੰ ਹੋਰ ਅਮੀਰ ਕਰਦਾ ਹੈ ਅਤੇ ਨਵੀਂ ਅਮਰੀਕਨ ਪੀੜ੍ਹੀ ਨੂੰ ਲਿਖਣ ਅਤੇ ਪੜ੍ਹਣ ਵੱਲ ਪ੍ਰੇਰਦਾ ਹੈ।” ਸੰਨ 1999 ਵਿੱਚ ਕੈਨੇਡਾ ਨੇ ਵੀ ਅਪ੍ਰੈਲ ਵਿੱਚ ‘ਨੈਸ਼ਨਲ ਪੋਇਟਰੀ ਮੰਥ’ ਮਨਾਉਣਾ ਸ਼ੁਰੂ ਕੀਤਾ ਜਿਸ ਨੂੰ ‘ਲੀਗ ਔਫ਼ ਕਨੇਡੀਅਨ ਪੋਇਟਸ’ ਨੇ ਸਪੌਂਸਰ ਕੀਤਾ। ਉਨ੍ਹਾਂ ਵੱਲੋਂ ਇਸ ਮਹੀਨੇ ਕਵੀਆਂ ਦੀਆਂ ਕਿਰਤਾਂ ਨੂੰ ਲੈ ਕੇ ‘ਦਾ ਜਰਾਰਡ ਲੈਂਪਰਟ ਐਂਡ ਲੋਥਰ ਅਵਾਰਡਜ਼’ ਲਈ ਮੁਕਾਬਲੇ ਕੀਤੇ ਜਾਂਦੇ ਹਨ। ਉਸ ਤੋਂ ਬਾਅਦ ਦੁਨੀਆਂ ਭਰ ਵਿੱਚ ਅਪ੍ਰੈਲ ਮਹੀਨੇ ਨੂੰ ਕਵਿਤਾ-ਮਾਹ ਵਜੋਂ ਮਨਾਇਆ ਜਾਣ ਲੱਗਾ ਹੈ। ਕੈਨੇਡੀਅਨ ਕਵੀ ਪੀਅਰ ਜਿਔਰਜੀਔ ਡੀ ਸਿਕੋ ਦੇ ਸ਼ਬਦਾਂ ਨੂੰ ਦੁਹਰਾਉਂਦਿਆਂ ਗੁਲਾਟੀ ਹੁਰਾਂ ਕਿਹਾ “ਕਵਿਤਾ ਦੇ ਉੱਚੇ ਵਿਚਾਰਾਂ ਅਤੇ ਸ਼ਾਨੋ-ਸ਼ੌਕਤ ਤੋਂ ਬਿਨਾਂ ਤੁਸੀਂ ਭਵਿੱਖ ਨੂੰ ਚੰਗਾ ਨਹੀਂ ਬਣਾ ਸਕਦੇ। ਅੱਜ ਦਾ ਯੁੱਗ ਧਨ-ਦੌਲਤ ਅਤੇ ਖ਼ੁਸ਼ਹਾਲੀ ਦਾ ਰਾਗ ਅਲਾਪ ਰਿਹਾ ਹੈ, ਉਸ ਵਕਤ ਕਵੀ ਹੀ ਸਾਨੂੰ ਦੱਸਦੇ ਹਨ ਕਿ ਸ਼ਹਿਰ ਇਨਸਾਨਾਂ ਤੋਂ ਬਿਨਾਂ ਕੁਝ ਵੀ ਨਹੀਂ। ਕਵਿਤਾ ਜ਼ਿੰਦਗੀ ਜੀਣ ਦਾ ਇੱਕ ਅਲੱਗ ਅੰਦਾਜ਼ ਹੈ। ਕਵੀ ਨੇ ਨਾਗਰਿਕ ਦੇ ਤੌਰ ਤੇ ਸਿਰਜਣਾਤਮਕ ਰਚਨਾ ਨੂੰ ਉੱਚਾ ਚੁੱਕਣਾ ਹੈ ਜਿਸ ਤੋਂ ਬਿਨਾਂ ਜਿ਼ੰਦਗੀ ਬਹੁਤ ਨੀਰਸ ਹੋ ਜਾਂਦੀ ਹੈ।” ਕਾਫ਼ਲੇ ਦੀ ਸਾਲ 2001 ਵਿੱਚ ਛਪੀ ਕਿਤਾਬ ‘ਪਿੱਪਲ਼ ਤੋਂ ਮੇਪਲ ਤੱਕ” ਦਾ ਹਵਾਲਾ ਦਿੰਦਿਆਂ ਅਤੇ ਕਾਫ਼ਲੇ ਦੀ ਪਿਛਲੇ 18 ਸਾਲ ਦੀ ਕਾਰਗੁਜ਼ਾਰੀ ‘ਤੇ ਨਜ਼ਰ ਮਾਰਦਿਆਂ ਉਨ੍ਹਾਂ ਕਿਹਾ ਕਿ ਕੈਨੇਡੀਅਨ ਸਾਹਿਤ ਵਿੱਚ ਕਾਫ਼ਲਾ ਆਪਣਾ ਮਾਣਮੱਤਾ ਯੋਗਦਾਨ ਪਾ ਰਿਹਾ ਹੈ।

ਇਸ ਸਮਾਗਮ ਦੌਰਾਨ ਪ੍ਰਿੰਸੀਪਲ ਸਰਵਣ ਸਿੰਘ ਵੱਲੋਂ ਸੰਪਾਦਤ ਕਿਤਾਬ “ਕੰਪਿਊਟਰ ਦਾ ਧਨੰਤਰ: ਕਿਰਪਾਲ ਸਿੰਘ ਪੰਨੂੰ” (ਕਿਰਪਾਲ ਪੰਨੂੰ ਦੇ 75ਵੇਂ ਜਨਮ-ਦਿਨ ‘ਤੇ ਦੂਸਰੇ ਲੇਖਕਾਂ ਵੱਲੋਂ ਉਨ੍ਹਾਂ ਪ੍ਰਤੀ ਲਿਖੇ ਲੇਖ), ਜਰਨੈਲ ਸਿੰਘ ਕਹਾਣੀਕਾਰ ਵੱਲੋਂ ਕੈਨੇਡਾ ਦੀਆਂ ਪੰਜਾਬੀ ਕਹਾਣੀਆਂ ਦੀ ਸੰਪਾਦਤ ਕੀਤੀ ਹੋਈ ਕਿਤਾਬ “ਮੇਪਲ ਦੇ ਰੰਗ”, ਹਰਮੋਹਨ ਛਿੱਬਰ ਹੁਰਾਂ ਦੀ ਹਾਸ-ਰਸ ਦੀ ਅੰਗ੍ਰੇਜ਼ੀ ਵਿੱਚ ਲਿਖੀ ਕਿਤਾਬ “ਇਨਸੀਡੈਂਟਲ ਸਮਾਇਲਜ਼”, ਅਤੇ ਮਲੂਕ ਸਿੰਘ ਕਾਹਲ਼ੋਂ ਦੀ ਕਿਤਾਬ “ਲੋਕ ਵੇਦਨਾ” ਰਲੀਜ਼ ਕੀਤੀਆਂ ਗਈਆਂ ਅਤੇ ਆਉਣ ਵਾਲ਼ੇ ਦਿਨਾਂ ਵਿੱਚ ਇਨ੍ਹਾਂ ‘ਤੇ ਵਿਚਾਰ ਚਰਚਾ ਕਰਨ ਦਾ ਵਾਅਦਾ ਕੀਤਾ ਗਿਆ।

ਇਸੇ ਦੌਰਾਨ ਜਿੱਥੇ ਕਾਫ਼ਲੇ ਵੱਲੋਂ ਅਗਲੇ ਮਹੀਨੇ ‘ਪ੍ਰਗਤੀਸ਼ੀਲ ਸਾਹਿਤ’ ਦੇ ਵਿਸ਼ੇ ‘ਤੇ ਕਰਵਾਏ ਜਾ ਰਹੇ ਸੈਮੀਨਾਰ ਬਾਰੇ ਗੱਲਬਾਤ ਹੋਈ ਓਥੇ ਕਾਫ਼ਲੇ ਦਾ ਵੈੱਬਸਾਈਟ www.kalmandakafla.com ਵੀ ਲੌਂਚ ਕੀਤਾ ਗਿਆ।

ਉਂਕਾਰਪ੍ਰੀਤ ਵੱਲੋਂ ਕਾਫ਼ਲੇ ਦੇ ਸੰਚਾਲਕਾਂ ਦੀ ਚੋਣ ਸਮੇਂ ਮੀਟਿੰਗ ਦੀ ਪ੍ਰਧਾਨਗੀ ਕਰ ਰਹੇ ਜਰਨੈਲ ਸਿੰਘ ਕਹਾਣੀਕਾਰ ਨੂੰ ਬੇਨਤੀ ਕੀਤੀ ਗਈ ਕਿ ਉਹ ਇਹ ਕਾਰਵਾਈ ਚਲਾਉਣ। ਜਰਨੈਲ ਸਿੰਘ ਨੇ ਇਸ ਕਾਰਵਾਈ ਲਈ ਸੁਝਾਅ ਦੇਣ ਦਾ ਸੱਦਾ ਦੇਣ ਦੇ ਨਾਲ਼ ਹੀ ਆਪਣੇ ਵੱਲੋਂ ਸੁਝਾਅ ਦਿੱਤਾ ਕਿ ਮੌਜੂਦਾ ਟੀਮ ਦੇ ਕੰਮ ਦੀ ਰੌਸ਼ਨੀ ਵਿੱਚ ਉਹ ਸੁਝਾਅ ਦਿੰਦੇ ਹਨ ਕਿ ਇਸੇ ਟੀਮ ਨੂੰ ਹੀ ਅਗਲੇ ਸਾਲ ਲਈ ਰੱਖਿਆ ਜਾਵੇ। ਮਿੰਨੀ ਗਰੇਵਾਲ਼ ਵੱਲੋਂ ਇਸ ਸਿਫ਼ਾਰਿਸ਼ ਨੂੰ ਸੈਕਿੰਡ ਕੀਤਾ ਗਿਆ ਜਦਕਿ ਕੁਲਜੀਤ ਮਾਨ ਅਤੇ ਰਾਜਪਾਲ ਬੋਪਾਰਾਏ ਬਹੁਤ ਸਾਰੇ ਹਾਜ਼ਰ ਮੈਂਬਰਾਂ ਨੇ ਇਸ ਸਿਫ਼ਾਰਿਸ਼ ਦੀ ਪ੍ਰੋੜਤਾ ਕੀਤੀ। ਮੌਜੂਦਾ ਟੀਮ ਨੇ ਹਾਜ਼ਰ ਮੈਂਬਰਾਂ ਦਾ ਧੰਨਵਾਦ ਕਰਦਿਆਂ ਮੈਂਬਰਾਂ ਵੱਲੋਂ ਆਏ ਸੁਝਾਵਾਂ, ਜਿਨ੍ਹਾਂ ਵਿੱਚ ਜਸਵਿੰਦਰ ਸੰਧੂ ਵੱਲੋਂ ਬਾਕੀ ਮੈਂਬਰਾਂ ਵੱਲੋਂ ਵੀ ਕਾਫ਼ਲੇ ਦੀ ਕਾਰਵਾਈ ਵਿੱਚ ਹਿੱਸਾ ਲੈਣ ਲਈ ਪ੍ਰੇਰਨਾ ਅਤੇ ਨਾਹਰ ਔਜਲਾ ਵੱਲੋਂ ਸਵਾਲ-ਜਵਾਬਾਂ ਲਈ ਵੱਧ ਸਮਾਂ ਦੇਣਾ ਸ਼ਾਮਲ ਸੀ, ਨੂੰ ਅਗਲੇ ਦਿਨਾਂ ਵਿੱਚ ਲਾਗੂ ਕਰਨ ਦਾ ਵਾਅਦਾ ਕੀਤਾ। ਜਰਨੈਲ ਸਿੰਘ ਅਤੇ ਸੁਦਾਗਰ ਸਿੰਘ ਬਰਾੜ ਲੰਡੇ ਨੇ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਸਮੇਂ ਦੀ ਪਾਬੰਦੀ ਹੋਣ ਕਰਕੇ ਗੱਲਬਾਤ ਨੂੰ ਸੀਮਤ ਰੱਖਣਾ ਇੱਕ ਮਜਬੂਰੀ ਹੈ ਪਰ ਸਾਰੇ ਮੈਂਬਰਾਂ ਦੇ ਸਮੇਂ-ਸਿਰ ਮੀਟਿੰਗ ਵਿੱਚ ਪਹੁੰਚਣ ਨਾਲ਼ ਇਹ ਮੁਸ਼ਕਲ ਕਾਫੀ ਹੱਦ ਤੱਕ ਹੱਲ ਹੋ ਸਕਦੀ ਹੈ।

ਮੀਟਿੰਗ ਦੀ ਗੱਲਬਾਤ ਵਿੱਚ ਹਿੱਸਾ ਲੈ ਰਹੇ ਸਾਹਿਤਕਾਰਾਂ ਅਤੇ ਦੋਸਤਾਂ ਵਿੱਚ ਡਾ. ਹਰਭਜਨ ਸਿੰਘ ਗਰੀਜ਼ੀ, ਜਗਤਾਰ ਸਿੰਘ ਗਿੱਲ, ਜਰਨੈਲ ਸਿੰਘ ਗਰਚਾ, ਹਰਜੀਤ ਕੌਰ ਸੰਧੂ, ਪਤਵੰਤ ਕੌਰ ਪੰਨੂੰ, ਕੁਲਜੀਤ ਮਾਨ, ਮਨਮੋਹਨ ਗੁਲਾਟੀ, ਰਾਵੀ ਮਿਨਹਾਸ, ਬਲਰਾਜ ਚੀਮਾ, ਪੂਰਨ ਸਿੰਘ ਪਾਂਧੀ, ਸੁਰਜਨ ਜ਼ੀਰਵੀ, ਨਾਹਰ ਸਿੰਘ ਔਜਲਾ, ਮਿੰਨੀ ਗਰੇਵਾਲ, ਪ੍ਰਿਤਪਾਲ ਸਿੰਘ, ਸੁਖਦੇਵ ਸਿੰਘ, ਪਰਮਜੀਤ ਸਿੰਘ ਢਿੱਲੋਂ, ਬਲਦੇਵ ਦੂਹੜੇ, ਅਤੇ ਗੁਰਮੀਤ ਸਿੰਘ, ਆਦਿ ਸ਼ਾਮਲ ਸਨ। ਕਾਫ਼ਲੇ ਦੀ ਅਗਲੀ ਮੀਟਿੰਗ ਵਿਸ਼ੇਸ਼ ਮੀਟਿੰਗ ਹੋਵੇਗੀ ਜੋ 28 ਮਈ ਨੂੰ ਸੰਤ ਸਿੰਘ ਸੇਖੋਂ ਹਾਲ ਵਿੱਚ ਸਵੇਰ ਤੋਂ ਸ਼ੁਰੂ ਹੋਵੇਗੀ ਅਤੇ ਰਾਤ ਨੂੰ ਕਵੀ ਦਰਬਾਰ ਨਾਲ਼ ਸਮਾਪਤ ਹੋਵੇਗੀ। ਇਸ ਦੀ ਜ਼ਿਆਦਾ ਜਾਣਕਾਰੀ ਕਾਫ਼ਲੇ ਦੀ ਉਪਰੋਕਤ ਵੈੱਬਸਾਈਟ ਤੋਂ ਲਈ ਜਾ ਸਕਦੀ ਹੈ।

ਟਰਾਂਟੋ, ਕੈਨੇਡਾ ਵਿਚ ਕਾਫ਼ਲੇ ਵੱਲੋਂ ਅਜਮੇਰ ਔਲਖ ਨਾਲ਼ ਮੁਲਾਕਾਤ - ਰਿਪੋਰਟ

2011-04-30T11:33:00.000-07:00

ਰਿਪੋਰਟ: ਟਰਾਂਟੋ:-(ਕੁਲਵਿੰਦਰ ਖਹਿਰਾ) ‘ਪੰਜਾਬੀ ਕਲਮਾਂ ਦਾ ਕਾਫ਼ਲਾ ਟਰਾਂਟੋ’ ਵੱਲੋਂ ਕੈਨੇਡਾ ਫੇਰੀ ‘ਤੇ ਆਏ ਪੰਜਾਬੀ ਨਾਟਕਕਾਰ ਅਜਮੇਰ ਔਲਖ ਨਾਲ਼ 16 ਅਪ੍ਰੈਲ ਨੂੰ ਸੰਤ ਸਿੰਘ ਸੇਖੋਂ ਹਾਲ ਵਿੱਚ ਇੱਕ ਮੀਟਿੰਗ ਦੌਰਾਨ ਇੰਡੀਅਨ ਅਤੇ ਕੈਨੇਡੀਅਨ ਪੰਜਾਬੀ ਰੰਗ-ਮੰਚ ਬਾਰੇ ਖੁੱਲ੍ਹ ਕੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਪ੍ਰਿੰਸੀਪਲ ਸਰਵਣ ਸਿੰਘ ਅਤੇ ਡਾ. ਬਲਜਿੰਦਰ ਸੇਖੋਂ ਦੀ ਪ੍ਰਧਾਨਗੀ ਹੇਠ ਹੋਈ ਇਸ ਮੀਟਿੰਗ ਦੀ ਸ਼ੁਰੂਆਤ ਕਰਦਿਆਂ ਕਾਫ਼ਲਾ ਸੰਚਾਲਕ ਉਂਕਾਰਪ੍ਰੀਤ ਨੇ ਕਿਹਾ ਕਿ 1992 ਤੋਂ ਸਰਗਰਮ ਕਾਫ਼ਲੇ ਵੱਲੋਂ ਹਮੇਸ਼ਾਂ ਕੋਸ਼ਿਸ਼ ਕੀਤੀ ਜਾਂਦੀ ਹੈ ਕਿ ਕਲਾ ਨੂੰ ਲੋਕਾਂ ਦੇ ਪੱਖ ਵਿੱਚ ਵਰਤਣ ਵਾਲ਼ੀਆਂ ਹਸਤੀਆਂ ਨਾਲ਼ ਮੁਲਾਕਾਤ ਕੀਤੀ ਜਾਵੇ। ਅਜਮੇਰ ਔਲਖ ਨੂੰ ਪੰਜਾਬੀ ਦੇ ‘ਸਿਰਕੱਢ ਨਾਟਕਕਾਰਾਂ ਵਿੱਚੋਂ ਇੱਕ’ ਦੱਸਦਿਆਂ ਹੋਇਆਂ ਉਨ੍ਹਾਂ ਕਿਹਾ ਕਿ ਔਲਖ ਨੇ ਗੁਰਸ਼ਰਨ ਭਾਅ ਜੀ ਵਾਂਗ ਹੀ ਨਾਟਕ ਨੂੰ ਲਹਿਰ ਦਾ ਰੂਪ ਦੇਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ ਜਿਸ ਵਿੱਚ ਉਨ੍ਹਾਂ ਦੇ ਸਮੁੱਚੇ ਪਰਵਾਰ ਦੀ ਸ਼ਮੂਲੀਅਤ ਉਨ੍ਹਾਂ ਦੀ ਪ੍ਰਤੀਬਧਤਾ ਨੂੰ ਹੋਰ ਵੀ ਦ੍ਰਿੜ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਔਲਖ ਦੇ ਨਾਟਕ ਕਿਸਾਨੀ ਜੀਵਨ ਦੇ ਅੰਤਰਮਨ ਦੀ ਵਿਥਿਆ ਬਿਆਨ ਕਰਦੇ ਹਨ ਓਥੇ ਲੋਟੂ ਅਨਸਰਾਂ ਨੂੰ ਕਟਹਿਰੇ ਵਿੱਚ ਵੀ ਖੜ੍ਹਾ ਕਰਦੇ ਹਨ। ਗੁਰਦੇਵ ਚੌਹਾਨ ਹੁਰਾਂ ਕਿਹਾ ਕਿ ਔਲਖ ਦੇ ਨਾਟਕਾਂ ਦੀ ਸਮੱਗਰੀ ਉਨ੍ਹਾਂ ਦੇ ਨਿੱਜੀ ਤਜਰਬੇ ਵਿੱਚੋਂ ਆਈ ਹੋਣ ਕਰਕੇ ਉਨ੍ਹਾਂ ਦੇ ਨਾਟਕ ਸ਼ੇਕਸਪੀਅਰ ਵਾਂਗ ਹੀ ਪੜ੍ਹਨ ਨੂੰ ਵੀ ਓਨੇ ਹੀ ਦਿਲਚਸਪ ਹਨ ਜਿੰਨੇ ਕਿ ਵੇਖਣ ਨੂੰ ਜਦ ਕਿ ਡਾ. ਆਤਮਜੀਤ ਅਤੇ ਗੁਰਸ਼ਰਨ ਭਾਅ ਜੀ ਦੇ ਨਾਟਕਾਂ ਵਿੱਚ ਇਹ ਗੱਲ ਬਹੁਤ ਘੱਟ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਗੁਰਸ਼ਰਨ ਭਾਅ ਜੀ ਸੰਦੇਸ਼ ਨੂੰ ਮੁੱਖ ਰੱਖ ਕੇ ਨਾਟਕ ਲਿਖਦੇ ਹਨ ਓਥੇ ਔਲਖ ਆਪਣੇ ਸੰਦੇਸ਼ ਨੂੰ ਕਲਾ ਵਿੱਚ ਲਪੇਟ ਕੇ ਪੇਸ਼ ਕਰਦੇ ਹਨ ਜੋ ਨਾਟਕ ਨੂੰ ਹੋਰ ਵੀ ਪ੍ਰਭਾਵਸ਼ਾਲੀ ਕਰਦਾ ਹੈ। ਬਲਰਾਜ ਚੀਮਾ ਨੇ ਕਿਹਾ ਕਿ ਜਿਸ ਤਰ੍ਹਾਂ ਸੰਤ ਸਿੰਘ ਸੇਖੋਂ ਨੇ ਕਹਾਣੀ ਵਿੱਚ ਪੇਂਡੂ ਜੀਵਨ ਨੂੰ ਉਭਾਰਿਆ ਉਵੇਂ ਹੀ ਅਜਮੇਰ ਔਲਖ ਨੇ ਆਪਣੇ ਨਾਟਕਾਂ ਰਾਹੀਂ ਪੇਂਡੂ ਜੀਵਨ ਨੂੰ ਸਾਹਿਤ ਦਾ ਵਿਸ਼ਾ ਬਣਾਇਆ ਹੈ। ਚੀਮਾ ਨੇ ਕਿਹਾ ਕਿ ਭਾਵੇਂ ਕਈ ਨਾਟਕਕਾਰਾਂ ਦੇ ਨਾਟਕ ਸਿਰਫ਼ ਪੜ੍ਹ ਕੇ ਮਾਣੇ ਜਾ ਸਕਦੇ ਹਨ ਪਰ ਉਨ੍ਹਾਂ ਵਿੱਚ ਸਟੇਜੀ ਗੁਣ ਨਹੀਂ ਹੁੰਦਾ ਪਰ ਔਲਖ ਨੇ ਨਾਟਕ ਪੜ੍ਹਨ ਨੂੰ ਵੀ ਓਨੇ ਹੀ ਰੌਚਿਕ ਹਨ ਜਿੰਨੇ ਕਿ ਵੇਖਣ ਨੂੰ।

ਅਜਮੇਰ ਔਲਖ ਨੇ ਦੱਸਿਆ ਕਿ ਉਨ੍ਹਾਂ ਦੀ ਲਿਖਣ ਪ੍ਰਕਿਰਿਆ ਤਕਰੀਬਨ 8-9 ਸਾਲ ਦੀ ਉਮਰ ਤੋਂ ਹੀ ਗੀਤਾਂ ਦੇ ਰੂਪ ਵਿੱਚ ਸ਼ੁਰੂ ਹੋ ਗਈ ਸੀ ਅਤੇ ਦਸਵੀਂ ਦਾ ਇਮਤਿਹਾਨ ਦੇਣ ਤੋਂ ਬਾਅਦ ਉਨ੍ਹਾਂ ਨੇ ਇੱਕ ਨਾਵਲ ਵੀ ਲਿਖਿਆ ਸੀ ਜੋ ਤਜਰਬੇ ਪੱਖੋਂ ਭਾਵੇਂ ਕੱਚਾ-ਪਿੱਲਾ ਹੀ ਸੀ ਪਰ ਉਸ ਵਿੱਚੋਂ ਉਨ੍ਹਾਂ ਦੀ ਸੋਚ ਦਾ ਸਬੂਤ ਝਲਕਦਾ ਹੈ। ਮੁਜਾਰੇ ਪਰਿਵਾਰ ਵਿੱਚ ਪੈਦਾ ਹੋਏ ਹੋਣ ਕਰਕੇ ਕਿਸਾਨੀ ਪਰਵਾਰਾਂ ਦੀਆਂ ਸਮੱਸਿਆਵਾਂ ਦਾ ਉਨ੍ਹਾਂ ‘ਤੇ ਗਹਿਰਾ ਅਸਰ ਹੋਇਆ ਅਤੇ ਉਨ੍ਹਾਂ ਦੇ ਨਾਟਕਾਂ ਦਾ ਵਿਸ਼ਾ ਬਣਿਆ। ਉਨ੍ਹਾਂ ਕਿਹਾ ਕਿ 1970-72 ਵਿੱਚ ਲੈਕਚਰਰ ਲੱਗਣ ਤੋਂ ਬਾਅਦ ਭਾਵੇਂ ਉਨ੍ਹਾਂ ਵੱਲੋਂ ਤਿਆਰ ਕਰਵਾਈਆਂ ਜਾਂਦੀਆਂ ਸੱਭਿਆਚਾਰਕ ਆਈਟਮਾਂ ਨੂੰ ਕਲਾਕਾਰਾਂ ਅਤੇ ਦਰਸ਼ਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਣ ਲੱਗ ਪਿਆ ਸੀ ਪਰ ਉਨ੍ਹਾਂ ਕਦੀ ਸੋਚਿਆ ਤੱਕ ਵੀ ਨਹੀਂ ਸੀ ਕਿ ਉਹ ਨਾਟਕ ਲਿਖਣ ਲੱਗ ਪੈਣਗੇ। ਫ਼ਰੀਦਕੋਟ ਦੇ ਬ੍ਰਜਿੰਦਰਾ ਕਾਲਿਜ ਵਿੱਚ ਹੁੰਦੇ ਯੂਥ ਫੈਸਟੀਵਲ ਦੌਰਾਨ ਉਨ੍ਹਾਂ ਦੀ ਪ੍ਰਦਰਸ਼ਨੀ ਨੂੰ ਵੇਖਦਿਆਂ ਹੋਇਆਂ ਉਸ ਸਮੇਂ ਦੇ ਵਿਦਵਾਨ ਸਾਹਿਤਕਾਰਾਂ ਵੱਲੋਂ ਉਨ੍ਹਾਂ ਨੂੰ ਸਿਰਫ ਨਾਟਕ ਲਿਖਣ ਵੱਲ ਹੀ ਧਿਆਨ ਦਿੱਤੇ ਜਾਣ ਦਾ ਸੁਝਾਅ ਆਉਣ ‘ਤੇ ਹੀ ਉਨ੍ਹਾਂ ਨੇ ਤਕਰੀਬਨ 1979 ਵਿੱਚ ਨਾਟਕ ਲਿਖਣਾ ਸ਼ੁਰੂ ਕੀਤਾ। ਜਾਗੀਰਦਾਰ ਦੇ ਖੇਤਾਂ ‘ਚ ਕੰਮ ਕਰਦਿਆਂ ਆਪਣੇ ਪੁੱਤ ਲਈ ਇੱਕ ਛੱਲੀ ਘਰ ਲਿਆਉਣ ਦੀ ਕੋਸ਼ਿਸ਼ ਕਰਨ ਬਦਲੇ ਜਾਗੀਰਦਾਰਾਂ ਦੇ ਗੁੰਡਿਆਂ ਵੱਲੋਂ ਆਪਣੀ ਮਾਂ ਦੀ ਕੀਤੀ ਗਈ ਬੇਇਜ਼ਤੀ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਅੱਜ ਵੀ ਉਸ ਘਟਨਾ ਦੀ ਯਾਦ ਉਨ੍ਹਾਂ ਦੀਆਂ ਅੱਖਾਂ ਵਿੱਚ ਹੰਝੂ ਲਿਆ ਦਿੰਦੀ ਹੈ। ਸੁਦਾਗਰ ਬਰਾੜ ਵੱਲੋਂ ਲਹਿਰਾਂ ਦੇ ਪ੍ਰਭਾਵ ਬਾਰੇ ਪੁੱਛੇ ਜਾਣ ‘ਤੇ ਉਨ੍ਹਾਂ ਕਿਹਾ ਕਿ ਭਾਵੇਂ ਕਿਸਾਨੀ ਘੋਲ਼, ਜਿਨ੍ਹਾਂ ਵਿੱਚ ਆਦਿਵਾਸੀ ਕਿਸਾਨਾਂ ਦਾ ਘੋਲ਼ ਵੀ ਸ਼ਾਮਿਲ ਹੈ, ਨਾਲ਼ ਸਬੰਧਤ ਹਰ ਲਹਿਰ ਨੇ ਉਨ੍ਹਾਂ ਨੂੰ ਪ੍ਰਭਾਵਿਤ ਕੀਤਾ ਹੈ ਪਰ ਉਨ੍ਹਾਂ ਉੱਤੇ ਮੁਢਲਾ ਪ੍ਰਭਾਵ ਮੁਜਾਰਾ ਲਹਿਰ ਦਾ ਹੀ ਪਿਆ। ਗੁਰਸ਼ਰਨ ਭਾਅ ਜੀ ਤੋਂ ਪ੍ਰਭਾਵਿਤ ਹੋ ਕੇ ਉਨ੍ਹਾਂ ਫੈਸਲਾ ਕੀਤਾ ਕਿ ਜੇ ਲਿਖਣਾ ਹੈ ਤਾਂ ਸਿਰਫ਼ ਦੱਬੇ-ਕੁਚਲ਼ੇ ਆਮ ਲੋਕਾਂ ਲਈ ਹੀ ਲਿਖਣਾ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਪੰਜਾਬ ਵਿੱਚ ਏਥੋਂ ਵਰਗੀਆਂ ਸਟੇਜੀ ਅਤੇ ਤਕਨੀਕੀ ਸਹੂਲਤਾਂ ਨਹੀਂ ਮਿਲ਼ਦੀਆਂ ਪਰ ਉਨ੍ਹਾਂ ਦੇ ਆਦਰਸ਼ ਗੁਰਸ਼ਰਨ ਭਾਅ ਜੀ ਅਤੇ ਜੋਗਿੰਦਰ ਬਾਹਰਲੇ ਵਰਗੇ ਨਾਟਕਕਾਰ ਹਨ ਜੋ ਗੱਡਿਆਂ ਦੀ ਸਟੇਜ ਬਣਾ ਕੇ ਅਤੇ ਮਸ਼ਾਲਾਂ ਦੀ ਰੌਸ਼ਨੀ ਵਿੱਚ ਹੀ ਨਾਟਕ ਕਰਕੇ ਪੰਜਾਬ ਵਿੱਚ ਨਾਟਕਾਂ ਦੀ ਪਿਰਤ ਪਾ ਗਏ ਹਨ। ਔਲਖ ਹੁਰਾਂ ਕਿਹਾ ਕਿ ਅਸਲੀ ਪੇਸ਼ਕਾਰੀ ਤਾਂ ਕਲਾਕਾਰ ਦੀ ਕਲਾਕਾਰੀ ਹੀ ਹੈ ਸਟੇਜੀ ਸਹੂਲਤਾਂ ਤਾਂ ਸਿਰਫ ਪੇਸ਼ਖਾਰੀ ਵਿੱਚ ਸਹਾਈ ਹੀ ਹੋ ਸਕਦੀਆਂ ਹਨ। ਮਿਸਾਲ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਇੱਕ ਸਮਾਗਮ ਵਿੱਚ ਉਨ੍ਹਾਂ ਤੋਂ ਪਹਿਲਾਂ ਹਰਪਾਲ ਟਿਵਾਣਾ ਵੱਲੋਂ ਖੇਡੇ ਗਏ ਨਾਟਕ ਵਿੱਚ ਸਟੇਜ ‘ਤੇ ਮਹਿਲ ਬਣਾ ਕੇ ਵੇਸ-ਭੂਸ਼ਾ ‘ਤੇ ਬੇਹੱਦ ਧਿਆਨ ਦਿੱਤਾ ਗਿਆ ਸੀ ਪਰ ਉਨ੍ਹਾਂ ਦੇ ਨਾਟਕ ਸਮੇਂ ਸਟੇਜ ‘ਤੇ ਸਿਰਫ਼ ਇੱਕ ਮੰਜਾ ਅਤੇ ਲੱਕੜ ਦਾ ਖੁੰਢ ਹੀ ਪਿਆ ਸੀ। ਇਸ ਦੇ ਬਾਵਜੂਦ ਉਨ੍ਹਾਂ ਦੇ ਕਲਾਕਾਰਾਂ ਵੱਲੋਂ ਵਧੀਆ ਪ੍ਰਦਰਸ਼ਨੀ ਕਰ ਦਿੱਤੇ ਜਾਣ ਕਰਕੇ ਉਨ੍ਹਾਂ ਦੇ ਨਾਟਕ ਨੂੰ ਵੱਧ ਸਲਾਹਿਆ ਗਿਆ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਅਸਲੀ ਮਾਰਗ-ਦਰਸ਼ਕ ਅਤੇ ਆਲੋਚਕ ਯੂਨੀਵਰਸਿਟੀਆਂ ਵਿੱਚ ਬੈਠੇ ਹੋਏ ਆਲੋਚਕ ਨਹੀਂ ਸਗੋਂ ਸਧਾਰਨ ਪੇਂਡੂ ਲੋਕ ਹਨ ਜੋ ਬਿਨਾਂ ਕਿਸੇ ਹੇਰ-ਫੇਰ ਦੇ ਦਿਲੀ ਰਾਏ ਦੇ ਕੇ ਉਨ੍ਹਾਂ ਦੇ ਨਾਟਕਾਂ ਦਾ ਸੁਹਿਰਦ ਮੁਲਾਂਕਣ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਨਾਟਕਾਂ ਵਿੱਚ ਕੰਮ ਕਰਨ ਵਾਲ਼ੇ ਅਦਾਕਾਰਾਂ ਦੀ ਚੋਣ ਸਿਖਲਾਈ ਹਾਸਲ ਕਲਾਕਾਰਾਂ ਵਿੱਚੋਂ ਕਰਨ ਦੀ ਬਜਾਏ ਆਮ ਸਧਾਰਨ ਲੋਕਾਂ ਵਿੱਚੋਂ ਹੀ ਕਰਦੇ ਹਨ ਜੋ ਨਾ ਸਿਰਫ਼ ਪੇਂਡੂ ਕਿਰਦਾਰਾਂ ਨਾਲ਼ ਸਹੀ ਇਨਸਾਫ਼ ਹੀ ਕਰਦੇ ਹਨ ਸਗੋਂ ਉਨ੍ਹਾਂ (ਔਲਖ) ਦੀਆਂ ਭਾਸ਼ਾਈ ਕਮਜ਼ੋਰੀਆਂ ਵੱਲ ਵੀ ਧਿਆਨ ਦਿਵਾਉਂਦੇ ਹਨ। 2008 ਸਾਲ ਦੌਰਾਨ ਆਪਣੀ ਬੀਮਾਰੀ ਦੀ ਗੱਲ ਕਰਦਿਆਂ ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਤਾਂ ਕਈ ਵਾਰ ਲੇਖਕਾਂ/ਕਲਾਕਾਰਾਂ ਨੂੰ ਇਲਾਜ ਲਈ ਪੈਸਾ ਦੇ ਹੀ ਦਿੰਦੀਆਂ ਨੇ ਪਰ ਉਨ੍ਹਾਂ ਨੂੰ ਇਸ ਗੱਲ ਦਾ ਬੇਹੱਦ ਮਾਣ ਹੈ ਉਨ੍ਹਾਂ ਦੇ ਦਿੱਲੀ ਹਸਪਤਾਲ ਵਿੱਚ ਪਏ ਹੋਣ ਸਮੇਂ ਵੱਖ ਵੱਖ ਸੰਸਥਾਵਾਂ ਨੇ ਆਮ ਜਨਤਾ ਵਿੱਚੋਂ ਤਕਰੀਬਨ 9 ਲੱਖ ਰੁਪਏ ਦੀ ਮਦਦ ਕੀਤੀ। ਉਨ੍ਹਾਂ ਕਿਹਾ ਕਿ ਇਹੋ ਹੀ ਉਨ੍ਹਾਂ ਦਾ ਸਭ ਤੋਂ ਵੱਡਾ ਸਨਮਾਨ ਸੀ ਅਤੇ ਜਨਤਾ ਦੇ ਇਸ ਮੋਹ ਸਦਕਾ ਉਨ੍ਹਾਂ ਦੀ ਪ੍ਰਤੀਬੱਧਤਾ ਹੋਰ ਵੀ ਪੱਕੀ ਹੋਈ ਹੈ।

ਕੈਨੇਡੀਅਨ ਪੰਜਾਬੀ ਨਾਟਕ ਬਾਰੇ ਬੋਲਦਿਆਂ ਜਸਪਾਲ ਢਿੱਲੋਂ ਹੁਰਾਂ ਕਿਹਾ ਕਿ ਭਾਵੇਂ ਉਨ੍ਹਾਂ ਨੇ 1991 ਵਿੱਚ ਟਰਾਂਟੋ ਵਿੱਚ ਨਾਟਕ ਸ਼ੁਰੂ ਕਰਕੇ ਏਥੇ ਲੋਕਲ ਨਾਟਕਾਂ ਦੀ ਸ਼ੁਰੂਆਤ ਵਿੱਚ ਹਿੱਸਾ ਪਾਇਆ ਸੀ ਪਰ ਹੁਣ ਬਲਜਿੰਦਰ ਲੇਲਣਾ ਹੁਰਾਂ ਦੀ ‘ਪੰਜਾਬੀ ਆਰਟਸ ਐਸੋਸੀਏਸ਼ਨ’ ਅਤੇ ਹੀਰਾ ਰੰਧਾਵਾ ਵਰਗੇ ਨਾਟਕਕਾਰਾਂ ਨੇ ਆਪਣਾ ਪਰਿਵਾਰ ਵਧਾ ਕੇ ਟਰਾਂਟੋ ਦੇ ਰੰਗ-ਮੰਚ ਨੂੰ ਅੱਗੇ ਤੋਰਿਆ ਹੈ। ਉਨ੍ਹਾਂ ਕਿਹਾ ਕਿ ਟੀਮ ਭਾਵੇਂ ਕੋਈ ਵੀ ਕੰਮ ਕਰ ਰਹੀ ਹੋਵੇ, ਸਾਨੂੰ ਹਮੇਸ਼ਾਂ ਨਾਟਕ ਨੂੰ ਮੁੱਖ ਰੱਖ ਕੇ ਇੱਕ-ਦੂਸਰੇ ਨੂੰ ਸਹਿਯੋਗ ਦੇਣਾ ਚਾਹੀਦਾ ਹੈ। ਬਲਜਿੰਦਰ ਲੇਲਣਾ ਨੇ ਕਿਹਾ ਕਿ ਉਨ੍ਹਾਂ ਦਾ ਨਿਸ਼ਾਨਾ ਕੈਨੇਡੀਅਨ ਜੀਵਨ ਬਾਰੇ ਪੰਜਾਬੀ ਨਾਟਕਾਂ ਨੂੰ ਪ੍ਰਫੁੱਲਤ ਕਰਨਾ ਹੈ ਤਾਂ ਕਿ ਸਾਡੇ ਲੋਕ ਅਤੇ ਖ਼ਾਸ ਕਰਕੇ ਸਾਡੇ ਬੱਚੇ ਸਾਡੇ ਨਾਟਕਾਂ ਨਾਲ਼ ਜੁੜ ਸਕਣ। ਨਾਹਰ ਔਜਲਾ ਨੇ ਕਿਹਾ ਕਿ ਕਿਉਂਕਿ ਪਹਿਲਾਂ ਲੋਕ ਕਮਾਈ ਕਰਕੇ ਵਾਪਸ ਇੰਡੀਆ ਮੁੜ ਜਾਣ ਦੇ ਮਕਸਦ ਨਾਲ਼ ਆਉਂਦੇ ਸਨ ਇਸ ਲਈ ਉਨ੍ਹਾਂ ਦਾ ਝੁਕਾਅ ਹਮੇਸ਼ਾਂ ਪੰਜਾਬ ਵੱਲ ਹੀ ਰਹਿੰਦਾ ਸੀ। ਪਰ ਅੱਜਕਲ੍ਹ ਆ ਰਹੇ ਬਹੁਤੇ ਪੰਜਾਬੀ ਇਮੀਗ੍ਰੈਂਟ ਪਹਿਲਾਂ ਹੀ ਪੱਕੇ ਤੌਰ ‘ਤੇ ਕੈਨੇਡਾ ਰਹਿਣ ਦਾ ਮਨ ਬਣਾ ਕੇ ਆ ਰਹੇ ਹੋਣ ਕਰਕੇ ਹੁਣ ਏਥੋਂ ਦੀ ਜ਼ਿੰਦਗੀ ਨਾਲ਼ ਸਬੰਧਤ ਮਸਲਿਆਂ ਵਿੱਚ ਰੁਚੀ ਵਧੀ ਹੈ। ਇਸ ਕਰਕੇ ਏਥੋਂ ਦੀਆਂ ਸਮੱਸਿਆਵਾਂ ਨੂੰ ਮੁਖ਼ਾਤਿਬ ਨਾਟਕਾਂ ਦੀ ਲੋੜ ਵੀ ਵਧੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਦੇ ਬਾਵਜੂਦ ਅਜੇ ਵੀ ਕੈਨੇਡੀਅਨ ਪੰਜਾਬੀ ਨਾਟਕ ਇੰਡੀਆ ਤੋਂ ਆਉਣ ਵਾਲ਼ੇ ਕਲਾਕਾਰਾਂ ਦੇ ਸਿਰ ‘ਤੇ ਹੀ ਜੀਅ ਰਿਹਾ ਹੈ। ਬਲਦੇਵ ਰਹਿਪਾ ਨੇ ‘ਤਰਕਸ਼ੀਲ ਸੁਸਾਇਟੀ’ ਦੇ ਨਾਟਕਾਂ ਬਾਰੇ ਬੋਲਦਿਆਂ ਕਿਹਾ ਕਿ ਇਸ ਸੁਸਾਇਟੀ ਦੇ ਨਿਸ਼ਾਨੇ ਸੀਮਤ ਹੋਣ ਕਰਕੇ ਇਨ੍ਹਾਂ ਵੱਲੋਂ ਕਰਵਾਏ ਜਾਣ ਵਾਲ਼ੇ ਨਾਟਕਾਂ ਦੇ ਵਿਸ਼ੇ ਵੀ ਸੀਮਤ ਰਹਿ ਜਾਂਦੇ ਹਨ ਕਿਉਂਕਿ ਉਹ ਆਪਣੇ ਸੰਦੇਸ਼ ਨੂੰ ਮੁੱਖ ਰੱਖ ਕੇ ਹੀ ਨਾਟਕ ਕਰਵਾ ਸਕਦੇ ਹਨ। ਪਰ ਉਨ੍ਹਾਂ ਕਿਹਾ ਕਿ ਅੱਜ ਦੇ ਤਕਨੀਕੀ ਅਤੇ ਗੋਲਬਲਾਈਜ਼ੇਸ਼ਨ ਦੇ ਯੁਗ ਵਿੱਚ ਅਸੀਂ ਆਪਣੇ ਆਪ ਨੂੰ ਪੰਜਾਬ ਤੋਂ ਅਲੱਗ ਕਰਕੇ ਨਹੀਂ ਵੇਖ ਸਕਦੇ ਕਿਉਂਕਿ ਅੱਜ ਭਾਵੇਂ ਅਸੀਂ ਦੁਨੀਆਂ ਦੇ ਕਿਸੇ ਵੀ ਕੋਨੇ ਵਿੱਚ ਬੈਠੇ ਹੋਈਏ, ਸਾਡੀਆਂ ਸਮੱਸਿਆਵਾਂ ਤਕਰੀਬਨ ਇੱਕੋ ਜਿਹੀਆਂ ਹੀ ਹਨ। ਉਨ੍ਹਾਂ ਨੇ ਹਰ ਸੰਸਥਾ ਵੱਲੋਂ ਨਿਭਾਏ ਜਾ ਰਹੇ ਰੋਲ ਨੂੰ ਸਾਂਝੇ ਕਾਜ ਦੀ ਇੱਕ ਇੱਕ ਕੜੀ ਦੱਸਦਿਆਂ ਕਿਹਾ ਕਿ ਸਾਨੂੰ ਸਭ ਨੂੰ ਹਰ ਉਸ ਸੰਸਥਾ ਦਾ ਸਾਥ ਦੇਣਾ ਚਾਹੀਦਾ ਹੈ ਜੋ ਕਿਸੇ ਨਾ ਕਿਸੇ ਰੂਪ ਵਿੱਚ ਲੋਕ-ਭਲਾਈ ਬਾਰੇ ਯਤਨਸ਼ੀਲ ਹੈ। ਬਲਜਿੰਦਰ ਲੇਲਣਾ ਵੱਲੋਂ ਔਲਖ ਸਾਹਿਬ ਨੂੰ ਏਥੋਂ ਦੇ ਜੀਵਨ ਨਾਲ਼ ਸਬੰਧਤ ਨਾਟਕ ਲਿਖਣ ਦੀ ਬੇਨਤੀ ਕੀਤੀ ਗਈ ਜਿਸ ਦੇ ਜਵਾਬ ਵਿੱਚ ਔਲਖ ਸਾਹਿਬ ਨੇ ਕਿਹਾ ਕਿ ਕੁਝ ਸਮੇਂ ਲਈ ਕੈਨੇਡਾ ਆਇਆ ਲੇਖਕ ਏਥੋਂ ਦੇ ਜੀਵਨ ਦਾ ਸਹੀ ਅੰਦਾਜ਼ਾ ਨਹੀਂ ਲਗਾ ਸਕਦਾ ਜਿਸ ਕਰਕੇ ਉਹ ਨਾਟਕ ਨਾਲ਼ ਪੂਰਾ ਇਨਸਾਫ਼ ਨਹੀਂ ਕਰ ਸਕਦਾ। ਕੁਲਵਿੰਦਰ ਖਹਿਰਾ ਨੇ ਉਨ੍ਹਾਂ ਦੀ ਪ੍ਰੋੜ੍ਹਤਾ ਕਰਦਿਆਂ ਕਿਹਾ ਕਿ ਏਥੋਂ ਬਾਰੇ ਨਾਟਕ ਲਿਖਣ ਲਈ ਏਥੋਂ ਦੇ ਜੀਵਨ ਵਰਤਾਰੇ ਨੂੰ ਧੁਰ ਤੱਕ ਸਮਝਣਾ ਬਹੁਤ ਜ਼ਰੂਰੀ ਹੈ। ਉਸ ਨੇ ਕਿਹਾ ਕਿ ਕੈਨੇਡੀਅਨ ਪੰਜਾਬੀ ਨਾਟਕ ਦੀ ਪ੍ਰਫੁੱਲਤਾ ਲਈ ਜਿੱਥੇ ਏਥੋਂ ਦੇ ਮੁੱਖਧਾਰਾ ਦੇ ਸਾਹਿਤਕ ਮਾਹੌਲ ਤੋਂ ਪੂਰੀ ਤਰ੍ਹਾਂ ਵਾਕਫ਼ ਹੋਣ ਦੀ ਲੋੜ ਹੈ ਓਥੇ ਪੰਜਾਬ ਤੋਂ ਆਉਣ ਵਾਲ਼ੇ ਨਾਟਕਕਾਰਾਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਮੌਜੂਦਾ ਮਸਲਿਆਂ ਨਾਲ਼ ਸਬੰਧਤ ਨਾਟਕ ਲੈ ਕੇ ਆਉਣ ਤਾਂ ਕਿ ਅਸੀਂ ਜਾਣ ਸਕੀਏ ਕਿ ਕੈਨੇਡਾ ਦਾ ਮੁੱਖਧਾਰਾ ਦਾ ਸਾਹਿਤ ਕੀ ਕਹਿ ਰਿਹਾ ਹੈ ਅਤੇ ਪੰਜਾਬ ਵਿਚਲਾ ਸਾਹਿਤ ਕਿਨ੍ਹਾਂ ਵਿਸ਼ਿਆਂ ਬਾਰੇ ਗੱਲ ਕਰ ਰਿਹਾ ਹੈ।

ਆਪਣੇ ਪ੍ਰਧਾਨਗੀ ਭਾਸ਼ਨ ਵਿੱਚ ਪ੍ਰਿੰਸੀਪਲ ਸਰਵਣ ਸਿੰਘ ਹੁਰਾਂ ਕਿਹਾ ਕਿ ਔਲਖ ਦੇ ਨਾਟਕਾਂ ਦਾ ਗੁਣ ਇਹ ਹੈ ਕਿ ਔਲਖ ਸਾਹਿਬ ਹਰ ਡਾਇਆਲੌਗ ਢਿੱਡੋਂ ਬੋਲਦੇ ਹਨ, ਉਨ੍ਹਾਂ ਦੀ ਸਵੈ-ਜੀਵਨੀ ਦਾ ਸਿਰਲੇਖ ਵੀ ‘ਨੰਗਾ-ਢਿੱਡ’ ਹੀ ਹੈ। ਜਗਮੋਹਨ ਸੇਖੋਂ ਨੇ ਔਲਖ ਸਾਹਿਬ ਦੇ ਪ੍ਰਭਾਵਸ਼ਾਲੀ ਭਾਸ਼ਨੀ ਅੰਦਾਜ਼ ਦੀ ਪ੍ਰਸੰਸਾ ਕਰਦਿਆਂ ਉਰਦੂ ਦੇ ਇੱਕ ਸਿ਼ਅਰ ਦੇ ਹਵਾਲੇ ਨਾਲ਼ ਕਿਹਾ ਕਿ ਔਲਖ ਸਾਹਿਬ ਉਹ ਸੁਰਾਹੀ ਹਨ ਜਿਨ੍ਹਾਂ ਨੇ ਪਿਆਲੇ ਕੋਲ਼ੋਂ ਲੈਣਾ ਕੁਝ ਨਹੀਂ ਪਰ ਫਿਰ ਵੀ ਝੁਕ ਕੇ ਹੀ ਪਿਆਲੇ ਨੂੰ ਭਰਦੀ ਹੈ।

ਇਸ ਮੌਕੇ ਹੋਈ ਗੱਲਬਾਤ ਵਿੱਚ ਬਰਜਿੰਦਰ ਗੁਲਾਟੀ, ਹਰਜੀਤ ਕੌਰ, ਜਗਤਾਰ ਸਿੰਘ ਗਿੱਲ, ਅਮਰਜੀਤ ਸਿੰਘ ਬਰਾੜ, ਗੁਰਦਾਸ ਮਿਨਹਾਸ, ਚਰਨਜੀਤ ਬਰਾੜ, ਵਕੀਲ ਕਲੇਰ, ਮਨਮੋਹਨ ਗੁਲਾਟੀ, ਰਾਵੀ ਮਿਨਹਾਸ, ਪਰਮਜੀਤ ਢਿੱਲੋਂ, ਅਤੇ ਸਤੰਵਤ ਔਜਲਾ ਨੇ ਵੀ ਭਰਪੂਰ ਯੋਗਦਾਨ ਪਾਇਆ।

ਇੰਡੋ-ਪਾਕਿ ਡਰਾਮਾ ਫੈਸਟੀਵਲ ਲੁਧਿਆਣਾ ਵਿਖੇ ਹੋਇਆ - ਰਿਪੋਰਟ

2011-04-30T11:30:00.000-07:00

ਰਿਪੋਰਟ: ਡਾ: ਨਿਰਮਲ ਜੌੜਾ - ਪੰਜਾਬੀ ਨਾਟ ਅਕਾਦਮੀ ਲੁਧਿਆਣਾ ਵੱਲੋਂ ਵਿਉਂਤ ਤਾਂ ‘ਵਿਸ਼ਵ ਪੰਜਾਬੀ ਰੰਗਮੰਚ ਕਾਨਫਰੰਸ’ ਆਯੋਜਿਤ ਕਰਨ ਦੀ ਬਣਾਈ ਸੀ । ਅਮਰੀਕਾ,ਆਸਟ੍ਰੇਲੀਆ, ਕੈਨੇਡਾ ,ਪਾਕਿਸਤਾਨ ਤੋਂ ਪੰਜਾਬੀ ਰੰਗ ਕਰਮੀਆਂ ਨੇ ਹਾਮੀ ਵੀ ਭਰ ਦਿੱਤੀ ਸੀ ਪਰ ਪਾਕਿਸਤਾਨ ਤੋਂ ਕਲਾਕਾਰਾਂ ਲਈ ਕਾਫੀ ਬੰਦਸ਼ਾਂ ਹੋਣ ਕਰਕੇ ਗ੍ਰਹਿ ਵਿਭਾਗ ਵੱਲੋਂ ਵਕਤ ਸਿਰ ਮਨਜ਼ੂਰੀ ਨਾ ਮਿਲੀ, ਅਕਾਦਮੀ ਦੇ ਚੇਅਰਮੈਨ ਸੰਤੋਖ ਸਿੰਘ ਸੁਖਾਣਾ ਨੇ ਦਿੱਲੀ ਨਾਲ ਤਾਰਾਂ ਜੋੜੀ ਰੱਖੀਆਂ , ਕਿਉਂਕਿ ਗ੍ਰਹਿ ਵਿਭਾਗ ਨੇ ਮਨਾਹੀ ਨਹੀਂ ਸੀ ਕੀਤੀ ਸਗੋਂ ਪਾਕਿਸਤਾਨ ਤੋਂ ਆਉਣ ਵਾਲੇ ਕਲਾਕਾਰਾਂ ਦੀ ਪੜਤਾਲ ਚੱਲ ਰਹੀ ਸੀ ।ਸੰਤੋਖ ਦੀ ਹਿੰਮਤ ਨੇ ਤਰੀਕਾਂ ਬਦਲ ਕੇ ਗ੍ਰਹਿ ਵਿਭਾਗ ਤੋਂ ਮਨਜ਼ੂਰੀ ਲੈ ਲਈ , ਇਹ ਸੋਚਕੇ ਕਿ ਪਾਕਿਸਤਾਨ ਤੋਂ ਜੇ ਕੁਝ ਕਲਾਕਾਰ ਆ ਜਾਣ ਤਾਂ ਭਾਰਤ ਪਾਕਿ ਪੰਜਾਬੀ ਨਾਟ ਫੈਸਟੀਵਲ ਦਾ ਅਯੋਜਨ ਕਰ ਲਵਾਂਗੇ ,ਪਰ ਪਾਕਿਸਤਾਨੀ ਰੰਗਕਰਮੀਆਂ ਦੇ ਵੀਜ਼ੇ ਬਾਰੇ ਅਸੀਂ ਅਜੇ ਵੀ ਹਨੇਰੇ ਵਿਚ ਹੀ ਸਾਂ ਕਿ ਮਿਲੇਗਾ ਕਿ ਨਹੀਂ – ਪ੍ਰਬੰਧ ਕਰੀਏ ਕਿ ਨਾ । ਊਠ ਦੇ ਲਟਕਦੇ ਬੁੱਲ੍ਹ ਨੂੰ ਵੇਖ-ਵੇਖ ਅਸੀਂ ਕਈ ਦਿਨ ਟਪਾ ਦਿੱਤੇ ਅਸੀਂ ਉਮੀਦਾਂ ਗੁਆ, ਹੱਕ-ਹਾਰ ਕੇ ਇੱਕ ਵਾਰ ਫਿਰ ਆਪਣੇ ਆਪਣੇ ਕੰਮ ਲੱਗ ਗਏ। ਅਚਨਚੇਤ ਪਾਕਿਸਤਾਨ ਤੋਂ ਸ਼ਫੀਕ ਬੱਟ ਦਾ ਫੋਨ ਆ ਗਿਆ ਕਿ ਵੀਜ਼ਾ ਲੱਗ ਗਿਆ, ,ਵੀਜ਼ਾ ਸਿਰਫ਼ ਲੁਧਿਆਣੇ ਦਾ ਸੀ ਅਤੇ ਸਮਾਗਮ ਮਿਥੇ ਸਮੇਂ ਤੇ ਹੀ ਹੋਣਾ ਸੀ, ਜਿਸ ਵਿੱਚ ਸਿਰਫ਼ ਤਿੰਨ ਦਿਨ ਬਾਕੀ ਰਹਿ ਗਏ ਸਨ । ਹੁਣ ਵੱਡਾ ਸਵਾਲ ਅਤੇ ਫ਼ਿਕਰ ਇਹ ਸੀ ਕਿ ਕੀ ਤਿੰਨ ਦਿਨਾਂ ਵਿਚ ਅਸੀਂ ਸਾਰੇ ਪ੍ਰਬੰਧ ਕਰਕੇ ਇਹ ਚਾਰ ਦਿਨਾਂ ਸਮਾਗਮ ਕਰ ਲਵਾਂਗੇ – ਜੇਕਰ ਕਰ ਵੀ ਲਵਾਂਗੇ ਤਾਂ ਕਾਮਯਾਬ ਹੋਵਾਂਗੇ।ਗੁਜਰਾਂਵਾਲਾ ਗੁਰੂ ਨਾਨਕ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਟੈਕਨਾਲੋਜੀ ਦੇ ਕੋਆਰਡੀਨੇਟਰ ਪ੍ਰੋ ਗੁਣਵੰਤ ਸਿੰਘ ਦੂਆ, ਹਰਪਾਲ ਸਿੰਘ ਮਾਂਗਟ, ਅਸ਼ਵਨੀ ਚੈਟਲੇ ਹੋਰਾਂ ਨਾਲ ਸਲਾਹ ਕੀਤੀ , ਉਹਨਾਂ ਐਸਾ ਹੌਂਸਲਾ ਤੇ ਥਾਪੀ ਦਿੱਤੀ ਕਿ ਅਸੀਂ ਉਤਸ਼ਾਹ ਨਾਲ ਪ੍ਰਬੰਧਾਂ ਵਿੱਚ ਜੁਟ ਗਏ ।

ਪਾਕਿਸਤਾਨ ਤੋਂ ਪੰਜਾਬ ਲੋਕ ਸੁਜਾਗ, ਪੰਜਾਬ ਲੋਕ ਰਹਾਸ ਅਤੇ ਸੰਗਤ ਲਹੌਰ ਦੇ ਕਲਾਕਾਰਾਂ ਦਾ ਕਾਫ਼ਲਾ ਲੁਧਿਆਣਾ ਪਹੁੰਚ ਗਿਆ। ਪੰਜਾਬੀ ਨਾਟ ਅਕਾਦਮੀ ਦੇ ਚੇਅਰਮੈਨ ਸੰਤੋਖ ਸਿੰਘ ਸੁਖਾਣਾ ਇਸ ਕਾਫ਼ਲੇ ਨੂੰ ਅਟਾਰੀ ਤੋਂ ਲੈ ਕੇ ਆਏ। ਪਹਿਲੇ ਦਿਨ ਗੁਜਰਾਂਵਾਲਾ ਗੁਰੂ ਨਾਨਕ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਟੈਕਨਾਲੋਜੀ ਦੇ ਵਿਹੜੇ ਪ੍ਰਬੰਧਕੀ ਕਮੇਟੀ, ਅਧਿਆਪਕਾਂ, ਵਿਦਿਆਰਥੀਆਂ ਅਤੇ ਲੁਧਿਆਣਾ ਦੇ ਰੰਗਕਰਮੀਆਂ ਵਲੋਂ ਭਰਵਾਂ ਸਵਾਗਤ ਹੋਇਆ। ਇਹ ਦੁਪਿਹਰ ਪਾਕਿਸਤਾਨ ਅਤੇ ਭਾਰਤ ਦੇ ਪੰਜਾਬੀ ਰੰਗਕਰਮੀਆਂ ਨੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਸਾਬਕਾ ਉਪ ਕੁਲਪਤੀ ਡਾ. ਐਸ.ਪੀ.ਸਿੰਘ ਅਤੇ ਸਰਸਵਤੀ ਸਨਮਾਨ ਵਿਜੇਤਾ ਡਾ. ਸਰਜੀਤ ਪਾਤਰ ਦੀ ਅਗਵਾਈ ਹੇਠ ਉਦਘਾਟਨੀ ਸਮਾਗਮ ਦੇ ਰੂਪ ਵਿੱਚ ਸਾਂਝੀ ਕੀਤੀ ।ਨਾਟ ਨਿਰਦੇਸ਼ਕ ਅਤੇ ਲੇਖਕ ਡਾ. ਸ.ਨ. ਸੇਵਕ ਨੇ ਸਵਾਗਤੀ ਸ਼ਬਦਾਂ ਦੌਰਾਨ ਪੰਜਾਬੀ ਰੰਗਕਰਮੀਆਂ ਵਲੋਂ ਮਾਂ ਬੋਲੀ ਦੇ ਵਿਕਾਸ ਲਈ ਹੋ ਰਹੇ ਸਾਂਝੇ ਯਤਨਾਂ ਦੀ ਸ਼ਲਾਘਾ ਕੀਤੀ । ਪੰਜਾਬੀ ਨਾਟਕ ਅਤੇ ਰੰਗਮੰਚ ਦੇ ਇਤਿਹਾਸ ਨੂੰ ਦਾਦੀ ਨਾਨੀ ਦੀਆਂ ਕਾਹਣੀਆਂ ਵਾਂਗ ਚੇਤਿਆਂ ਚ’ ਵਸਾਕੇ ਰੱਖਣ ਵਾਲੇ ਡਾ. ਸਤੀਸ਼ ਵਰਮਾ ਨੇ ਆਪਣੇ ਮੁੱਖ-ਸੁਰ ਭਾਸ਼ਣ ਵਿਚ ਦੋਹਾਂ ਪੰਜਾਬਾਂ ਵਿੱਚ ਹੁੰਦੇ ਪੰਜਾਬੀ ਨਾਟਕ ਅਤੇ ਰੰਗ ਮੰਚ ਦੇ ਭੂਤ,ਵਰਤਮਾਨ ਅਤੇ ਭਵਿੱਖ ਤੇ ਖ਼ੂਬਸੂਰਤੀ ਨਾਲ ਵਿਚਾਰ ਰੱਖੇ ।ਡਾ. ਵਰਮਾ ਵੱਲੋਂ ਬਣਾਈ ਗਈ ਭੂਮਿਕਾ ਨੇ ਜਿਵੇਂ ਇਸ ਸਮਾਗਮ ਨੂੰ ਲੀਹੇ ਪਾ ਦਿੱਤਾ ।ਪਾਕਿਸਤਾਨ ਦੀ ਪ੍ਰਸਿੱਧ ਨਾਟ ਨਿਰਦੇਸ਼ਿਕਾ ਹੁਮਾ ਸਫ਼ਦਰ ਨੇ ‘ਰੀਤ ਦਾ ਥੀਏਟਰ ਅਤੇ ਥੀਏਟਰ ਦੀ ਰੀਤ’ ਖੋਜ ਪੇਪਰ ਵਿੱਚ ਵਾਰਿਸ ਸ਼ਾਹ ਦੀ ਹੀਰ ਦੇ ਦਸ ਬੰਦ ਲੈ ਕੇ ਐਸਾ ਵਿਸਲੇਸ਼ਨ ਕੀਤਾ ਕਿ ਜਿਵੇਂ ਸਾਹਮਣੇ ਹੀਰ ਰਾਂਝਾ ਨਾਟਕ ਖੇਡਿਆ ਜਾ ਰਿਹਾ ਹੋਵੇ ।ਇਕੱਲੇ ਇਕੱਲੇ ਬੰਦ ਦੀ ਹਰ ਲਾਈਨ ਨੂੰ ਥੀਏਟਰ ਨਾਲ ਜੋੜਨ ਦਾ ਅੰਦਾਜ਼ ਬਾਕਮਾਲ ਸੀ ।ਡਾ. ਐਸ.ਪੀ.ਸਿੰਘ ਨੇ ਕਿਹਾ ਕਿ ਸਮਾਜਕ ਸਰੋਕਾਰਾਂ ਪ੍ਰਤੀ ਸੁਚੇਤ ਗੱਲ ਕਰਨ ਲਈ ਰੰਗਮੰਚ ਸਾਰਥਿਕ ਪਲੇਟਫਾਰਮ ਹੈ ।ਉਹਨਾ ਕਿਹਾ ਕਿ ਦੋਹਾਂ ਪੰਜਾਬਾਂ ਦੀ ਸਾਂਝ ਨੂੰ ਵਧਾਉਣ ਵਿੱਚ ਰੰਗਕਰਮੀਆਂ ਦੀ ਭੂਮਿਕਾ ਸਲਾਹੁਣਯੋਗ ਹੈ ਇਸ ਤਰਾਂ ਦੇ ਸਾਂਝੇ ਫੈਸਟੀਵਲ ਹੋਣੇ ਚਾਹੀਦਾ ਹੈ।ਡਾ. ਸਰਜੀਤ ਪਾਤਰ ਨੇ ਕਿਹਾ ਕਿ ਪੰਜਾਬੀ ਨਾਟਕ ਅਤੇ ਰੰਗਮੰਚ ਸਥਾਪਤੀ ਵੱਲ ਵਧ ਰਿਹਾ ਹੈ ਅਤੇ ਨਵੀਆਂ ਤਕਨੀਕਾਂ ਨਾਲ ਸਾਡਾ ਰੰਗਮੰਚ ਲੋਕਾਂ ਦੇ ਨੇੜੇ ਹੋ ਰਿਹਾ ਹੈ। ਡਾ. ਪਾਤਰ ਨੇ ਕਿਹਾ ਕਿ ਰੰਗਮੰਚ ਸਾਰੀਆਂ ਸਾਹਿਤਕ ਵਿਦਾਵਾਂ ਦਾ ਸੁਮੇਲ ਹੋਣ ਕਰਕੇ ਵਧੇਰੇ ਪ੍ਰਭਾਵਸ਼ਾਲੀ ਹੈ ।ਸ਼ਾਮ ਨੂੰ ਗੁਜਰਾਂਵਾਲਾ ਗੁਰੂ ਨਾਨਕ ਖਾਲਸਾ ਕਾਲਜ ਦੇ ਆਡੀਟੋਰੀਅਮ ਵਿੱਚ ਹੁਮਾ ਸਫ਼ਦਰ ਦੀ ਨਿਰਦੇਸ਼ਨਾ ਵਿਚ ਨਜ਼ਮ ਹੁਸੈਨ ਸਈਅਦ ਦਾ ਨਾਟਕ ‘ਚੋਗ ਕਸੁੰਬੇ ਦੀ ’ ਪੇਸ਼ ਕੀਤਾ ਗਿਆ ।ਸੂਫ਼ੀ ਕਲਾਮ ‘ ਮੈਂ ਕਸੁੰਬੜਾ ਚੁਣ ਚੁਣ ਹਾਰੀ ’ ਨੂੰ ਅਧਾਰ ਬਣਾਕੇ ਮਿਹਨਤ ਅਤੇ ਵਪਾਰ ਦੇ ਸਬੰਧਾਂ ਨੂੰ ਦਰਸਾਂਉਦਾ ਇਹ ਨਾਟਕ ਕਸੁੰਬੇ ਦੇ ਕੱਚੇ ਰੰਗਾਂ ਵਾਲੇ ਫਲਾਂ ਦੇ ਪੱਕੇ ਵਪਾਰੀਆਂ ਦੀ ਸੋਚ ਨੂੰ ਠੋਕਰਦਾ ਹੈ , ਜਿਸ ਵਿੱਚ ਹੁਮਾ ਤੋਂ ਇਲਾਵਾ ਨੈਮਾ ਦੀਆ,ਆਈਸ਼ਾ ਅਲੀ , ਆਮਨਾ , ਫ਼ਰੀਦਾ , ਸਾਰਾ ਖ਼ਾਨ , ਨੇ ਅਹਿਮ ਭੂਮਿਕਾਵਾਂ ਨਿਭਾਈਆਂ ।

ਦੂਸਰੇ ਦਿਨ ਭਾਰਤੀ ਸਾਹਿਤ ਅਕਾਦਮੀ ਪੁਰਸਕਾਰ ਵਿਜੇਤਾ ਡਾ. ਆਤਮਜੀਤ ਦੀ ਪ੍ਰਧਾਨਗੀ ਹੇਠ ‘ਪੰਜਾਬੀ ਨਾਟਕ ਅਤੇ ਰੰਗਮੰਚ ਦੇ ਅੰਤਰਰਾਸ਼ਟਰੀ ਪਰਿਪੇਖ’ ਤੇ ਹੋਏ ਸੈਮੀਨਾਰ ਵਿੱਚ ਪੰਜਾਬ ਯੂਨੀਵਰਸਿਟੀ ਲਹੌਰ ਦੇ ਪੰਜਾਬੀ ਵਿਭਾਗ ਦੀ ਪ੍ਰਾਅਧਿਆਪਕਾ ਡਾ. ਆਸਮਾ ਕਾਦਰੀ ਨੇ ‘ਪੰਜਾਬੀ ਕਲਾਸਕੀ ਸ਼ਾਇਰੀ ਵਿਚ ਪੇਖਣ ਦੇ ਰੰਗ’ ਪੇਪਰ ਪੜਦਿਆਂ ਸ਼ਾਇਰੀ ਵਿੱਚਲੇ ਨਾਟਕੀ ਤੱਤਾਂ ਨੂੰ ਪੇਸ਼ ਕੀਤਾ ।ਡਾ. ਆਸਮਾ ਕਾਦਰੀ ਦਾ ਪੇਪਰ ਅਕਾਦਮਿਕ ਪੱਖ ਤੋਂ ਕਾਫੀ ਮੁਲਵਾਨ ਸੀ ,ਗੱਲ ਬਾਤ ਰੌਚਕ , ਸਪਸ਼ਟ ਉਚਾਰਨ ਅਤੇ ਅਵਾਜ਼ ਵਿੱਚ ਮਿਠਾਸ ਹੋਣ ਕਰਕੇ ਉਹ ਆਪਣਾ ਸੁਨੇਹਾ ਦੇਣ ਵਿੱਚ ਕਾਮਯਾਬ ਰਹੇ।ਪੰਜਾਬ ਯੂਨੀਵਰਸਿਟੀ ਲਾਹੌਰ ਤੋਂ ਹੀ ਦੂਸਰੇ ਪੰਜਾਬੀ ਪ੍ਰਾਅਧਿਆਪਕਾ ਡਾ. ਨਿੱਗਦ ਖ਼ੁਰਸ਼ੀਦ ਨੇ ‘ਅਜ਼ਾਦੀ ਤੋਂ ਬਾਅਦ ਦੇ ਪਾਕਿਸਤਾਨੀ ਪੰਜਾਬੀ ਨਾਟਕ’ ਬਾਰੇ ਆਪਣੇ ਖੋਜ ਪੇਪਰ ਵਿੱਚ ਲਹਿੰਦੇ ਪੰਜਾਬ ਵਿੱਚ ਹੁੰਦੇ ਰੰਗਮੰਚ ਦੀਆਂ ਪ੍ਰਾਪਤੀਆਂ ਅਤੇ ਘਾਟਾਂ ਦੀ ਗੱਲ ਬਾਤ ਕੀਤੀ ।ਦੋਹਾਂ ਪੰਜਾਬਾਂ ਦੀ ਮੁਹੱਬਤੀ ਚੜ੍ਹਦੀ ਕਲਾ ਲਈ ਜਨਾਬ ਆਸਿਫ਼ ਹੋਤ ਨੇ ‘ਪੰਜਾਬੀ ਏਕਤਾ’ ਵਿਸ਼ੇ ਤੇ ਗੱਲ ਬਾਤ ਕਰਦਿਆਂ ਕਿਹਾ ਕਿ ਮਾਂ ਬੋਲੀ ਪੰਜਾਬੀ ਇਸ ਏਕਤਾ ਵਿੱਚ ਅਹਿਮ ਭੂਮਿਕਾ ਨਿਭਾਅ ਰਹੀ ਹੈ। ਉਹਨਾਂ ਇਸ ਸਬੰਧੀ ਕਈ ਨੁਕਤਿਆਂ ਤੇ ਚਾਨਣਾ ਪਾਇਆ । ਰੰਗਸੰਗ ਦੇ ਸੰਪਾਦਕ ਡਾ. ਜਗਦੀਸ਼ ਗਰਗ ਨੇ ਭਾਰਤੀ ਪੰਜਾਬੀ ਰੰਗਮੰਚ ਦੇ ਇਤਹਿਾਸ ਨੂੰ ਫਰੋਲਿਆ ਜਦੋਂ ਕਿ ਗੁਰੂ ਗੋਬਿੰਦ ਸਿੰਘ ਕਾਲਜ ਕਮਾਲਪੁਰਾ ਦੇ ਪ੍ਰਿਸੀਪਲ ਡਾ. ਬਰਿੰਦਰਜੀਤ ਕੌਰ ਨੇ ‘ਲੋਕ ਨਾਟਕਾਂ ਰਾਹੀਂ ਪੰਜਾਬੀ ਸਭਿਆਚਾਰ ਦੀ ਪੇਸ਼ਕਾਰੀ’ ਖੋਜ਼ ਪੱਤਰ ਪੜਦਿਆਂ ਲੋਕ ਨਾਟ ਦੀਆਂ ਵੰਨਗੀਆਂ ਤੇ ਚਾਨਣਾ ਪਾਇਆ ।ਪ੍ਰਧਾਨਗੀ ਸੁਨੇਹੇ ਵਿੱਚ ਡਾ. ਆਤਮਜੀਤ ਨੇ ਕਿਹਾ ਕਿ ਰੰਗਕਰਮੀ ਦੀ ਮਿਹਨਤ ਅਤੇ ਕੰਮ ਪ੍ਰਤੀ ਦ੍ਰਿੜਤਾ ਹੀ ਉਸਦੀ ਜਾਇਦਾਦ ਹੈ ਉਹਨਾਂ ਕਿਹਾ ਲੋਕਾਂ ਦੀ ਗੱਲ ਲੋਕਾਂ ਦੀ ਜ਼ੁਬਾਨ ਵਿੱਚ ਕੀਤਿਆਂ ਹੀ ਅਸਰ ਹੁੰਦਾ ਹੈ ।ਸੰਤੋਖ ਸਿੰਘ ਸੁਖਾਣਾ ਦਾ ਮੱਤ ਸੀ ਰੰਗ ਕਰਮੀਆਂ ਨੂੰ ਉਤਸ਼ਾਹਿਤ ਕਰਨ ਲਈ ਸਰਕਾਰ ਵੱਲੋਂ ਸਹੂਲਤਾਂ ਅਤੇ ਉਪਰਾਲੇ ਹੋਣੇ ਚੲਹੀਦੇ ਹਨ ।ਭਾਰਤੀ ਪੰਜਾਬੀ ਨਾਟਕ ਅਤੇ ਰੰਗ ਮੰਚ ਦੇ ਸ਼ਾਹਅਸਵਾਰਾਂ ਵਿੱਚੋਂ ਕੇਵਲ ਧਾਲੀਵਾਲ, ਟੋਨੀ ਬਾਤਿਸ਼ , ਡਾ. ਸਾਹਿਬ ਸਿੰਘ,ਅਸ਼ਵਨੀ ਚੈਟਲੇ, ਨਿਰਮਲ ਰਿਸ਼ੀ ਅਤੇ ਤਰਲੋਚਨ ਸਿੰਘ ਨੇ ਇਨਾਂ ਦੋਹਾਂ ਦਿਨਾਂ ਦੀ ਚਰਚਾ ਵਿੱਚ ਵੱਖ ਵੱਖ ਪਹਿਲੂਆਂ ਤੇ ਆਪਣਾ ਆਪਣਾ ਪੱਖ ਪੇਸ਼ ਕੀਤਾ। ਡਾ. ਸ ਨ ਸੇਵਕ ਦੀ ਨਾਟ ਪੁਸਤਕ ‘ਦੁੱਲ੍ਹਾ’ (ਸ਼ਾਹਮੁਖੀ) ਤੇ ਸੋਮਪਾਲ ਹੀਰਾ ਦੀ ਨਾਟ ਪੁਸਤਕ ‘ਕਥਾ ਰੁੱਖਾਂ ਤੇ ਕੁੱਖਾਂ ਦੀ’ ਲੋਕ ਅਰਪਣ ਕੀਤੀਆਂ ਗਈਆਂ ।

ਸ਼ਾਮ ਵੇਲੇ ਸਈਅਦ ਸਾਹਿਬ ਦਾ ਦੂਸਰਾ ਨਾਟਕ ‘ਸੰਮੀ ਦੀ ਵਾਰ’ ਹੁਮਾ ਸਫਦਰ ਦੀ ਨਿਰਦੇਸ਼ਨਾ ਹੇਠ ਪੇਸ਼ ਕੀਤਾ ਗਿਆ ਜਿਸ ਵਿਚ ਕੈਸਰ ਆਬਾਸ ਅਤੇ ਉਜ਼ਮਾ ਮਤਲੂਬ ਦੀ ਅਦਾਕਾਰੀ ਕਮਾਲ ਦੀ ਸੀ । ਭਾਰਤੀ ਪੰਜਾਬੀ ਰੰਗਮੰਚ ਦੀ ਨਿਮਾਇੰਦਗੀ ਕਰਦਾ ਸੋਮਪਾਲ ਹੀਰਾ ਦਾ ਨਾਟਕ ‘ ਕਥਾ ਰੁੱਖਾਂ ਤੇ ਕੁੱਖਾਂ ਦੀ’ ਸਮੇਂ ਦਾ ਸੁਨੇਹਾ ਦਿੰਦਾ ਦਰਸ਼ਕਾਂ ਦੇ ਦਿਲੋ-ਦਿਮਾਗ਼ ਤੇ ਗਹਿਰਾ ਅਸਰ ਪਾਉਣ ਵਿੱਚ ਪੂਰੀ ਤਰਾਂ ਕਾਮਯਾਬ ਰਿਹਾ। ਗੁਜਰਾਂਵਾਲਾ ਗੁਰੂ ਨਾਨਕ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਟੈਕਨਾਲੋਜੀ ਦੇ ਵਿਦਿਆਰਥੀਆਂ ਵੱਲੋਂ ‘ਨੀਰ ਨਿਰੂਪਨ’ ਨਾਟਕ ਦੀ ਪੇਸ਼ਕਾਰੀ ਵੀ ਸਲਾਹੁਣਯੋਗ ਸੀ ।ਇਸ ਸ਼ਾਮ ਦੀ ਪ੍ਰਧਾਨਗੀ ਕਰਦਿਆਂ ਜਲੰਧਰ ਦੂਦਰਸ਼ਨ ਦੇ ਸੀਨੀਅਰ ਡਾਇਰੈਕਟਰ ਡਾ. ਦਲਜੀਤ ਸਿੰਘ ਨੇ ਕਿਹਾ ਕਿ ਜੇਕਰ ਅਸੀਂ ਆਪਣੀ ਨਜ਼ਰ ਅਸਮਾਨ ਵੱਲ ਰੱਖੀਏ ਤਾਂ ਸਭ ਹੱਦਾਂ ਸਰਹੱਦਾਂ ਖ਼ਤਮ ਹੋ ਜਾਂਦੀਆਂ ਹਨ ।

ਦੋਵੇਂ ਪਾਕਿਸਤਾਨੀ ਪੰਜਾਬੀ ਨਾਟਕ ਅਗਲੇ ਦੋ ਦਿਨਾਂ ਵਿਚ ਰਾਮਗੜੀਆ ਗਰਲਜ਼ ਕਾਲਜ ਵਿਚ ਵੀ ਪੇਸ਼ ਹੋਏ । ਨਾਟਕਾਂ ਦੀ ਭਾਸ਼ਾ ਕੇਂਦਰੀ ਪੰਜਾਬੀ ਸੀ ਪਰੰਤੂ ਅਦਾਕਾਰੀ ,ਬਲਾਕਿੰਗ ਅਤੇ ਦ੍ਰਿਸ਼ ਪੇਸ਼ਕਾਰੀ ਇਸ ਤਰਾਂ ਦੀ ਸੀ ਕਿ ਦਰਸ਼ਕਾਂ ਨੇ ਚਾਰੇ ਦਿਨ ਸਾਹ ਰੋਕ ਕੇ ਇਹ ਨਾਟਕ ਵੇਖੇ ਅਤੇ ਲੁਤਫ਼ ਲਿਆ। ਨਾਟ ਪੇਸ਼ਕਾਰੀਆਂ ਦੌਰਾਨ ਸ਼ਫਕਤ ਹੂਸੈਨ ਅਤੇ ਆਈਸ਼ਾ ਅਲੀ ਦੀ ਪਿੱਠ ਵਰਤੀ ਅਵਾਜ਼ ਅਤੇ ਸੰਗੀਤ ਨੇ ਸੋਨੇ ਤੇ ਸੁਹਾਗੇ ਦਾ ਕੰਮ ਕੀਤਾ । ਪਾਕਿਸਤਾਨੀ ਮਹਿਮਾਨ ਕਲਾਕਾਰਾਂ ਦੇ ਸਵਾਗਤ ਵਿੱਚ ਅਸ਼ਵਨੀ ਚੈਟਲੇ ਵੱਲੋਂ ਸਤਲੁਜ ਕਲੱਬ ਵਿਖੇ ਅਯੋਜਤ ਵਿਸ਼ੇਸ ਸਮਾਗਮ ਵਿੱਚ ਸੁਰਜੀਤ ਪਾਤਰ ਦੀ ਸ਼ਾਇਰੀ ਦੇ ਨਾਲ ਨਾਲ ਦੇਵ ਦਿਲਦਾਰ, ਸ਼ਫਕਤ ਹੂਸੈਨ ਅਤੇ ਆਈਸ਼ਾ ਅਲੀ ਦੀ ਸੋਹਜ ਅਵਾਜ਼ ਵਿੱਚ ਬੁੱਲ੍ਹੇ ਸ਼ਾਹ, ਸ਼ਾਹ ਹੁਸੈਨ ਦੀਆਂ ਕਾਫ਼ੀਆਂ ਅਤੇ ਵਾਰਿਸ ਦੀ ਹੀਰ ਦੇ ਗਾਇਨ ਨੇ ਖ਼ੂਬ ਰੰਗ ਜਮਾਇਆ ।ਪ੍ਰੋ ਗੁਣਵੰਤ ਸਿੰਘ ਦੂਆ ਵੱਲੋਂ ਘਰ ਵਿੱਚ ਕੀਤੀ ਮਹਿਮਾਨ ਨਿਵਾਜ਼ੀ ਦਾ ਅੰਦਾਜ਼ ਵੀ ਨਿਰਾਲਾ ਸੀ ਜਿਸਦਾ ਪਾਕਿਸਤਾਨੀ ਕਲਾਕਾਰਾਂ ਨੇ ਖ਼ੂਬ ਲੁਤਫ਼ ਲਿਆ ।

ਇਸ ਚਾਰ ਰੋਜ਼ਾ ਨਾਟਕ ਮੇਲੇ ਦਾ ਸਮਾਪਨ ਸਮਾਰੋਹ ਗੁਰੂ ਨਾਨਕ ਮੈਨੇਜਮੈਂਟ ਇੰਸਟੀਚਿਊਟ ਮਾਡਲ ਟਾਊਨ ਵਿਖੇ ਹੋਇਆ ਪੰਜਾਬੀ ਲੋਕ ਗਾਇਕ ਸਰਬਜੀਤ ਚੀਮਾ ਦੇ ਗੀਤਾਂ ਨੇ ਮਹੌਲ ਨੂੰ ਪੰਜਾਬੀਅਤ ਦਾ ਰੰਗ ਚੜਾਇਆ। ਦੋਹਾਂ ਮੁਲਕਾਂ ਦੇ ਕਲਾਕਾਰਾਂ ਵਲੋਂ ਸਾਂਝੇ ਤੌਰ ਤੇ ਤਿਆਰ ਕੀਤੀਆਂ ਸਟੇਜੀ ਪੇਸ਼ਕਾਰੀਆਂ ਸਿਖ਼ਰ ਹੋ ਨਿਬੜੀਆਂ।ਇਨਾਂ ਚਾਰ ਦਿਨਾਂ ਦੌਰਾਨ ਬਰਨਾਲਾ ਦੇ ਐਸ.ਐਸ.ਪੀ. ਸ. ਗੁਰਪ੍ਰੀਤ ਸਿੰਘ ਤੂਰ ਨੇ ਜੋ ਬਜ਼ੁਰਗਾਂ ਦੀਆਂ ਯਾਦਾਂ ਤਾਜ਼ਾ ਕੀਤੀਆਂ, ਦੇਸ਼ ਦੀ ਵੰਡ ਤੋਂ ਪਹਿਲਾਂ ਦੇ ਸੁਣੇ ਕਿੱਸੇ ਉਹਨਾਂ ਦੇ ਚਿਹਰਿਆਂ ਚੋਂ ਲੱਭਦਿਆਂ ਪਾਈਆਂ ਭਾਵੁਕ ਸਾਝਾਂ ਉਹ ਕਦੇ ਨਹੀਂ ਭੁੱਲਣਗੇ ।ਲੁਧਿਆਣਾ ਦੇ ਸਾਹਿਤਕਾਰਾਂ, ਰੰਗਕਰਮੀਆਂ ਅਤੇ ਸਾਹਿਤ ਪ੍ਰੇਮੀਆਂ ਨੇ ਆਪਣੀ ਹਾਜ਼ਰੀ ਨਾਲ ਇਸ ਨਾਟ ਮੇਲੇ ਨੂੰ ਬੇਹੱਦ ਮਾਣ ਬਖ਼ਸ਼ਿਆ।

ਸਾਨੂੰ ਪਤਾ ਈ ਨਹੀਂ ਲੱਗਿਆ ਕਿ ਚਾਰ ਦਿਨ ਕਿਵੇਂ ਬੀਤ ਗਏ …ਸਵੇਰ ਦੇ ਛੇ ਵਜੇ ਉਹ ਸਭ ਜਾਣ ਲਈ ਤਿਆਰ ਹੋਏ ਖੜ੍ਹੇ ਸਨ …..ਨਾਟ ਮੇਲੇ ਦੀ ਕਾਮਯਾਬੀ ਦਾ ਸਭ ਨੂੰ ਨਸ਼ਾ ਸੀ ,ਵਿਛੜਨ ਨੂੰ ਕਿਸੇ ਦਾ ਵੀ ਜੀਅ ਨਹੀਂ ਸੀ ਕਰਦਾ ਪਰ ਤੁਰਨਾ ਪੈਣਾ ਸੀ, ਤੇ ਤੋਰਨਾ ਪੈਣਾ ਸੀ, …..ਪੰਜਾਬੀ ਨਾਟਕ ਅਤੇ ਰੰਗਮੰਚ ਦੇ ਸੌ ਵਰ੍ਹੇ ਸਪੂਰਨ ਹੋਣ ਤੇ ਆਉਂਦੇ ਸਾਲ ਵੱਡੇ ਜਸ਼ਨ ਮਨਾਉਣ ਦੇ ਸੁਪਨੇ ਨਾਲ ਹਸਦੇ ਖੇਡਦੇ ਅਸੀਂ ਅਟਾਰੀ ਵੱਲ ਨੂੰ ਹੋ ਤੁਰੇ ਅਤੇ ਰਸਤੇ ਵਿੱਚ ਕੁਝ ਹੋਰ ਚੰਗਾ ਕਰਨ ਦੀਆਂ ਵਿਉਤਾਂ ਬਣਾਉਂਦੇ ਗਏ ਤਾਂ ਕਿ ਪੰਜਾਬੀ ਮਾਂ ਬੋਲੀ ਅਤੇ ਰੰਗਮੰਚ ਦਾ ਦੀਵਾ ਜਗਦਾ ਰਵ੍ਹੇ ।

ਹਰਚੰਦ ਸਿੰਘ ਬਾਗੜੀ ਦੇ ਮਹਾਂ-ਕਾਵਿ ‘ਕਿਸ ਬਿਧ ਲਈ ਆਜ਼ਾਦੀ ’ ਉੱਤੇ ਗੋਸ਼ਟੀ ਹੋਈ - ਰਿਪੋਰਟ

2011-04-24T17:01:00.000-07:00

ਰਿਪੋਰਟ: ਡਾ. ਭਗਵੰਤ ਸਿੰਘ ( ਪਟਿਆਲਾ, ਅਪ੍ਰੈਲ 2011 ) “ਪੂੰਜੀਵਾਦੀ ਵਿਸ਼ਵੀਕਰਨ ਅਮਰੀਕੀ ਸਾਮਰਾਜਵਾਦ ਦਾ ਸਿਖਰ ਹੈ। ਅੱਜ ਉਤਪਾਦਕੀ ਵਿਕਾਸ ਮਾਡਲ ਅਧੀਨ ਸੰਸਾਰ-ਮੰਡੀ ਅਤੇ ਤਕਨਾਲੋਜੀ ਨੇ ਸਿਰਜਾਨਾਤਮਕ ਵਿਕਾਸ ਮਾਡਲ ਨੂੰ ਨਿਗਲ਼ ਲਿਆ ਹੈ। ਖੱਪਤੀ ਸਭਿਆਚਾਰਕ ਉਸਾਰ ਨੇ ਕਿਰਤੀ ਸਭਿਆਚਾਰਕ ਕੀਮਤਾਂ ਦੀ ਨੈਤਿਕਤਾ ਨੂੰ ਹਾਸ਼ੀਏ ਉੱਤੇ ਧੱਕ ਦਿੱਤਾ ਹੈ”... ਇਹ ਵਿਚਾਰ ਕੇਂਦਰੀ ਪੰਜਾਬੀ ਲੇਖਕ ਸਭਾ (ਸੇਖੋਂ) ਰਜਿ. ਦੇ ਪ੍ਰਧਾਨ ਪ੍ਰਸਿੱਧ ਮਾਰਕਸਵਾਦੀ ਵਿਦਵਾਨ ਡਾ. ਤੇਜਵੰਤ ਮਾਨ ਨੇ ਮਾਲਵਾ ਰਿਸਰਚ ਸੈਂਟਰ, ਪਟਿਆਲਾ (ਰਜਿ.) ਅਤੇ ਅਦਾਰਾ ਜਾਗੋ ਇੰਟਰਨੈਸ਼ਨਲ ਵੱਲੋਂ ਹਰਚੰਦ ਸਿੰਘ ਬਾਗੜੀ ਦੇ ਮਹਾਂ ਕਾਵਿ ‘ਕਿਸ ਬਿਧ ਲਈ ਆਜ਼ਾਦੀ ’ ਉੱਤੇ ਨਿਰਮਲ ਪੰਚਾਇਤੀ ਅਖਾੜਾ ਪਟਿਆਲਾ ਵਿਖੇ ਕਰਵਾਈ ਗਈ ਵਿਚਾਰ ਚਰਚਾ ਨੂੰ ਸਮੇਟਿਆ ਆਪਣਾ ਪ੍ਰਧਾਨਗੀ ਭਾਸ਼ਣ ਦਿੰਦਿਆਂ ਕਹੇ। ਡਾ. ਤੇਜਵੰਤ ਮਾਨ ਨੇ ਕਿਸ ਬਿਧ ਲਈ ਆਜ਼ਾਦੀ ਉੱਤੇ ਬੋਲਦਿਆਂ ਕਿਹਾ ਕਿ ਬਾਗੜੀ ਜੀ ਨੇ ਗੁਰਮਤਿ ਵਿਚਾਰਧਾਰਾਂ ਨੂੰ ਅਮਲ ਵਿਚ ਲਿਆਉਣ ਵਾਲੇ ਸਿੱਖ ਨਾਇਕਾਂ ਨੂੰ ਕੇਂਦਰ ਵਿਚ ਰਖਕੇ ਮਨੁੱਖੀ ਆਜ਼ਾਦੀ ਲਈ ਕੀਤੀ ਗਈ ਜੱਦੋ-ਜਹਿਦ ਨੂੰ ਇਕ ਵਿਗਿਆਨਕ ਦ੍ਰਿਸ਼ਟੀਕੌਣ ਤੋਂ ਇਸ ਮਹਾਂ-ਕਾਵਿ ਵਿਚ ਵਿਸਤਰਿਤ ਰੂਪ ਵਿਚ ਪੇਸ਼ ਕੀਤਾ ਹੈ।

ਇਸ ਮਹਾਂਕਾਵਿ ਉੱਤੇ ਪਰਚਾ ਪੜ੍ਹਦਿਆਂ ਡਾ. ਅਮਰ ਕੋਮਲ ਨੇ ਬੜੇ ਵਿਦਵਤਾ ਪੂਰਨ ਢੰਗ ਨਾਲ ਮਹਾਂ-ਕਾਵਿ ਦੇ ਕਲਾਤਮਕ ਅਤੇ ਵਿਸ਼ੇ ਆਤਮਿਕ ਗੁਣਾਂ ਨੂੰ ਉਜਾਗਰ ਕਰਦਿਆਂ ਬਾਗੜੀ ਦੁਆਰਾ ਰਚੇ ਇਸ ਮਹਾਂ-ਕਾਵਿ ਨੂੰ ਪੰਜਾਬੀ ਮਹਾਂ-ਕਾਵਿ ਦੀ ਇਕ ਪ੍ਰਾਪਤੀ ਕਿਹਾ। ਪੇਪਰ ਉੱਤੇ ਵਿਚਾਰ ਚਰਚਾ ਕਰਦਿਆਂ ਪ੍ਰਸਿੱਧ ਵਿਦਵਾਨ ਅਤੇ ਚਿੰਤਕ ਡਾ. ਸਵਰਾਜ ਸਿੰਘ ਨੇ ਗੁਰਮਤਿ ਫ਼ਲਸਫ਼ੇ ਵਿਚਲੇ ਮਨਮੁਖ ਅਤੇ ਗੁਰਮੁਖ ਸੰਕਲਪਾਂ ਦੀ ਵਿਆਖਿਆ ਕੀਤੀ। ਡਾ. ਸਿੰਘ ਨੇ ਅਮਰੀਕੀ ਸਾਮਰਾਜ ਨੂੰ ਹੰਕਾਰੀ ਮਨਮੁਖ ਦਾ ਵਿਸ਼ੇਸ਼ਣ ਦਿੰਦਿਆ ਜ਼ੋਰ ਦੇ ਕੇ ਕਿਹਾ ਕਿ, “ਇਸ ਦਾ ਵਿਰੋਧ ਕਰਨ ਲਈ ਜ਼ਰੂਰੀ ਹੈ ਕਿ ਅਸੀਂ ਆਪਣੀ ਇਤਿਹਾਸਕ ਵਿਰਾਸਤ ਵਿਚੋਂ ਗੁਰਮੁਖ ਨਾਇਕਾਂ ਦੀ ਪਹਿਚਾਣ ਕਰੀਏ। ਬਾਗੜੀ ਹੁਰਾਂ ਨੇ ਇਹ ਮਹਾਂ-ਕਾਵਿ ਲਿਖਕੇ ਗੁਰਮੁਖ ਨਾਇਕਾਂ ਦੀ ਪਹਿਚਾਣ ਕੀਤੀ ਹੈ।”

ਵਿਚਾਰ ਚਰਚਾ ਵਿੱਚ ਪ੍ਰੋ. ਜੇ.ਕੇ. ਮਿਗਲਾਨੀ, ਡਾ. ਰਣਜੋਧ ਸਿੰਘ, ਸੁਖਪਾਲ ਸੋਹੀ, ਸੁਖਵਿੰਦਰ ਜ਼ਨਾਲ, ਸੰਤ ਹਰੀ ਸਿੰਘ, ਡਾ. ਰਮਿੰਦਰ, ਡਾ. ਜਸਬੀਰ, ਡਾ. ਸ਼ੇਰ ਸਿੰਘ, ਡਾ. ਭਗਵੰਤ ਸਿੰਘ, ਜਗਦੀਪ ਸਿੰਘ, ਸੰਦੀਪ, ਹਰਦਿਆਲ ਸਿੰਘ ਚੀਮਾ, ਪ੍ਰੋ. ਸ਼ਰਮਾ, ਸੁਖਮਿੰਦਰ ਸੇਖੋਂ, ਕੁਲਵੰਤ ਸਿੰਘ, ਜਗਜੀਤ ਸਿੰਘ ਅਤੇ ਜੋਗਿੰਦਰ ਸਿੰਘ ਨੇ ਕਈ ਸੁਆਲ ਖੜ੍ਹੇ ਕੀਤੇ।

ਇਸ ਵਿਚਾਰ ਚਰਚਾ ਵਿਚੋਂ ਮਹਾਰਾਜਾ ਰਣਜੀਤ ਸਿੰਘ ਤੇ ਅੰਗਰੇਜ਼ੀ ਸਾਮਰਾਜ ਵਿਚ 1809 ਦੀ ਸੰਧੀ ਬਾਰੇ ਕਈ ਨੁਕਤੇ ਉਭਰੇ। ਇਨ੍ਹਾਂ ਨੁਕਤਿਆਂ ਨੂੰ ਗੁਰਮਤਿ ਦੇ ਨਜ਼ਰੀਏ ਤੋਂ ਵਿਚਾਰਿਆ ਗਿਆ। ਗੁਰਮਤਿ ਅਨੁਸਾਰ ਹੱਕ ਸੱਚ ਲਈ ਜੂਝਣਾ ਹੈ ਨਾ ਕਿ ਸਮਰਪਣ ਕਰਨਾ। ਇਹ ਗੋਸ਼ਟੀ ਬਹੁਤ ਸਾਰਥਿਕ ਤੇ ਉਸਾਰੂ ਸੰਵਾਦ ਸਿਰਜ ਗਈ। ਇਸ ਮੌਕੇ ਤੇ ਸੁਖਪਾਲ ਸੋਹੀ, ਗੁਰਵਿੰਦਰ ਸਿੰਘ ਕਮਾਲਪੁਰ, ਡਾ. ਅਮਰ ਕੋਮਲ, ਪਰਮਿੰਦਰ ਕੌਰ ਬਾਗੜੀ, ਕੁਲਵੰਤ ਸਿੰਘ, ਸੁਖਵਿੰਦਰ ਜਨਾਲ, ਡਾ. ਰਣਜੋਧ ਸਿੰਘ ਆਦਿ ਅਨੇਕਾਂ ਸ਼ਾਇਰਾਂ ਨੇ ਆਪਣੀਆਂ ਰਚਨਾਵਾਂ ਸੁਣਾਈਆਂ। ਸਮੁੱਚੇ ਰੂਪ ਵਿੱਚ ਇਹ ਵਿਚਾਰ ਗੋਸ਼ਟੀ, ਪੰਜਾਬੀਅਤ ਦੀ ਮਸਲੇ ਨੂੰ ਉਭਾਰਨ ਲਈ ਆਧਾਰਕ ਸਮੱਗਰੀ ਮੁਹੱਈਆ ਕਰਾਉਣ ਦਾ ਸਾਰਥਿਕ ਉਪਰਾਲਾ ਹੋ ਨਿਬੜੀ।

ਡਾ. ਭਗਵੰਤ ਸਿੰਘ ਜਨਰਲ ਸਕੱਤਰ ਮਾਲਵਾ ਰਿਸਰਚ ਸੈਂਟਰ ਨੇ ਸੁਹਜਮਈ ਢੰਗ ਨਾਲ ਸੰਚਾਲਨਾ ਕਰਦੇ ਹੋਏ ਬਹਿਸ ਨੂੰ ਸਿਖਰ ਤੇ ਪਹੁੰਚਾਇਆ ਤੇ ਆਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਨਿਰਮਲ ਡੇਰਾ ਧਰਮਧਜਾ ਬਾਬਾ ਹਰੀ ਸਿੰਘ, ਸੰਤ ਰਵੀਸ਼ੇਰ ਸਿੰਘ ਉਤਰਾਂਚਲ ਬਾਬਾ ਸੰਤਾ ਸਿੰਘ ਨੇ ਮਾਲਵਾ ਰਿਸਰਚ ਸੈਂਟਰ ਪਟਿਆਲਾ ਅਤੇ ਅਖਾੜੇ ਦੀ ਤਰਫ਼ੋਂ ਹਰਚੰਦ ਸਿੰਘ ਬਾਗੜੀ, ਪਰਮਿੰਦਰ ਬਾਗੜੀ, ਡਾ. ਸਵਰਾਜ ਸਿੰਘ, ਡਾ. ਤੇਜਵੰਤ ਮਾਨ, ਡਾ. ਅਮਰ ਕੋਮਲ ਨੂੰ ਸਨਮਾਨਿਤ ਕੀਤਾ।

ਡਾ.ਜਲੌਰ ਸਿੰਘ ਖੀਵਾ ਦੀ ਪੁਸਤਕ ‘ਪੰਜਾਬੀ ਸਭਿਆਚਾਰ :‘ਰਿਸ਼ਤਿਆਂ ਦੀ ਸੰਬਾਦਿਕਤਾ’‘ਤੇ ਵਿਚਾਰ ਗੋਸ਼ਟੀ - ਰਿਪੋਰਟ

2011-04-11T19:56:00.001-07:00

ਰਿਪੋਰਟ: ਡਾ. ਨਿਰਮਲ ਜੌੜਾ: - ਗੁਜਰਾਂਵਾਲਾ ਗੁਰੁ ਨਾਨਕ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਟੈਕਨਾਲੋਜੀ ਵਿਚ ਬਾਬਾ ਫਰੀਦ ਫਾਊਂਡੇਸ਼ਨ ਇੰਟਰਨੈਸ਼ਨਲ ਅਤੇ ਯੂਥ ਸਭਿਆਚਾਰਕ ਲੋਕ ਹਿਤੈਸ਼ੀ ਮੰਚ ਵਲੋਂ ਪੰਜਾਬੀ ਦੇ ਉੱਘੇ ਵਿਦਵਾਨ ਡਾ. ਜਲੌਰ ਸਿੰਘ ਖੀਵਾ ਦੀ ਅਲੋਚਨਾ ਪੁਸਤਕ ‘ਪੰਜਾਬੀ ਸਭਿਆਚਾਰ : ਰਿਸ਼ਤਿਆਂ ਦੀ ਸੰਬਾਦਿਕਤਾ ‘ ਤੇ ਵਿਚਾਰ ਗੋਸ਼ਟੀ ਹਿਤ ਹੋਏ ਸਮਾਗਮ ਤੇ ਸਰਸਵਤੀ ਸਨਮਾਨ ਵਿਜੇਤਾ ਡਾ. ਸੁਰਜੀਤ ਪਾਤਰ ਨੇ ਕਿਹਾ ਕਿ ਰਿਸ਼ਤਿਆਂ ਦੀ ਪਵਿੱਤਰਤਾ ਹੀ ਮਨੁੱਖਤਾ ਦਾ ਆਧਾਰ ਹੈ ਅਤੇ ਹਰ ਰਿਸ਼ਤੇ ਦੀ ਆਪਣੀ ਮਹੱਤਤਾ ਹੈ ਇਸ ਲਈ ਸਾਨੂੰ ਰਿਸ਼ਤਿਆਂ ਦਾ ਸਤਿਕਾਰ ਕਰਨਾ ਚਾਹੀਦਾ ਹੈ । ਡਾ. ਪਾਤਰ ਨੇ ਕਿਹਾ ਕਿ ਅਸੀਂ ਸਹਿਜ-ਸੁਭਾਅ ਅਸੀਂ ਇਕ ਦੂਜੇ ਨੂੰ ਜਿਨਾਂ ਰਿਸ਼ਤਿਆਂ ਨਾਲ ਬੁਲਾਉਂਦੇ ਹਾਂ ਉਹਨਾਂ ਬਾਰੇ ਇਸ ਪੁਸਤਕ ਵਿਚੋਂ ਗਹਿਰਾ ਗਿਆਨ ਮਿਲਦਾ ਹੈ । ਉਹਨਾਂ ਕਿਹਾ ਕਿ ਜੇ ਰਿਸ਼ਤਿਆਂ ਦੇ ਅਰਥ ਪਤਾ ਹੋਣ ਤਾਂ ਇਨਾਂ ਨੂੰ ਵਰਤਣ ਦਾ ਲੁਤਫ਼ ਵੱਖਰਾ ਹੰਦਾ ਹੈ ।

ਗੁਰੁ ਨਾਨਕ ਦੇਵ ਯੂਨੀਵਰਸਿਟੀ ਦੇ ਸਾਬਕਾ ਉਪ ਕੁਲਪਤੀ ਡਾ. ਐਸ.ਪੀ.ਸਿੰਘ ਨੇ ਕਿਹਾ ਕਿ ਡਾ. ਖੀਵਾ ਨੇ ਇਸ ਨਾਜ਼ਕ ਵਿਸ਼ੇ ਤੇ ਖੋਜ ਕਰਨ ਦੀ ਪਹਿਲਕਦਮੀ ਕੀਤੀ ਹੈ। ਇਸ ਪੁਸਤਕ ਵਿਚਲੇ ਵਿਸ਼ਿਆਂ ਤੇ ਅਧਿਐਨ ਕਰਦਿਆਂ ਡਾ. ਐਸ.ਪੀ.ਸਿੰਘ ਕਿਹਾ ਕਿ ਅਧਿਆਪਕ ਅਤੇ ਵਿਦਿਆਰਥੀ ਦਾ ਰਿਸ਼ਤਾ ਮਨੁੱਖੀ ਵਿਕਾਸ ਵਿਚ ਉੱਤਮ ਅਤੇ ਸੁੱਚਾ ਹੈ। ਪੰਜਾਬੀ ਸਾਹਿਤ ਅਕਾਦਮੀ ਦੇ ਪ੍ਰਧਾਨ ਪ੍ਰੋ. ਗੁਰਭਜਨ ਗਿੱਲ ਨੇ ਰਿਸ਼ਤਿਆਂ ਦੀ ਗੁਆਚ ਰਹੀ ਮਹਿਕ ਨੂੰ ਬਚਾਉਣਾ ਸਾਡਾ ਪਹਿਲਾ ਧਰਮ ਹੈ। ਉਹਨਾਂ ਪੰਜਾਬੀ ਗੀਤ ਸੰਗੀਤ ਅਤੇ ਹੋਰ ਲਿਖਤਾਂ ਵਿਚ ਰਿਸ਼ਤਿਆਂ ਦੀ ਹੋ ਰਹੀ ਦੁਰਗਤੀ ਨੂੰ ਭਵਿੱਖ ਲਈ ਬੇਹੱਦ ਖ਼ਤਰਨਾਕ ਕਿਹਾ । ਵਿਸ਼ਵ ਪੰਜਾਬੀ ਸਭਿਆਚਾਰਕ ਮੰਚ ਦੇ ਪ੍ਰਧਾਨ ਸ. ਜਗਦੇਵ ਸਿੰਘ ਜੱਸੋਵਾਲ ਨੇ ਕਿਹਾ ਕਿ ਡਾ. ਖੀਵਾ ਦੀ ਇਹ ਪੁਸਤਕ ਆਉਣ ਵਾਲੀਆਂ ਪੀੜੀਆਂ ਲਈ ਤੋਹਫ਼ਾ ਹੋਵੇਗੀ । ਰਿਸ਼ਤਿਆਂ ਨੂੰ ਆਪਣੇ ਗੀਤਾਂ ਚ ਪਰੋਕੇ ਪੇਸ਼ ਕਰਨ ਵਾਲੇ ਨਿਵੇਕਲੇ ਗਾਇਕ ਪਾਲੀ ਦੇਤਵਾਲੀਆ ਨੇ ਸੁਹਜ ਭਰੀ ਆਵਾਜ਼ ਅਤੇ ਅੰਦਾਜ਼ ਵਿਚ ‘ਪੁਤਾਂ ਨੂੰ ਜਿਉਣ ਜੋਗੇ ਕਹਿਣ ਵਾਲਿੳ ਧੀਆਂ ਨੂੰ ਵੀ ਕਿਹਾ ਕਰੋ ਜਿਉਣ ਜੋਗੀਆਂ‘ ਗੀਤ ਪੇਸ਼ ਕਰਕੇ ਮਾਹੌਲ ਨੂੰ ਹੋਰ ਸੰਜੀਦਾ ਕੀਤਾ ।

ਪੰਜਾਬੀ ਦੇ ਉੱਘੇ ਵਿਦਵਾਨ ਡਾ. ਸ.ਨ.ਸੇਵਕ ਦੇ ਸਵਾਗਤੀ ਸ਼ਬਦਾਂ ਉਪਰੰਤ ਸਮਾਗਮ ਵਿਚ ਹਾਜ਼ਿਰ ਸਾਹਿਤ ਪ੍ਰੇਮੀਆਂ ਨਾਲ ਪੁਸਤਕ ਸਬੰਧੀ ਵਿਚਾਰ ਕਰਦਿਆਂ ਗੁਰੂ ਗੋਬਿੰਦ ਸਿੰਘ ਗਰਲਜ਼ ਕਾਲਜ ਕਮਾਲਪੁਰਾ ਦੇ ਪ੍ਰਿੰਸੀਪਲ ਡਾ. ਬਰਿੰਦਰਜੀਤ ਕੌਰ ਦਾ ਮੱਤ ਸੀ ਡਾ. ਖੀਵਾ ਨੇ ਮਨੁੱਖੀ ਰਿਸ਼ਤਿਆਂ ਦੀ ਤਹਿਸੀਰ ਨੂੰ ਸਫ਼ਲਤਾ ਨਾਲ ਫਰੋਲਿਆ ਹੈ । ਆਪਣੇ ਖੋਜ ਪੱਤਰ ਵਿਚ ਖਾਲਸਾ ਕਾਲਜ ਫਾਰ ਵਿਮੈਨ ਦੇ ਪੰਜਾਬੀ ਪ੍ਰਾਅਧਿਆਪਕ ਡਾ. ਪਰਮਜੀਤ ਕੌਰ ਪਾਸੀ ਨੇ ਪੁਸਤਕ ਦੇ ਸਹਿ ਵਿਸ਼ਿਆਂ ਦਾ ਬਾਖ਼ੂਬੀ ਨਾਲ ਵਿਸ਼ਲੇਸ਼ਣ ਕੀਤਾ ਅਤੇ ਕੁਮਾਰ ਜਗਦੇਵ ਸਿੰਘ ਨੇ ਡਾ. ਜਲੌਰ ਸਿੰਘ ਖੀਵਾ ਦੀ ਪੁਸਤਕ ਦੇ ਨਾਲ ਨਾਲ ਸ਼ਖ਼ਸੀਅਤ ਅਤੇ ਸਾਹਿਤਕ ਜੀਵਨ ਯਾਤਰਾ ਤੇ ਚਾਨਣਾ ਪਾਉਂਦਿਆਂ ਡਾ. ਖੀਵਾ ਨੂੰ ਜ਼ਿੰਦਗੀ ਦਾ ਕਰਮਯੋਗੀ ਕਿਹਾ ।ਪੁਸਤਕ ਅਤੇ ਖੋਜ ਪੱਤਰਾਂ ਤੇ ਹੋਈ ਉਸਾਰੂ ਚਰਚਾ ਵਿਚ ਡਾ. ਸ.ਨ.ਸੇਵਕ, ਡਾ. ਸੁਖਦੇਵ ਸਿੰਘ , ਸ. ਚੰਦ ਸਿੰਘ ਸਦਿਉੜਾ ਕੈਨੇਡਾ , ਜਸਵੰਤ ਜ਼ਫ਼ਰ, ਡਾ. ਗੁਲਜ਼ਾਰ ਪੰਧੇਰ ,ਰਮਣੀਕ ਕੌਰ ਅਤੇ ਸੁਖਦੇਵ ਮਾਦਪੁਰੀ ਨੇ ਆਪਣੇ ਆਪਣੇ ਵਿਚਾਰ ਪੇਸ਼ ਕੀਤੇ । ਫਾਊਂਡੇਸ਼ਨ ਦੇ ਚੇਅਰਮੈਨ ਪ੍ਰੀਤਮ ਸਿੰਘ ਭਰੋਵਾਲ ਅਤੇ ਮੰਚ ਦੇ ਪ੍ਰਧਾਨ ਸ. ਸੰਤੋਖ ਸਿੰਘ ਸੁਖਾਣਾ ਨੇ ਪ੍ਰੋ.ਖੀਵਾ ਅਤੇ ਪ੍ਰਧਾਨਗੀ ਮੰਡਲ ਵਿਚ ਸ਼ਾਮਿਲ ਸ਼ਖ਼ਸੀਅਤਾਂ ਦਾ ਸਨਮਾਨ ਕੀਤਾ।

ਖੋਜ ਪੱਤਰਾਂ ਅਤੇ ਵਿਦਵਾਨਾਂ ਦੇ ਵਿਚਾਰਾਂ ਦੇ ਪ੍ਰਤੀਕਰਮ ਵਜੋਂ ਬੋਲਦਿਆਂ ਡਾ. ਜਲੌਰ ਸਿੰਘ ਖੀਵਾ ਨੇ ਕਿਹਾ ਕਿ ਬਚਪਨ ਤੋਂ ਹੁਣ ਤੱਕ ਜੋ ਕੁਝ ਤਨ ਮਨ 'ਤੇ ਹੰਢਾਇਆ ਹੈ ਉਸਦਾ ਗੁੱਭ-ਗੁਹਾਟ ਇਸ ਪੁਸਤਕ ਦੇ ਰੂਪ ਵਿਚ ਤੁਹਾਡੇ ਸਾਹਮਣੇ ਹੈ। ਡਾ. ਖੀਵਾ ਨੇ ਕਿਹਾ ਰਿਸ਼ਤਿਆਂ ਵਿਚਲੀ ਮਹਿਕ ਅਤੇ ਦੁਰਗੰਧ ਦਾ ਸੁਮੇਲ ਮੇਰੇ ਹੱਡਾਂ ਵਿਚ ਰਚਿਆ ਹੈ ਜਿਸ ਨੂੰ ਮੈਂ ਉਮਰ ਭਰ ਤਨ-ਮਨ ਤੇ ਹੰਢਾਇਆ ਹੈ ,ਆਉਣ ਵਾਲੇ ਸਮੇਂ ਵਿਚ ਸਭ ਬੰਦਿਸ਼ਾਂ ਨੂੰ ਤੋੜਕੇ ਲੋਕ ਅਰਪਣ ਕਰ ਦੇਵਾਂਗਾ । ਇਸ ਵਿਚਾਰ ਗੋਸ਼ਟੀ ਵਿਚ ਪੰਜਾਬੀ ਦੇ ਉੱਘੇ ਵਿਦਵਾਨ , ਸਾਹਿਤਕਾਰ, ਵੱਖ ਵੱਖ ਕਾਲਜਾਂ ਦੇ ਪੰਜਾਬੀ ਪ੍ਰਾਅਧਿਆਪਕਾਂ ਤੋਂ ਇਲਾਵਾ ਭਾਰੀ ਗਿਣਤੀ ਵਿਚ ਸਾਹਿਤ-ਪ੍ਰੇਮੀ ਹਾਜ਼ਿਰ ਸਨ।ਪ੍ਰੋ. ਗੁਣਵੰਤ ਸਿੰਘ ਦੂਆ ਨੇ ਡਾ: ਖੀਵਾ ,ਪ੍ਰਧਾਨਗੀ ਮੰਡਲ ਅਤੇ ਹਾਜ਼ਰੀਨ ਦਾ ਧੰਨਵਾਦ ਕੀਤਾ।

ਅਦਾਰਾ ਜਾਗੋ ਇੰਟਰਨੈਸ਼ਨਲ ਅਤੇ ਭਾਸ਼ਾ ਵਿਭਾਗ, ਪੰਜਾਬ ਵੱਲੋਂ ਬੀ.ਐਸ. ਰਤਨ ਦੀ ਪੁਸਤਕ “ਕਿੱਤੂਰ ਦੀ ਰਾਣੀ ਚਾਨੰਮਾ” ਤੇ ਗੋਸ਼ਟੀ - ਰਿਪੋਰਟ

2011-03-25T15:15:00.000-07:00

ਫੋਟੋ ਕੈਪਸ਼ਨ - 1. ਮੰਚ ‘ਤੇ ਡਾ. ਤੇਜਵੰਤ ਮਾਨ, ਸ੍ਰੀਮਤੀ ਹਰਭਜਨ ਕੌਰ ਐਡੀਸ਼ਨਲ ਡਾਇਰੈਕਟਰ, ਡਾ. ਸਵਰਾਜ ਸਿੰਘ, ਸ੍ਰੀਮਤੀ ਬਲਬੀਰ ਕੌਰ, ਡਾਇਰੈਕਟਰ ਭਾਸ਼ਾ ਵਿਭਾਗ, ਪੰਜਾਬ, ਸ੍ਰੀ ਬੀ.ਐਸ. ਰਤਨ ਡਾ. ਭਗਵੰਤ ਸਿੰਘ 2. ਸ੍ਰੀ ਬੀ.ਐਸ. ਰਤਨ ਨੂੰ ਸਨਮਾਨਿਤ ਕਰਦੇ ਹੋਏ ਸ੍ਰੀਮਤੀ ਬਲਬੀਰ ਕੌਰ, ਡਾਇਰੈਕਟਰ ਭਾਸ਼ਾ ਵਿਭਾਗ, ਪੰਜਾਬ, ਡਾ. ਸਵਰਾਜ ਸਿੰਘ, ਪ੍ਰੋ. ਸ਼ੇਰ ਸਿੰਘ ਢਿਲੋਂ, ਡਾ. ਤੇਜਵੰਤ ਮਾਨ, ਸ੍ਰੀਮਤੀ ਹਰਭਜਨ ਕੌਰ, ਬਾਬਾ ਹਰੀ ਸਿੰਘ, ਡਾ. ਭਗਵੰਤ ਸਿੰਘ

******

ਰਿਪੋਰਟ: ਡਾ. ਭਗਵੰਤ ਸਿੰਘ

ਪਟਿਆਲਾ : ਮਾਰਚ 2011- “ਇਤਿਹਾਸ ਭਾਵੇਂ ਜੇਤੂਆਂ ਦਾ ਹੁੰਦਾ ਹੈ ਪਰੰਤੂ ਕਈ ਵਾਰੀ ਦੁਨੀਆਵੀ ਤੌਰ ਤੇ ਹਾਰ ਜਾਣ ਵਾਲੀ ਧਿਰ ਵੀ ਆਪਣੀ ਬੇਮਿਸਾਲ ਬਹਾਦਰੀ ਅਤੇ ਦਲੇਰੀ ਦੀ ਇਤਿਹਾਸ ਤੇ ਅਜਿਹੀ ਛਾਪ ਛੱਡ ਜਾਂਦੀ ਹੈ ਕਿ ਉਸਦਾ ਜੀਵਨ ਸੰਘਰਸ਼ ਆਉਣ ਵਾਲੀਆ ਪੀੜ੍ਹੀਆਂ ਲਈ ਪ੍ਰੇਰਨਾ ਸਰੋਤ ਬਣ ਜਾਂਦਾ ਹੈ। ਅਜਿਹਾ ਹੀ ਬਹਾਦਰ ਰਾਣੀ ਚਾਨੰਮਾ, ਰਾਣੀ ਲਕਸ਼ਮੀ ਬਾਈ ਮਹਾਰਾਣੀ ਜਿੰਦਾਂ ਦੇ ਕਿਰਦਾਰਾਂ ਤੋ ਉਭਰਦਾ ਹੈ। ਭਾਰਤ ਵਿਚ ਉਤਰੀ ਖਿੱਤੇ ਦੇ ਲੋਕ ਨਾਇਕਾਂ ਬਾਰੇ ਦੱਖਣ ਵਿਚ ਅਤੇ ਦੱਖਣੀ ਖਿੱਤੇ ਦੇ ਲੋਕ ਨਾਇਕਾਂ ਬਾਰੇ ਉੱਤਰ ਵਿਚ ਬਹੁਤ ਘੱਟ ਜਾਣਕਾਰੀ ਹੈ। ਇਸ ਜਾਣਕਾਰੀ ਦੀ ਘਾਟ ਦੇ ਕਾਰਨਾ ਬਾਰੇ ਖੋਜ ਕਰਨ ਦੀ ਜ਼ਰੂਰਤ ਹੈ। ਬੀ.ਐਸ. ਰਤਨ ਨੇ ਕਾਵਿ ਸਿਰਜਣਾ ਕਰਕੇ ਪੰਜਾਬੀ ਸਾਹਿਤ ਨੂੰ ਦੱਖਣੀ ਲੋਕ ਨਾਇਕਾਂ ਤੋਂ ਜਾਣੂੰ ਕਰਾਉਣ ਦੀ ਪਹਿਲ ਕਦਮੀ ਕੀਤੀ ਹੈ। ਇਹ ਇਕ ਇਤਿਹਾਸਕ ਦਸਤਾਵੇਜ਼ ਹੈ ਜਿਸੱ ਬਹੁਤ ਹੀ ਸੁਹਜਮਈ ਢੰਗ ਨਾਲ ਪੇਸ਼ ਕਰਕੇ ਲੇਖਕ ਨੇ ਆਪਣੀ ਕਾਵਿ ਕੌਸ਼ਲਤਾ ਦਾ ਪ੍ਰਗਟਾਵਾ ਕੀਤਾ ਹੈ। ਅਜਿਹੇ ਯਤਨਾਂ ਦਾ ਪੰਜਾਬੀ ਸਾਹਿਤ ਜਗਤ ਵਿਚ ਸੁਆਗਤ ਹੈ। ਇਹ ਭਾਵ ਮਾਲਵਾ ਰਿਸਰਚ ਸੈਂਟਰ ਪਟਿਆਲਾ ਤੇ ਅਦਾਰਾ ਜਾਗੋ ਇੰਟਰਨੈਸ਼ਨਲ ਵਲੋਂ ਭਾਸ਼ਾ ਵਿਭਾਗ, ਪੰਜਾਬ ਦੇ ਸਹਿਯੋਗ ਨਾਲ ਬੀ.ਐਸ. ਰਤਨ ਦੀ ਪੁਸਤਕ “ਕਿੱਤੂਰ ਦੀ ਰਾਣੀ ਚਾਨੰਮਾ” ਉਪਰ ਹੋਈ ਗੋਸ਼ਟੀ ਸਮੇਂ ਵਿਦਵਾਨਾਂ, ਚਿੰਤਕਾਂ ਅਤੇ ਲੇਖਕਾਂ ਦੁਆਰਾ ਰਚਾਏ ਗਏ ਸੰਵਾਦ ਉਪਰੰਤ ਉੱਭਰ ਕੇ ਸਾਹਮਣੇ ਆਏ।

-----

ਭਾਸ਼ਾ ਭਵਨ ਵਿਖੇ ਆਯੋਜਿਤ ਗੋਸ਼ਟੀ ਦੀ ਪ੍ਰਧਾਨਗੀ ਭਾਸ਼ਾ ਵਿਭਾਗ ਦੇ ਡਾਇਰੈਕਟਰ ਸ੍ਰੀਮਤੀ ਬਲਬੀਰ ਕੌਰ ਨੇ ਕੀਤੀ, ਪੁਸਤਕ ਉਪਰ ਪਰਚਾ ਡਾ. ਸਵਰਾਜ ਸਿੰਘ ਯੂ.ਐਸ.ਏ. ਨੇ ਪੜ੍ਹਿਆ ਤੇ ਬਹਿਸ ਦਾ ਸਾਰੰਸ਼ ਡਾ. ਤੇਜਵੰਤ ਮਾਨ ਨੇ ਕੀਤਾ ਜਦਕਿ ਪਰਚੇ ਉੱਪਰ ਨਿਠਕੇ ਹੋਈ ਬਹਿਸ ਵਿਚ ਸ੍ਰ. ਚੇਤਨ ਸਿੰਘ, ਪ੍ਰੋ. ਸ਼ਰਮਾ, ਪ੍ਰੋ. ਸ਼ੇਰ ਸਿੰਘ ਢਿੱਲੋਂ, ਜੋਗਿੰਦਰ ਪ੍ਰਵਾਨਾ, ਡਾ. ਭਗਵੰਤ ਸਿੰਘ, ਡਾ. ਹਰਨੇਕ ਸਿੰਘ ਡਾ. ਤੇਜਾ ਸਿੰਘ ਤਿਲਕ ਸੁਰਜੀਤ ਸਿੰਘ ਪੰਛੀ ਆਦਿ ਨੇ ਹਿੱਸਾ ਲਿਆ। ਸੁਰਜੀਤ ਪਾਪੜਾ, ਜਸਵੀਰ ਸਿੰਘ ਵੇਰਕਾ ਤੇ ਕਵਿੱਤਰੀ ਸਰਬਜੀਤ ਜੱਸ ਨੇ ਕਵਿਤਾਵਾਂ ਪੇਸ਼ ਕੀਤੀਆਂ।

-----

ਡਾ. ਸਵਰਾਜ ਸਿੰਘ ਨੇ ਪੇਪਰ ਪੇਸ਼ ਕਰਦੇ ਹੋਏ ਰਾਣੀ ਚਾਨੰਮਾਂ ਦੇ ਕਿਰਦਾਰ ਅਤੇ ਪੁਸਤਕ ਦੇ ਸਾਹਿਤਕ ਪਹਿਲੂਆਂ ਨੂੰ ਉਭਾਰਿਆ। ਉਨ੍ਹਾਂ ਨੇ ਕਿਹਾ ਕਿ ਸਾਨੂੰ ਪਹਿਲੀ ਵਾਰ ਦੱਖਣੀ ਭਾਰਤ ਦੇ ਇਤਿਹਾਸਕ ਪਾਤਰਾਂ ਤੋਂ ਜਾਣੂ ਕਰਾ ਕੇ ਬੀ.ਐਸ. ਰਤਨ ਨੇ ਪੰਜਾਬੀ ਸਾਹਿਤਕ ਜਗਤ ਦਾ ਘੇਰਾ ਹੋਰ ਮੋਕਲ਼ਾ ਕੀਤਾ ਹੈ। ਉਨ੍ਹਾਂ ਨੇ ਸੰਸਾਰੀਕਰਨ ਦੇ ਦ੍ਰਿਸ਼ਟੀਕੋਣ ਤੋਂ “ਰਾਣੀ ਚਾਨੰਮਾਂ ” ਦੇ ਕਿਰਦਾਰ ਨੂੰ ਰੋਲ ਮਾਡਲ ਬਣਾ ਕੇ ਪੇਸ਼ ਕੀਤਾ। ਉਨਾ ਕਿਹਾ ਕਿ ਅਜ ਵੀ ਇਹੋ ਜਿਹੇ ਕਿਰਦਾਰਾਂ ਦੀ ਜ਼ਰੂਰਤ ਹੈ ਤਾਂ ਜੋ ਸਾਮਰਾਜੀ ਤਾਕਤਾਂ ਦੀ ਧੌਂਸ ਨੂੰ ਰੋਕਿਆ ਜਾ ਸਕੇ। ਸ. ਚੇਤਨ ਸਿੰਘ ਸੰਯੁਕਤ ਡਾਇਰੈਕਟਰ ਨੇ ਮਾਲਵਾ ਰਿਸਰਚ ਸੈਂਟਰ ਦੇ ਕਾਰਜ ਦੀ ਸ਼ਲਾਘਾ ਕਰਦੇ ਹੋਵੇ ਕਿਹਾ ਕਿ ਪੰਜਾਬੀ ਸਾਹਿਤ ਦੀ ਬਹਮੁੱਲੀ ਤੇ ਬਹਗੁਣੀ ਪੁਸਤਕ ਉਪਰ ਸੰਵਾਦ ਸਿਰਜਕੇ ਸੈਂਟਰ ਨੇ ਨਵੀ ਪਿਰਤ ਪਾਈ ਹੈ। ਉਨਾ ਨੇ ਪੁਸਤਕ ਦੇ ਸੁਹਜਾਤਮਕ ਪੱਖ ਬਾਰੇ ਸਿਧਾਂਤਕ ਗੱਲਾਂ ਕੀਤੀਆਂ। ਡਾ. ਤੇਜਵੰਤ ਮਾਨ ਨੇ ਪੁਸਤਕ ਉੱਪਰ ਹੋਈ ਬਹਿਸ ਨੂੰ ਸਮੇਟਦਿਆਂ ਕਿਹਾ ਕਿ ਇਹ ਸਾਮਰਾਜੀ ਤਾਕਤਾਂ ਦੀ ਸਾਜ਼ਿਸ਼ ਸੀ ਕਿ ਉੱਤਰੀ ਅਤੇ ਦੱਖਣੀ ਖਿਤਿਆਂ ਨੂੰ ਇਕਸੁਰ ਨਹੀਂ ਹੋਣ ਦਿਤਾ। ਉਨ੍ਹਾਂ ਨੇ ਆਪਣੇ ਸਵਾਰਥਾਂ ਲਈ ਇਨ੍ਹਾਂ ਨੂੰ ਵੰਡ ਕੇ ਰੱਖਿਆ ਹੈ। ਬੀ.ਐਸ. ਰਤਨ ਨੇ ਦੱਖਣ ਦੀ ਬਹਾਦਰ ਔਰਤ ਬਾਰੇ ਕਾਵਿ ਰਚਨਾ ਕਰਕੇ ਪੰਜਾਬੀ ਦੇ ਲੇਖਕਾਂ ਦੀ ਅਗਵਾਈ ਕੀਤੀ ਹੈ। ਇਸ ਤਰ੍ਹਾਂ ਹੀ ਦੱਖਣੀ ਲੇਖਕਾਂ ਨੂੰ ਪੰਜਾਬੀ ਲੋਕ ਨਾਇਕਾਂ ਬਾਰੇ ਰਚਨਾਵਾਂ ਰਚਣੀਆਂ ਚਾਹੀ ਦੀਆਂ ਹਨ। ਗਣਰਾਜੀ ਏਕਤਾ ਨੂੰ ਉਜਾਗਰ ਕਰਨ ਲਈ ਅਜਿਹੀਆਂ ਗੋਸ਼ਟੀਆਂ ਬਹੁਤ ਸਹਾਈ ਹੋ ਸਕਦੀਆਂ ਹਨ।

-----

ਸ੍ਰੀਮਤੀ ਬਲਬੀਰ ਕੌਰ ਡਾਇਰੈਕਟਰ ਭਾਸ਼ਾ ਵਿਭਾਗ ਕੇ ਆਪਣੇ ਪ੍ਰਧਾਨਗੀ ਭਾਸ਼ਣ ਵਿਚ ਬੀ.ਐਸ.ਰਤਨ ਦੀ ਸੁਹਜਮਈ ਪੁਸਤਕ ਨੂੰ ਪੰਜਾਬੀ ਸਾਹਿਤ ਵਿਚ ਇਤਿਹਾਸਕ ਦਸਤਾਵੇਜ਼ ਦੱਸਿਆ। ਉਨ੍ਹਾਂ ਹੋਈ ਬਹਿਸ ਉੱਪਰ ਟਿੱਪਣੀ ਕਰਦਿਆਂ ਕਿਹਾ ਕਿ ਇਸ ਨਾਲ ਰਾਸ਼ਟਰੀ ਏਕਤਾ ਦੀ ਮਜਬੂਤੀ ਵਿਚ ਇਕ ਨਵਾ ਅਧਿਆਇ ਜੁੜ ਗਿਆ ਹੈ। ਇਸ ਗੋਸ਼ਟੀ ਵਿਚ ਹੋਰ ਚਿੰਤਕਾਂ ਤੋ ਇਲਾਵਾ ਡਾ. ਰਾਕੇਸ਼ ਵਰਮਾ, ਪ੍ਰੋ. ਜੇ ਕੇ ਮਿਗਲਾਨੀ, ਡਾ. ਗੁਰਮੁਖ ਸਿੰਘ, ਡਾ. ਬਲਜਿੰਦਰ ਜੋਸ਼ੀ, ਗੁਲਜ਼ਾਰ ਸਿੰਘ ਸ਼ੌਂਕੀ, ਧਰਮ ਕੰਮੇਆਣਾ ਸ੍ਰੀਮਤੀ ਪ੍ਰਿਤਪਾਲ ਕੌਰ, ਸ੍ਰੀਮਤੀ ਹਰਭਜਨ ਕੌਰ ਵਧੀਕ ਡਾਇਰੈਕਟਰ, ਸ੍ਰੀਮਤੀ ਕਮਲਜੀਤ ਕੌਰ, ਬਾਬਾ ਹਰੀ ਸਿੰਘ ਨਿਰਮਲ ਅਖਾੜਾ, ਚਰਨ ਬੰਬੀਹਾ, ਸੁਰਿੰਦਰ ਕੌਰ ਮਿਸ ਸ਼ੈਲਜਾ, ਅਲੀ ਰਾਜਪੁਰਾ, ਡਾ. ਮੋਹਨ ਤਿਆਗੀ, ਮੇਘ ਰਾਜ ਆਦਿ ਅਨੇਕਾਂ ਬੁੱਧੀਜੀਵੀ ਹਾਜ਼ਿਰ ਸਨ। ਇਸ ਸਮਾਗਮ ਵਿਚ ਬੀ.ਐਸ. ਰਤਨ ਨੇ ਆਪਣੀ ਕਵਿਤਾ ਦੇ ਪ੍ਰਭਾਵਾਸ਼ਾਲੀ ਅੰਸ਼ਾਂ ਨੂੰ ਪ੍ਰਸਤੁਤ ਕੀਤਾ। ਉਨ੍ਹਾਂ ਨੇ ਇਸ ਪੁਸਤਕ ਦੇ ਪਿਛੋਕੜ ਨੂੰ ਵੀ ਬਿਆਨ ਕੀਤਾ। ਉਨ੍ਹਾਂ ਇਤਿਹਾਸਕ ਤੱਥਾਂ ਬਾਰੇ ਵੀ ਜਾਣਕਾਰੀ ਪਾਈ ਦਿੱਤੀ। ਮਾਲਵਾ ਰਿਸਰਚ ਸੈਂਟਰ, ਪਟਿਆਲਾ ਵਲੋਂ ਬੀ.ਐਸ. ਰਤਨ ਨੂੰ ਸਨਮਾਨ ਪੱਤਰ ਭੇਂਟ ਕੀਤਾ। ਪ੍ਰੋ. ਸ਼ੇਰ ਸਿੰਘ ਦਿਲ ਨੇ ਜੀ ਆਇਆਂ ਕਿਹਾ ਤੇ ਡਾ. ਭਗਵੰਤ ਸਿੰਘ ਨੇ ਮੰਚ ਸੰਚਾਲਨਾ ਕੀਤੀ।

ਓਕਨਆਗਨ ਪੰਜਾਬੀ ਸੱਥ ਵਰਨਨ ਵੱਲੋਂ ਪਾਲ ਢਿੱਲੋਂ ਦਾ ਗ਼ਜ਼ਲ-ਸੰਗ੍ਰਹਿ ਸਰੀ ‘ਚ ਰਿਲੀਜ਼ ਕੀਤਾ ਗਿਆ - ਰਿਪੋਰਟ

2010-09-21T20:14:00.000-07:00

ਸਰੀ:- (ਜਰਨੈਲ ਸਿੰਘ ਸੇਖਾ) ਓਕਨਆਗਨ ਪੰਜਾਬੀ ਸੱਥ ਵਰਨਨ ਵੱਲੋਂ 18 ਸਤੰਬਰ, 10 ਨੂੰ ਪਰੋਗ੍ਰੈਸਿਵ ਕਲਚਰਲ ਸੈਂਟਰ ਸਰੀ ਵਿਖੇ ਇਕ ਸਾਹਿਤਕ ਸਮਾਗਮ ਕਰਵਾਇਆ ਗਿਆ ਜਿਸ ਵਿਚ ਫਰੇਜ਼ਰ ਵੈਲੀ ਤੇ ਓਕਨਆਗਨ ਵੈਲੀ ‘ਚੋਂ ਆਏ ਪੰਜਾਬੀ ਲੇਖਕਾਂ ਦੀ ਭਰਵੀਂ ਸ਼ਮੂਲੀਅਤ ਸੀ।

----

ਪਹਿਲੇ ਸੈਸ਼ਨ ਦੇ ਪਰਧਾਨਗੀ ਮੰਡਲ ਵਿਚ ਡਾਕਟਰ ਦਰਸ਼ਨ ਗਿੱਲ, ਹੈਰੀ ਬੈਂਸ ਅਤੇ ਪਾਲ ਢਿੱਲੋਂ ਸ਼ਾਮਲ ਹੋਏ. ਸਟੇਜ ਦੀ ਕਾਰਵਾਈ ਮੋਹਨ ਗਿੱਲ ਨੇ ਨਿਭਾਈ। ਸਭ ਤੋਂ ਪਹਿਲਾਂ ਮੋਹਨ ਗਿੱਲ ਨੇ ਓਕਨਆਗਨ ਪੰਜਾਬੀ ਸੱਥ ਦੇ ਕਨਵੀਨਰ ਛਿੰਦਾ ਢਿੱਲੋਂ ਨੂੰ ਸੱਦਾ ਦਿੱਤਾ ਕਿ ਉਹ ਦੂਰੋਂ ਨੇੜਿਉਂ ਆਏ ਸਾਹਿਤਕਾਰਾਂ ਤੇ ਸਾਹਿਤ ਪ੍ਰੇਮੀਆਂ ਨੂੰ ਜੀਅ ਆਇਆਂ ਕਹਿਣ। ਛਿੰਦਾ ਢਿੱਲੋਂ ਦੇ ਹਾਸੇ ਤੇ ਮਜ਼ਾਹੀਆ ਲਹਿਜ਼ੇ ਵਿਚ 'ਜੀਅ ਆਇਆਂ' ਕਹਿਣ ਮਗਰੋਂ ਮੋਹਣ ਗਿੱਲ ਨੇ ਵਰਨਨ ਦੇ ਨਾਮਵਰ ਗ਼ਜ਼ਲਗੋ ਪਾਲ ਢਿੱਲੋਂ ਦੇ ਸਾਹਿਤਕ ਸਫ਼ਰ ਦੀ ਜਾਣਕਾਰੀ ਦੇ ਕੇ ਡਾਕਟਰ ਦਰਸ਼ਨ ਗਿੱਲ ਨੂੰ ‘ਖੰਨਿਓਂ ਤਿੱਖਾ ਸਫਰ’ ਉਪਰ ਪਰਚਾ ਪੜ੍ਹਨ ਲਈ ਬੇਨਤੀ ਕੀਤੀ।

-----

ਡਾ: ਗਿੱਲ ਨੇ ਪੁਸਤਕ ਉਪਰ ਗੱਲ ਕਰਦਿਆਂ ਕਿਹਾ ਕਿ ਪਾਲ ਢਿੱਲੋਂ ਨੇ ਗ਼ਜ਼ਲ ਜਿਹੀ ਔਖੀ, ਇਕੋ ਇਕ ਵਿਧਾ ਨੂੰ ਅਪਣਾਇਆ ਹੈ। ਹੋਰ ਕਲਾਵਾਂ ਵਾਂਗ ਸ਼ਾਇਰੀ ਵੀ ਇਕ ਕਲਾ ਹੈ ਤੇ ਕਲਾ ਸਾਧਨਾ ਮੰਗਦੀ ਹੈ। ਢਿੱਲੋਂ ਇਕ ਸਾਧਕ ਸ਼ਾਇਰ ਹੈ. ਡਾ: ਗਿੱਲ ਨੇ ਪੁਸਤਕ ਵਿਚੋਂ ਵੱਖ ਵੱਖ ਰੰਗਾਂ ਦੇ ਸ਼ਿਅਰ ਸੁਣਾ ਕੇ ਕਿਹਾ ਕਿ ਇਹੋ ਕਾਰਨ ਹੈ ਜੋ ਢਿੱਲੋਂ ਦੀ ਗ਼ਜ਼ਲ ਵਿਚ ਪਰਪੱਕਤਾ ਆਈ ਹੈ। ਢਿੱਲੋਂ ਕੁਦਰਤ ਤੇ ਲੋਕਤਾ ਦਾ ਯਥਾਰਥਵਾਦੀ ਸ਼ਾਇਰ ਹੈ। ਗੁਰਦਰਸ਼ਨ ਬਾਦਲ ਨੇ ਆਪਣੇ ਪਰਚੇ ਵਿਚ ਦੱਸਿਆ ਕਿ ਢਿੱਲੋਂ ਨੂੰ ਗ਼ਜ਼ਲ ਦੇ ਬਹਿਰਾਂ ਦੀ ਬਹੁਤ ਸੂਝ ਹੈ ਤੇ ਉਸ ਦਾ ਹਰਮਨ ਪਿਆਰਾ ਬਹਿਰ ‘ਹਜ਼ਜ’ ਹੈ। ਨਦੀਮ ਪਰਮਾਰ ਨੇ ਢਿੱਲੋਂ ਦੀ ਗ਼ਜ਼ਲ ਦੀ ਕਲਾ ਤੇ ਬਣਤਰ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਗ਼ਜ਼ਲਕਾਰ ਨਹੀਂ ਗ਼ਜ਼ਲਗੋ ਹੁੰਦਾ ਹੈ। ਗ਼ਜ਼ਲ ਲਿਖੀ ਨਹੀਂ ਜਾਂਦੀ ਗ਼ਜ਼ਲ ਕਹੀ ਜਾਂਦੀ ਹੈ। ਗ਼ਜ਼ਲ ਵਿਧਾ ਵਿਚ ਉਸਤਾਦਾਂ ਨੇ 65 ਗੁਣ ਤੇ 32 ਐਬ ਦੱਸੇ ਹਨ, ਇਸ ਲਈ ਗ਼ਜ਼ਲ ਲਿਖਦਿਆਂ ਬੰਦਸ਼ ਦੇ ਨਾਲ ਕਈ ਵਾਰ ਖੁੱਲ੍ਹ ਵੀ ਲੈ ਲਈ ਜਾਂਦੀ ਹੈ ਪਰ ਇਹ ਖੁੱਲ੍ਹਾਂ ਸਦੀਵੀ ਨਹੀਂ ਹੁੰਦੀਆਂ। ਜਰਨੈਲ ਸਿੰਘ ਸੇਖਾ ਨੇ ਢਿੱਲੋਂ ਦੀਆਂ ਪੁਸਤਕਾਂ ਦੇ ਨਾਵਾਂ ਰਾਹੀਂ ਢਿੱਲੋਂ ਦੀ ਸ਼ਾਇਰੀ ਦੇ ਸਫਰ ਦੀ ਗੱਲ ਕੀਤੀ ਅਤੇ ਵਾਕ ਲੈਣ ਵਾਂਗ ਪੁਸਤਕ ਖੋਲ੍ਹ ਕੇ ਇਕ ਗ਼ਜ਼ਲ ਪੜ੍ਹੀ ਤੇ ਦੱਸਿਆ ਕਿ ਪੁਸਤਕ ਵਿਚੋਂ ਕਿਤੋਂ ਵੀ ਕੋਈ ਗ਼ਜ਼ਲ ਪੜ੍ਹ ਲਈ ਜਾਵੇ, ਸਭ ਗ਼ਜ਼ਲਾਂ ਹੀ ਉੱਚ ਪਾਏ ਦੀਆਂ ਹਨ।

------

ਉਸ ਤੋਂ ਮਗਰੋਂ ਤਾੜੀਆਂ ਦੀ ਗੂੰਜ ਵਿਚ ਪਾਲ ਢਿੱਲੋਂ ਦੀ ਪੁਸਤਕ ‘ਖੰਨਿਓਂ ਤਿੱਖਾ ਸਫਰ’ ਨੂੰ ਸਰੋਤਿਆਂ ਦੇ ਸਨਮੁਖ ਕੀਤਾ ਗਿਆ. ਪੁਸਤਕ ਰਿਲੀਜ਼ ਕਰਨ ਮਗਰੋਂ ਹੈਰੀ ਬੈਂਸ ਐਮ.ਐਲ.ਏ. ਨੇ ਆਪਣੇ ਪ੍ਰਧਾਨਗੀ ਭਾਸ਼ਨ ਵਿਚ ਕਿਹਾ ਕਿ ਸਾਹਿਤਕਾਰ ਦੇਸ਼ ਦੀ ਤਰੱਕੀ ਵਿਚ ਬੜਾ ਵੱਡਾ ਯੋਗਦਾਨ ਪਾ ਰਹੇ ਹਨ। ਜੱਸ ਢਿੱਲੋਂ, ਸੁਪਤਨੀ ਪਾਲ ਢਿੱਲੋਂ, ਨੇ ਵੀ ਕੁਝ ਸ਼ਬਦ ਪਾਲ ਢਿੱਲੋਂ ਬਾਰੇ ਕਹੇ। ਇਸ ਸੈਸ਼ਨ ਦੇ ਅੰਤ ‘ਤੇ ਪਾਲ ਢਿੱਲੋਂ ਨੇ ਆਪਣੀ ਨਵੀਂ ਪੁਸਤਕ ਵਿਚੋਂ ਕੁਝ ਗ਼ਜਲ਼ਾਂ ਸਰੋਤਿਆਂ ਨਾਲ ਸਾਂਝੀਆਂ ਕੀਤੀਆਂ।

-----

ਚਾਹ ਪਾਣੀ ਪੀਣ ਮਗਰੋਂ ਦੂਜਾ ਸੈਸ਼ਨ ਕਵੀ ਦਰਬਾਰ ਦੇ ਰੂਪ ਵਿਚ ਆਰੰਭ ਹੋਇਆ, ਜਿਸ ਦੀ ਪ੍ਰਧਾਨਗੀ ਨਦੀਮ ਪਰਮਾਰ ਤੇ ਪਾਲ ਢਿੱਲੋਂ ਨੇ ਕੀਤੀ। ਇਸ ਵਾਰ ਵੀ ਸਟੇਜ ਦੀ ਕਾਰਵਾਈ ਮੋਹਣ ਗਿੱਲ ਨੇ ਨਿਭਾਈ। ਉਸ ਸੂਚਨਾ ਹਿਤ ਦੱਸਿਆ ਕਿ 28 ਸਤੰਬਰ ਨੂੰ ਸ਼ਾਮ 6:30 ਵਜੇ ਜਾਰਜ ਮੈਕੀਅ ਲਾਇਬ੍ਰੇਰੀ ਡੈਲਟਾ ਵਿਚ ਜਰਨੈਲ ਸਿੰਘ ਸੇਖਾ ਦਾ ਕਹਾਣੀ ਪਾਠ, ਹਰਭਜਨ ਮਾਂਗਟ ਤੇ ਜਤਿੰਦਰ ਦਾ ਕਵਿਤਾ ਪਾਠ ਹੋਵੇਗਾ। 9 ਅਕਤੂਬਰ ਨੂੰ ਬਿਲ ਪਰਫਾਰਮਿੰਗ ਸੈਂਟਰ ਸਰੀ ਵਿਚ 12।30 ਵਜੇ ਤਰਕਸੀਲ ਮੇਲਾ ਹੋਵੇਗਾ। ਮੋਹਣ ਗਿੱਲ ਦੀ ਖ਼ੂਬੀ ਇਹ ਸੀ ਕਿ ਉਹ ਹਰ ਬੁਲਾਰੇ ਦੇ ਸਟੇਜ ‘ਤੇ ਆਉਣ ਤੋਂ ਪਹਿਲਾਂ ਪਾਲ ਢਿੱਲੋਂ ਦੀ ਨਵੀਂ ਪੁਸਤਕ ਵਿਚੋਂ ਕੁਝ ਸ਼ਿਅਰ ਸਰੋਤਿਆਂ ਨੂੰ ਸੁਣਾ ਦਿੰਦਾ ਸੀ।

-----

ਪਹਿਲੀ ਕਵਿਤਾ ‘ਜ਼ਿੰਮੇਵਾਰੀ’ ਇੰਦਰਜੀਤ ਸਿੰਘ ਧਾਮੀ ਨੇ ਪੜ੍ਹੀ ਜਿਹੜੀ ਔਰਤ ਦੇ ਪਰਵਾਸ ਦੀ ਗੱਲ ਕਰਦੀ ਸੀ। ਓਕਨਆਗਨ ਵੈਲੀ ਦੇ ਸ਼ਹਿਰ ਕੈਸਲਗਾਰ ‘ਚੋਂ ਆਏ ਕਵੀ ਪਰਮਜੀਤ ਗਿੱਲ ਨੇ ‘ਅੱਗ’ ਦਾ ਗੀਤ ਗਾ ਕੇ ਸੁਣਾਇਆ ਇਹ ਗੀਤ ਵੀ ਔਰਤ ਦੇ ਪਰਵਾਸ ਦੀ ਤਰਜਮਾਨੀ ਕਰਦਾ ਸੀ। ਬਿੱਕਰ ਸਿੰਘ ਖੋਸਾ ਨੇ ਢਿੱਲੋਂ ਦੀ ਕਵਿਤਾ ‘ਇਕ ਖ਼ਤ ਲਿਖੀਂ’ ਦੀ ਗੱਲ ਕਰਕੇ ਇਕ ਗ਼ਜ਼ਲ ਸੁਣਾਈ ‘ਵੱਡੇ ਘਰਾਂ ਦੇ ਵੱਡੇ ਵਿਹੜੇ, ਦਿਲ ਦੇ ਵਿਹੜੇ ਤੰਗ ਘਰਾਂ ਵਿਚ।’

-----

ਪਰਮਿੰਦਰ ਸਵੈਚ ਦੀ ਕਵਿਤਾ ‘ਹਿੰਦਸੇ’ ਦਸਦੀ ਸੀ ਕਿ ਅਜੋਕਾ ਮਨੁੱਖ ਹਿੰਦਸਿਆਂ ਦੀ ਭੀੜ ਵਿਚ ਗੁੰਮ ਹੋ ਕੇ ਰਹਿ ਗਿਆ ਹੈ। ਫਿਰ ਦਰਸ਼ਨ ਸੰਘਾ ਨੇ ਆਪਣੀਆਂ ਵਿਅੰਗਾਤਮਿਕ ਬੋਲੀਆਂ ਸੁਣਾ ਕੇ ਸਰੋਤਿਆਂ ਨੂੰ ਹੱਸਣ ਲਈ ਮਜਬੂਰ ਕਰ ਦਿੱਤਾ. ਦਵਿੰਦਰ ਪੂਨੀਆ ਨੇ ਆਪਣੀ ਫਲਾਸਫਾਨਾ ਗ਼ਜ਼ਲ ਸੁਣਾਈ. ਸੁਰਜੀਤ ਮਾਧੋਪੁਰੀ ਨੇ ਆਪਣੀ ਬੁਲੰਦ ਅਵਾਜ਼ ਵਿਚ ਇਕ ਗੀਤ ਸੁਣਾ ਕੇ ਪਾਲ ਢਿੱਲੋਂ ਦੀ ਇਕ ਗ਼ਜ਼ਲ ਤਰੰਨੁਮ ਵਿਚ ਸੁਣਾਈ। ਅੰਗ੍ਰੇਜ਼ ਬਰਾੜ ਦੀਆਂ ਬੋਲੀਆਂ ਪੰਜਾਬੀਆਂ ਦੇ ਮਾਣ ਦੀ ਗੱਲ ਕਰਦੀਆਂ ਸਨ। ਪ੍ਰਿਤਪਾਲ ਸਿੰਘ ਗਿੱਲ ਨੇ ਕਵਿਤਾ ਸੁਣਾਉਣ ਥਾਂ ਪਾਲ ਢਿੱਲੋਂ ਦੀ ਸ਼ਾਇਰੀ ਵਿਚ ਕੁਝ ਬੋਲ ਬੋਲੇ. ਨਾਲ ਹੀ ਉਸ ਨੇ 26 ਸਤੰਬਰ ਦੀ ਸ਼ਾਮ ਨੂੰ ਬੰਬੇ ਬੈਂਕੁਇਟ ਹਾਲ ਵਿਚ ਰੋਪੜ ਨਿਵਾਸੀਆਂ ਦੇ ਸਮਾਗਮ ਵਿਚ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ।

-----

ਦਲਜੀਤ ਕਲਿਆਣਪੁਰੀ ਦੀਆਂ ਰੁਬਾਈਆਂ ਵਿਚ ਉਸ ਦੇ ਬੋਲਾਂ ਜਿਹੀ ਹੀ ਖਣਕ ਸੀ। ਚਰਨ ਸਿੰਘ ਵਿਰਦੀ ਨੇ ਪਾਲ ਢਿੱਲੋਂ ਦੀ ਗ਼ਜ਼ਲ ਵਿਚ ਸੰਜਮ, ਸਤੁੰਲਨ ਤੇ ਸੰਤੋਖ ਦੀ ਗੱਲ ਕਰਨ ਮਗਰੋਂ ਆਪਣੀ ਨਜ਼ਮ ‘ਤੇਰੇ ਰੰਗ ਵਰਗਾ’ ਸੁਣਾ ਕੇ ਰੰਗ ਬੰਨ੍ਹਿਆ। ਭੂਪਿੰਦਰ ਮੱਲ੍ਹੀ ਨੇ ਦੱਸਿਆ ਕਿ ਪਾਲ ਢਿੱਲੋਂ ਦੀ ਗ਼ਜ਼ਲ ਵਿਸ਼ੇ ਤੇ ਖ਼ਿਆਲ ਪੱਖੋਂ ਪਰਪੱਕ ਹੈ। ਉਹਨਾਂ 26 ਸਤੰਬਰ ਨੂੰ ਬੰਬੇ ਬੈਂਕੁਇਟ ਹਾਲ ਸਰੀ ਵਿਚ 12 ਵਜੇ ਦੁਪਹਿਰ ਪ੍ਰੋ: ਪ੍ਰੀਤਮ ਸਿੰਘ ਯਾਦ ਵਿਚ ਹੋ ਰਹੇ ਸਮਾਗਮ ਆਉਣ ਦਾ ਖੁੱਲ੍ਹਾ ਸੱਦਾ ਦਿੱਤਾ।

-----

ਗਿੱਲ ਮੋਰਾਂਵਾਲੀ ਨੇ ਆਪਣੀ ਛੋਟੇ ਬਹਿਰ ਦੀ ਇਕ ਗ਼ਜ਼ਲ ਸਰੋਤਿਆਂ ਨਾਲ ਸਾਂਝੀ ਕੀਤੀ। ਤਨਦੀਪ ਤਮੰਨਾ ਨੇ ਪਾਲ ਢਿੱਲੋਂ ਦੀ ਇਕ ਗ਼ਜ਼ਲ ‘ਸ਼ੁਆ ਜੇਕਰ ਹਨੇਰਾ ਚੀਰਦੀ ਹੋਈ ਗੁਜ਼ਰ ਜਾਂਦੀ, ਜ਼ਰਾ ਭਰ ਖ਼ੌਫ਼ ਦੀ ਚਾਦਰ ਦਿਲਾਂ ਉੱਤੋਂ ਉਤਰ ਜਾਂਦੀ’ ਸੁਣਾਈ।

-----

ਸੈਸ਼ਨ ਦੇ ਅਖੀਰ ਵਿਚ ਨਦੀਮ ਪਰਮਾਰ ਨੇ ਪ੍ਰਧਾਨਗੀ ਭਾਸ਼ਨ ਦੀ ਥਾਂ ਆਪਣੀ ਇਕ ਛੋਟੇ ਬਹਿਰ ਦੀ ਨਵੀਂ ਗ਼ਜ਼ਲ, ‘ਜਾਣ ਬੇਜਾਨ ਅਈਨਾ ਮੈਨੂੰ, ਦੇ ਗਿਆ ਮੋਨ ਦੀ ਸਜ਼ਾ ਮੈਨੂੰ, ਸੁਣਾ ਕੇ ਸਰੋਤਿਆਂ ਨੂੰ ਨਿਹਾਲ ਕੀਤਾ। ਮੋਹਨ ਗਿੱਲ ਨੇ ਓਕਨਆਗਨ ਪੰਜਾਬੀ ਸੱਥ ਵੱਲੋਂ ‘ਇਹ ਸਮਾਗਮ’ ਸਰੀ ਵਿਚ ਕਰਨ ਲਈ ਉਹਨਾ ਦਾ ਧੰਨਵਾਦ ਕੀਤਾ। ਛਿੰਦਾ ਢਿੱਲੋਂ ਦੇ ਸਮਾਗਮ ਵਿਚ ਆਏ ਸੱਜਣਾਂ ਦਾ ਧੰਨਵਾਦ ਕਰਨ ਨਾਲ ਸਭਾ ਦੀ ਸਮਾਪਤੀ ਹੋ ਗਈ। ਇਹ ਸਮਾਰੋਹ ਅਭੁੱਲ ਯਾਦਾਂ ਛੱਡ ਗਿਆ।

ਸੰਤੋਖ ਧਾਲੀਵਾਲ ਦੇ ਕਹਾਣੀ-ਸੰਗ੍ਰਹਿ: ‘...ਤੇ ਕਾਨੂ ਮਰ ਗਿਆ ’ ‘ਤੇ ਗੋਸ਼ਟੀ ਅਤੇ ਕਵੀ ਦਰਬਾਰ - ਰਿਪੋਰਟ

2010-09-15T16:44:00.000-07:00

ਪੰਜਾਬੀ ਅਕੈਡਮੀ ਨੌਟਿੰਘਮ, ਯੂ.ਕੇ. - 22 ਅਗਸਤ ਦਿਨ ਐਤਵਾਰ, ਪਿਛਲੇ ਸਾਲਾਂ ਦੀ ਤਰ੍ਹਾਂ ਇਸ ਵਰ੍ਹੇ ਵੀ ਇੰਡੀਅਨ ਸੈਂਟਰ ਨੌਟਿੰਘਮ ਤੇ ਏਸ਼ੀਅਨ ਆਰਟਸ ਕੌਂਸਲ ਦੇ ਸਹਿਯੋਗ ਨਾਲ ਪੰਜਾਬੀ ਅਕੈਡਮੀ ਨੌਟਿੰਘਮ ਵਲੋਂ ਸੰਤੋਖ ਧਾਲੀਵਾਲ ਦੀ ਕਹਾਣੀਆਂ ਦੀ ਕਿਤਾਬ ‘... ਤੇ ਕਾਨੂ ਮਰ ਗਿਆ’ ਤੇ ਗੋਸ਼ਟੀ ਤੇ ਕਵੀ ਦਰਬਾਰ ਅਯੋਜਤ ਕੀਤਾ ਗਿਆ।ਇਸ ਸਾਲ ਪ੍ਰੋਗਰਾਮ ਮਹਾਨ ਸ਼ਹੀਦਾਂ, ਊਧਮ ਸਿੰਘ ਤੇ ਮਦਨ ਲਾਲ ਢੀਂਗਰਾ ਨੂੰ ਸ਼ਰਧਾਂਜਲੀਆਂ ਭੇਂਟ ਕਰਨ ਲਈ ਵੀ ਮਨਾਇਆ ਗਿਆ।

-----

ਪਹਿਲੇ ਸੈਸ਼ਨ ਦੇ ਪ੍ਰਧਾਨਗੀ ਮੰਡਲ ‘ਚ ਚੈਂਚਲ ਸਿੰਘ ਬਾਬਕ, ਕਸ਼ਮੀਰਾ ਸਿੰਘ, ਸਾਥੀ ਲੁਧਿਆਣਵੀ, ਮੋਤਾ ਸਿੰਘ ਸਰਾਏ, ਹਰਪਾਲ ਬਰਾੜ, ਡਾ. ਰਤਨ ਰੀਹਲ, ਤੇ ਡਾ. ਕਰਨੈਲ ਸ਼ੁਸ਼ੋਭਿਤ ਸਨ।ਸੰਤੋਖ ਧਾਲੀਵਾਲ ਦੀ ਨਵੀਂ ਕਹਾਣੀਆਂ ਦੀ ਕਿਤਾਬ, ...ਤੇ ਕਾਨੂੰ ਮਰ ਗਿਆ ਤੇ ਡਾ. ਰਤਨ ਰੀਹਲ ਨੇ ਪਰਚਾ ਪੜ੍ਹਿਆ ਜਿਸ ਤੇ ਵਿਦਵਾਨਾਂ ਵਲੋਂ ਭਰਵੀਂ ਬਹਿਸ ਹੋਈ।ਬਹਿਸ ‘ਚ ਡਾ. ਦਵਿੰਦਰ ਕੌਰ, ਦਲਬੀਰ ਕੌਰ, ਪੰਜਾਬੋਂ ਆਏ ਡਾ. ਜਾਰਜ ਸਿੰਘ, ਵਰਿੰਦਰ ਪਰਿਹਾਰ, ਮਨਮੋਹਨ ਸਿੰਘ, ਇੰਦਰਜੀਤ ਸਿੰਘ ਜੀਤ ਤੇ ਹੋਰ ਕਈ ਵਿਦਵਾਨਾਂ ਨੇ ਹਿੱਸਾ ਲਿਆ।ਪਰਚੇ ਵਿਚ ਕੀਤੇ ਵਿਸਥਾਰ ਤੇ ਕਈ ਸਵਾਲ ਉਠਾਏ ਗਏ ਜਿਨ੍ਹਾਂ ਦਾ ਡਾ. ਰਤਨ ਰੀਹਲ ਨੇ ਜਵਾਬ ਦਿੱਤਾ।

-----

ਪਰਚੇ ਤੋਂ ਮਗਰੋਂ ਹਰਪਾਲ ਬਰਾੜ ਨੇ ਸ਼ਹੀਦਾਂ ਦੀਆਂ ਕ਼ੁਰਬਾਨੀਆਂ ਤੇ ਉਸ ਵੇਲੇ ਦੇ ਭਾਰਤ ਦੀ ਸਿਆਸਤ ‘ਤੇ ਵਿਸਥਾਰ ਵਿਚ ਚਾਨਣਾ ਪਾਇਆ ਤੇ ਕਾਂਗਰਸ ਦੀਆਂ ਦੋਗਲੀਆਂ ਨੀਤੀਆਂ ਨੂੰ ਚੰਗੀ ਤਰ੍ਹਾਂ ਜਗ-ਜ਼ਾਹਿਰ ਕੀਤਾ।ਇਸ ਤੋਂ ਬਾਅਦ, ‘...ਤੇ ਕਾਨੂੰ ਮਰ ਗਿਆ’ ਤੇ ਸੰਤੋਖ ਧਾਲੀਵਾਲ ਦੀ ਵਲੈਤੀ ਕਥਾਕਾਰਾਂ ਦੀਆਂ 21 ਕਹਾਣੀਆਂ ਦਾ ਐਡਿਟ ਕੀਤਾ ਸੰਗ੍ਰਹਿ ‘ਕਥਾ ਸਮੁੰਦਰੋਂ ਪਾਰ ਦੀ’ ਤੇ ਦਵਿੰਦਰ ਕੌਰ ਦੀ ਨਵੀ ਸੀ. ਡੀ ‘ਦੀਵਾ ਬਾਲ਼ ਕੇ ਰੱਖੀਂ’ ਨੂੰ ਰਿਲੀਜ਼ ਕੀਤਾ ਗਿਆ ।ਸਾਥੀ ਲੁਧਿਆਣਵੀ ਨੇ ਪਹਿਲੇ ਸੈਸ਼ਨ ਨੂੰ ਪੂਰੇ ਵਿਸਥਾਰ ‘ਚ ਸਮੇਟਿਆ। ਕਥਾ ਸਮੁੰਦਰੋਂ ਪਾਰ ਦੀ, ਬਾਰੇ ਮੋਤਾ ਸਿੰਘ ਸਰਾਏ, ਸੰਚਾਲਕ ਯੂਰਪੀਅਨ ਪੰਜਾਬੀ ਸੱਥ ਨੇ ਇਨ੍ਹਾਂ 21 ਕਹਾਣੀਆਂ ਦੇ ਸੰਗ੍ਰਹਿ ਦੀ ਛਪਾਈ ਤੇ ਕਹਾਣੀਆਂ ਦੀ ਇਹੋ ਜਹੀ ਇੰਗਲੈਂਡ ‘ਚ ਪਹਿਲੀ ਕਿਤਾਬ ਦੀ ਮਹੱਤਤਾ ਦਾ ਜ਼ਿਕਰ ਕੀਤਾ ਜਿਸ ‘ਚ ਸਿਰਫ਼ ਸਥਾਪਤ ਕਹਾਣੀਕਾਰ ਹੀ ਦਰਜ ਨਹੀਂ ਕੀਤੇ ਗਏ ਸਗੋਂ ਵਲੈਤ ‘ਚ ਲਿਖੀ ਜਾ ਰਹੀ ਕਹਾਣੀ ਨੂੰ ਪੂਰੀ ਤਰ੍ਹਾਂ ਹਾਈਲਾਈਟ ਕੀਤਾ ਗਿਆ ਹੈ। ਕਥਾ ਸਮੁੰਦਰੋਂ ਪਾਰ ਦੀ ਕਹਾਣੀ ਸੰਗ੍ਰਹਿ ਇੱਕ ਦਸਤਾਵੇਜ਼ ਬਣ ਗਿਆ ਹੈ।

-----

ਰੈਡ ਹੌਟ ਰੈਸਟੋਰੈਂਟ ਤੋਂ ਆਏ ਪਕੌੜੇ, ਸਮੋਸੇ ਤੇ ਬੇਸਣ, ਤੇ ਚਾਹ ਤੇ ਕੌਫੀ ਦੇ ਘੁੱਟਾਂ ਨਾਲ ਛੋਟੀ ਜਿਹੀ ਬਰੇਕ ਮਗਰੋਂ ਕਵੀ ਦਰਬਾਰ ਦੀ ਸ਼ਰੂਆਤ ਡਾ. ਦਵਿੰਦਰ ਕੌਰ ਨੇ ਹੀਰ ਗਾ ਕੇ ਕੀਤੀ । ਕਵੀ ਦਰਬਾਰ ਦੀ ਪ੍ਰਧਾਨਗੀ ਪੰਜਾਬੋਂ ਆਏ ਡਾ. ਅੰਬਰੀਸ਼, ਉਨ੍ਹਾਂ ਦੀ ਪਤਨੀ ਪਰਮਜੀਤ, ਭੁਪਿੰਦਰਪ੍ਰੀਤ, ਬਿਪਨਪ੍ਰੀਤ, ਡਾ. ਦਵਿੰਦਰ ਕੌਰ, ਦਲਬੀਰ ਕੌਰ, ਕੁਲਵੰਤ ਢਿੱਲੋਂ, ਵਰਿੰਦਰ ਪਰਿਹਾਰ ਤੇ ਦਰਸ਼ਨ ਬੁਲੰਦਵੀ ਨੇ ਕੀਤੀ।ਸਰੋਤਿਆਂ ‘ਚ ਐਕਸੀਡੈਂਟ ਤੋਂ ਬਾਅਦ ਸਿਹਤ ਬਹੁਤੀ ਠੀਕ ਨਾ ਹੋਣ ਦੇ ਬਾਵਜੂਦ ਵੀ ਹਰਬਖ਼ਸ਼ ਮਕਸੂਦਪੁਰੀ ਤੇ ਹੋਰ ਬਹੁਤ ਸਾਰੀਆਂ ਉੱਚ ਦੁਮਾਲੜੀਆਂ ਸ਼ਖ਼ਸੀਅਤਾਂ ਨੇ ਹਾਜ਼ਰੀ ਲੁਆਈ।

-----

ਕਵੀ ਦਰਬਾਰ ‘ਚ ਡਾ. ਦਵਿੰਦਰ ਕੌਰ, ਡਾ.ਅੰਬਰੀਸ਼, ਪਰਮਜੀਤ, ਭੁਪਿੰਦਰਪ੍ਰੀਤ, ਬਿਪਨਪ੍ਰੀਤ, ਵਰਿੰਦਰ ਪਰਿਹਾਰ, ਦਰਸ਼ਨ ਬੁਲੰਦਵੀ, ਜਸਵਿੰਦਰ ਮਾਨ, ਕੁਲਵੰਤ ਢਿੱਲੋਂ, ਰਾਜਿੰਦਰਜੀਤ, ਸਾਥੀ ਲੁਧਿਆਣਵੀ, ਡਾ. ਰਤਨ ਰੀਹਲ, ਇੰਦਰਜੀਤ ਜੀਤ, ਕਿਰਪਾਲ ਪੂਨੀ, ਡਾ. ਕਰਨੈਲ, ਕੁਲਦੀਪ ਬਾਂਸਲ, ਹਰਵਿੰਦਰ ਬਣਵੈਤ, ਮੁਹਿੰਦਰ ਸਿੰਘ ਦਿਲਬਰ, ਹਰਜਿੰਦਰ ਸੰਧੂ ਤੇ ਦਲਜੀਤ ਕੌਰ ਨਿੱਝਰ ਨੇ ਆਪਣੀਆਂ ਨਵੀਆਂ ਕਵਿਤਾਵਾਂ ਨਾਲ ਹਾਜ਼ਰੀ ਲੁਆਈ।ਖਚਾ-ਖਚ ਭਰੇ ਹਾਲ ‘ਚ ਪੰਜਾਬੋਂ ਆਈਆਂ ਸ਼ਾਇਰ ਜੋੜੀਆਂ ਨੂੰ ਸਨਮਾਨਿਤ ਕੀਤਾ ਗਿਆ।ਅੰਤ ‘ਚ ਕਸ਼ਮੀਰਾ ਸਿੰਘ ਨੇ ਆਏ ਮਹਿਮਾਨਾਂ ਤੇ ਸਰੋਤਿਆਂ ਦਾ ਧੰਨਵਾਦ ਕੀਤਾ।

------

30 ਲੱਖ ਪੌਂਡਾਂ ਦੀ ਲਾਗਤ ਨਾਲ ਖ਼ਰੀਦੇ ਤੇ ਸ਼ਿੰਗਾਰੇ ਇੰਡੀਅਨ ਸੈਂਟਰ ਦੇ ਖ਼ੂਬਸੂਰਤ ਹਾਲ ‘ਚ 200 ਤੋਂ ਉੱਪਰ ਕਵੀਆਂ ਤੇ ਸਰੋਤਿਆਂ ਨੇ ਮਿਲਕੇ ਖਾਣਾ ਖਾਧਾ ਤੇ ਰੁਖ਼ਸਤੀ ਲਈ। ਇੱਕ ਵਾਰ ਫੇਰ ਇਸ ਵਰ੍ਹੇ ਵੀ ਨੌਟਿੰਘਮ ਦਾ ਪ੍ਰੋਗਰਾਮ ਇੱਕ ਮਿਸਾਲ ਬਣਿਆ।ਸੰਤੋਖ ਧਾਲੀਵਾਲ ਨੇ ਦੋਨਾਂ ਸੈਸ਼ਨਾਂ ਦੀ ਸਟੇਜ ਸੰਭਾਲੀ ਤੇ ਹਾਜ਼ਿਰ ਕਵੀਆਂ, ਸਰੋਤਿਆਂ, ਇੰਡੀਅਨ ਸੈਂਟਰ ਦੇ ਬੋਰਡ ਤੇ ਕਰਮਚਾਰੀ, ਏਸ਼ੀਅਨ ਆਰਟਸ ਕੌਂਸਲ ਦਾ ਤਹਿ ਦਿਲੋਂ ਧੰਨਵਾਦ ਕੀਤਾ। ਨੌਟਿੰਘਮ ਦੀ ਪੰਜਾਬੀ ਵਸੋਂ ਵੱਲੋਂ ਭਰਵੇਂ ਹੁੰਘਾਰੇ ਨੇ ਪ੍ਰਬੰਧਕਾਂ ਦਾ ਹੌਸਲਾ ਹੋਰ ਵੀ ਬੁਲੰਦ ਕੀਤਾ।

'ਪੁੰਗਰਦੇ ਹਰਫ਼’ ਅਤੇ P.A.U. ਸਾਹਿਤ ਸਭਾ ਵੱਲੋਂ ਕਵੀ-ਦਰਬਾਰ ਦਾ ਆਯੋਜਨ - ਰਿਪੋਰਟ

2010-09-15T16:39:00.000-07:00

ਰਿਪੋਰਟ: ਰੇਨੂ ਨਈਅਰ: 'ਪੁੰਗਰਦੇ ਹਰਫ਼ ਸਮਾਜਿਕ-ਸਭਿਆਚਾਰਕ ਸੋਸਾਇਟੀ (ਰਜਿ.) ਅਤੇ P.A.U. ਸਾਹਿਤ ਸਭਾ ਦੇ ਸਾਂਝੇ ਸਹਿਯੋਗ ਨਾਲ 4 ਸਿਤੰਬਰ 2010 ਨੂੰ ਪੰਜਾਬੀ ਭਵਨ ਲੁਧਿਆਣਾ ਵਿਖੇ ਕਵੀ ਦਰਬਾਰ ਕਰਵਾਇਆ ਗਿਆ। ਪੁੰਗਰਦੇ ਹਰਫ਼ ਸੋਸਾਇਟੀ, ਜੋ ਨਵੇਂ ਕਵੀਆਂ ਦੇ ਦੋ ਕਾਵਿ - ਸੰਗ੍ਰਿਹ ਸਾਹਿਤ ਜਗਤ ਨੂੰ ਦੇ ਚੁੱਕੀ ਹੈ ਅਤੇ ਤੀਜੇ ਕਾਵਿ-ਸੰਗ੍ਰਿਹ ਤੇ ਕੰਮ ਕਰ ਰਹੀ ਹੈ, ਵੱਲੋਂ ਇਹ ਖਾਸ ਉਪਰਾਲਾ ਨਵੇਂ ਕਵੀਆਂ ਨੂੰ ਸਾਂਝਾ ਮੰਚ ਦੇਣ ਲਈ ਕੀਤਾ ਗਿਆ । P.A.U. ਸਾਹਿਤ ਸਭਾ ਵੱਲੋਂ ਜਿਥੇ ਗੁਲਜ਼ਾਰ ਪੰਧੇਰ ਜੀ ਨੇ ਖ਼ਾਸ ਸ਼ਿਰਕਤ ਕੀਤੀ ਉਥੇ ਹੀ ਉਹਨਾਂ ਨੇ ਇਹਨਾਂ ਨਵੇਂ ਕਵੀਆਂ ਨੂੰ ਲਿਖਣ ਦੀ ਸੇਧ ਦਿੰਦੇ ਹੋਏ ਸਮਾਜਿਕ ਮੁੱਦਿਆਂ ਤੇ ਵੀ ਲਿਖਣ ਲਈ ਪ੍ਰੇਰਿਤ ਕੀਤਾ।

-----

ਇਹ ਕਵੀ ਦਰਬਾਰ ਖ਼ਾਸ ਕਰ ਕੇ ਉਹਨਾਂ ਪੰਜਾਬੀ ਲਿਖਾਰੀਆਂ ਲਈ ਕਰਵਾਇਆ ਗਿਆ ਜੋ ਦੇਸ਼ ਤੋਂ ਬਾਹਰ ਰਹਿ ਕੇ ਵੀ ਮਾਂ-ਬੋਲੀ ਦੀ ਸੇਵਾ ਕਰ ਰਹੇ ਹਨ। ਸੁਖਦਰਸ਼ਨ ਧਾਲੀਵਾਲ (Kansaf City, USA) ਅਤੇ ਰਮਨ ਸੰਧੂ (Qatar) ਦੇ ਨਾਮ ਇਸੇ ਲੜੀ ਵਿਚ ਸ਼ਾਮਿਲ ਹਨ। ਇਹਨਾਂ ਨੇ ਮਾਂ-ਬੋਲੀ ਪ੍ਰਤੀ ਆਪਣੇ ਪਿਆਰ ਬਾਰੇ, ਆਪਣੀ ਕਲਮ ਦੇ ਸਫ਼ਰ ਬਾਰੇ ਦੱਸਦਿਆਂ ਹੋਇਆਂ ਆਪਣੀਆਂ ਗ਼ਜ਼ਲਾਂ ਵੀ ਸਾਂਝੀਆਂ ਕੀਤੀਆਂ।

-----

ਜਸਵਿੰਦਰ ਮਹਿਰਮ, ਜਤਿੰਦਰ ਸੰਧੂ, ਸ਼ੈਲੀ ਅਰੋੜਾ, ਖ਼ੁਸ਼ਹਾਲ ਸਿੰਘ, ਨਿਵੇਦਿਤਾ ਸ਼ਰਮਾ, ਨਵਕਿਰਣ ਜੋਤ, ਜਗਜੀਤ ਹਾਂਸ, ਇੰਦਰਜੀਤ ਕੌਰ, ਰੇਨੂੰ ਨਈਅਰ, ਗੁਰਪ੍ਰੀਤ ਮਾਨ ਹੋਰਾਂ ਨੇ ਵੀ ਆਪਣੀਆਂ ਰਚਨਾਵਾਂ ਸਾਂਝੀਆਂ ਕੀਤੀਆਂ । ਇਸ ਮੌਕੇ ਹਰਪ੍ਰੀਤ ਸਿੰਘ ਮੋਗਾ ਦੀ ਗ਼ਜ਼ਲਾਂ ਦੀ ਤੀਜੀ ਸੀ.ਡੀ "ਇਜ਼ਹਾਰ" ਵੀ ਰਿਲੀਜ਼ ਕੀਤੀ ਗਈ। ਇਸੇ ਸੀ.ਡੀ. ਵਿੱਚੋਂ ਉਹਨਾਂ ਨੇ ੩ ਗ਼ਜ਼ਲਾਂ ਆਪ ਗਾ ਕੇ ਸੁਨੀਆਂ ਜਿਹਨਾਂ ਦਾ ਸਰੋਤਿਆਂ ਨੇ ਖ਼ੂਬ ਆਨੰਦ ਮਾਣਿਆ।

-----

ਸਭਾ ਦੇ ਅੰਤ ਵਿੱਚ ਪ੍ਰਧਾਨਗੀ ਮੰਡਲ ਵੱਲੋਂ ਹਰ ਕਵੀ ਨੂੰ ਸਨਮਾਨ-ਚਿੰਨ੍ਹ ਅਤੇ ਪ੍ਰਮਾਣ-ਪੱਤਰ ਦਿੱਤੇ ਗਏ ਅਤੇ ਕਵਿਤਾ ਦੇ ਖੇਤਰ ਵਿਚ ਹੋਰ ਅੱਗੇ ਵਧਣ ਲਈ ਪ੍ਰੇਰਿਤ ਕੀਤਾ ਗਿਆ। ਸੋਸਾਇਟੀ ਦੇ ਪ੍ਰਧਾਨ ਵੱਲੋਂ ਸਭ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਗਿਆ।

ਸੰਤ ਬਾਬਾ ਬਲਬੀਰ ਸਿੰਘ ਜੀ ਸੀਚੇਵਾਲ ਨਾਲ਼ ਇਕ ਮਿਲਣੀ - ਰਿਪੋਰਟ

2010-09-14T19:58:00.000-07:00

ਪੰਜਾਬੀ ਸੱਥ: ਵਾਲਸਾਲ: ਇੰਗਲੈਂਡ ਦੇ ਮਿਡਲੈਂਡਜ਼ ਇਲਾਕੇ ਦੇ ਅਤਿ ਪ੍ਰਾਚੀਨ ਤੇ ਰਮਣੀਕ ਸ਼ਹਿਰ ਵਾਲਸਾਲ ਦੀ ਸੰਘਣੇ ਰੁੱਖਾਂ ਦੀਆਂ ਝੰਗੀਆਂ ਵਾਲੀ ਹਰੀ ਭਰੀ ਸੜਕ ਕੁਈਨਜ਼ ਰੋਡ ਦੇ 11 ਨੰਬਰ ਦੇ ਘਰ ਵਿਚ ਸੰਤ ਬਾਬਾ ਬਲਬੀਰ ਸਿੰਘ ਜੀ ਸੀਚੇਵਾਲ ਦੀ ਆਮਦ ਨਾਲ ਸਮੁੱਚੀ ਕੁਦਰਤ ਹੀ ਮਹਿਕ ਉੱਠੀ।ਯੂਰਪੀ ਪੰਜਾਬੀ ਸੱਥ ਦੇ ਕਰਤਾ ਧਰਤਾ ਸ. ਮੋਤਾ ਸਿੰਘ ਸਰਾਏ, ਬੀਬੀ ਰਸ਼ਪਿੰਦਰ ਕੌਰ ਸਰਾਏ, ਅਤੇ ਉਹਨਾਂ ਦੀਆਂ ਪਿਆਰੀਆਂ ਧੀਆਂ ਕੁਲਜੀਤ ਕੌਰ ਸਰਾਏ ਅਤੇ ਰਣਦੀਪ ਕੌਰ ਸਰਾਏ ਤੇ ਸੁਘੜ ਸਿਆਣੀ ਭੈਣ ਸੁਖਵਿੰਦਰ ਕੌਰ ਬੋਪਾਰਾਏ ਹੋਰਾਂ ਦੇ ਨਿੱਘੇ ਸੱਦੇ ‘ਤੇ ਨਵੇਂ ਘਰ ਰੂਪੀ ਦਰਖ਼ਤਾਂ ਨਾਲ ਘਿਰੇ ਆਲ੍ਹਣੇ ਵਿਚ ਏਸ ਪਰਿਵਾਰ ਵਲੋਂ ਮਿਤੀ 7.9.2010 ਦਿਨ ਮੰਗਲਵਾਰ ਨੂੰ ਆਪਣੇ ਭਾਈਚਾਰੇ ਦੇ ਵੀਹ ਪੱਚੀ ਭੈਣ ਭਰਾਵਾਂ ਨਾਲ ਸੰਤਾਂ ਦਾ ਧੰਨਵਾਦ ਕਰਨ ਅਤੇ ਉਹਨਾਂ ਵਲੋਂ ਕੀਤੇ ਜਾ ਰਹੇ ਕਾਰਜਾਂ ਦੀ ਜਾਣਕਾਰੀ ਪ੍ਰਾਪਤ ਕਰਨ ਲਈ ਇਸ ਮਿਲਣੀ ਦਾ ਪ੍ਰਬੰਧ ਕੀਤਾ ਗਿਆ।

-----

ਬਾਬਾ ਜੀ ਨੂੰ ਇਸ ਵਿਸ਼ਾਲ ਵਲਾਇਤੀ ਘਰ ਵਿਚ ਜਦੋਂ ਢੇਰਾਂ ਦੇ ਢੇਰ ਪੰਜਾਬੀ ਪੁਸਤਕਾਂ ਅਤੇ ਹਰੇ ਕਚੂਰ ਘਾਹ ਦੇ ਦਰਸ਼ਨ ਹੋਏ ਤਾਂ ਉਹ ਗਦ ਗਦ ਹੋ ਉੱਠੇ।ਘਰ ਦਾ ਗੇੜਾ ਕੱਢਦਿਆਂ ਮੋਤਾ ਸਿੰਘ ਹੋਰਾਂ ਬਾਬਾ ਜੀ ਨੂੰ ਦੱਸਿਆ ਕਿ ਭਾਵੇਂ ਇਹ ਜਾਇਦਾਦ ਉਹਨਾਂ ਦੀ ਨਿੱਜੀ ਹੈ ਪਰ ਭਵਿੱਖ ਵਿਚ ਇਸ ਦੀ ਵਰਤੋਂ ਆਪਣੀ ਬੋਲੀ, ਸਭਿਆਚਾਰ, ਵਿਰਾਸਤ ਤੇ ਵਾਤਾਵਰਣ ਨੂੰ ਜਾਨਣ, ਸਮਝਣ ਤੇ ਅੱਗੇ ਵਧਾਉਣ ਲਈ ਸਾਰਿਆਂ ਦੇ ਸਹਿਯੋਗ ਨਾਲ ਕੀਤੀ ਜਾਵੇਗੀ।ਯੂਰਪੀ ਪੰਜਾਬੀ ਸੱਥ ਲਈ ਇਹ ਅਸਥਾਨ ਮੁੱਖ ਦਫ਼ਤਰ, ਮਿਲਣੀਆਂ ਦਾ ਕੇਂਦਰ, ਲਾਇਬ੍ਰੇਰੀ, ਅਜਾਇਬ ਘਰ, ਪੁਸਤਕ ਭੰਡਾਰ ਅਤੇ ਸਰਬੱਤ ਦੇ ਭਲੇ ਲਈ ਕੀਤੇ ਜਾਣ ਵਾਲੇ ਕਾਰਜਾਂ ਦਾ ਕੇਂਦਰ ਹੋਵੇਗਾ।

-----

ਇਸ ਅਤਿਅੰਤ ਅਹਿਮ ਅਤੇ ਗੰਭੀਰ ਮਿਲਣੀ ਵਿਚ ਜਿੰਨੇ ਵੀ ਭੈਣ ਭਰਾ ਸ਼ਾਮਿਲ ਹੋਏ ਉਹ ਆਪਣੇ ਆਪ ਵਿਚ ਹੀ ਮਨੁੱਖ ਨਹੀਂ ਸੰਸਥਾਵਾਂ ਸਨ।ਸਭ ਤੋਂ ਪਹਿਲਾਂ ਪੁੱਜੇ ਬਜ਼ੁਰਗ਼ਵਾਰ, ਪੰਜਾਬੀਆਂ ਦੀ ਹਰ ਮਹਿਫ਼ਲ ਵਿਚ ਹਾਸਿਆਂ ਦੇ ਖੁੱਲ੍ਹੇ ਗੱਫੇ ਵੰਡਣ ਤੇ ਪਿੱਛੋਂ ਗੰਭੀਰ ਸੋਚਾਂ ਵਿਚ ਪਾਉਣ ਵਾਲੇ ਸ. ਤੇਜਾ ਸਿੰਘ ਤੇਜ ਕੋਟਲੇ ਵਾਲਾ ਜੀ ਸਨ।ਯੂਰਪੀ ਪੰਜਾਬੀ ਸੱਥ ਦੇ ਬਹੁਤ ਹੀ ਮਜ਼ਬੂਤ ਥੰਮ੍ਹ ਅਤੇ ਸੂਝਵਾਨ ਚਿੰਤਕ ਤੇ ਕਵੀ ਹਰਜਿੰਦਰ ਸਿੰਘ ਸੰਧੂ, ਧਰਮ ਪਤਨੀ ਬੀਬੀ ਦਲਬੀਰ ਕੌਰ ਅਤੇ ਉਹਨਾਂ ਦਾ ਬੇਟਾ ਅਤੇ ਸੰਧੂ ਹੋਰਾਂ ਦੇ ਵੱਡੇ ਭਰਾਤਾ ਸ.ਇੰਦਰਜੀਤ ਸਿੰਘ ਸੰਧੂ,ਜੋ ਕਿ ਅੱਜ ਕਲ ਪੰਜਾਬ ਤੋਂ ਇੱਥੇ ਆਏ ਹੋਏ ਹਨ, ਪਰਿਵਾਰ ਸਮੇਤ ਹਾਜ਼ਿਰ ਹੋਏ।ਸੰਧੂ ਹੋਰੀਂ ਦੁਆਬੇ ਦੀ ਧਰਤੀ ਦੀ ਸਿਰਮੌਰ ਸੰਸਥਾ ‘ ਮੰਜਕੀ ਪੰਜਾਬੀ ਸੱਥ ਭੰਗਾਲਾ’ ਦੀ ਸੱਜੀ ਬਾਂਹ ਹਨ।ਯੂਰਪੀ ਸੱਥ ਦੇ ਮੋਢੀਆਂ ‘ਚੋਂ, ਵਰ੍ਹਿਆਂ ਤੋਂ ਯੂ.ਕੇ. ਦੀ ਧਰਤੀ ‘ਤੇ ਵਸਦੇ ਅਤੇ ਮਾਂ-ਬੋਲੀ ਅਤੇ ਪੰਜਾਬੀ ਸਭਿਆਚਾਰ ਦੇ ਪ੍ਰਚਾਰ ਪ੍ਰਸਾਰ ਲਈ ਸੰਘਰਸ਼ਸ਼ੀਲ ਕਵੀ ਤੇ ਸਟੇਜ ਦੇ ਧਨੀ ਸ. ਨਿਰਮਲ ਸਿੰਘ ਕੰਧਾਲਵੀ ਵੀ ਇਸ ਮਿਲਣੀ ਦੀ ਅਹਿਮ ਹਸਤੀ ਸਨ।ਪੰਜਾਬਣ ਮਾਂ ਦੀ ਸੁੱਖਾਂ ਲੱਧੀ ਧੀ ਡਾਕਟਰ ਦਵਿੰਦਰ ਕੌਰ ਜੋ ਕਿ ਇਕ ਗੰਭੀਰ ਕਵਿੱਤਰੀ, ਗਾਇਕਾ ਹੋਣ ਤੋਂ ਇਲਾਵਾ ਸਾਹਿਤਿਕ ਆਲੋਚਨਾ ਦੇ ਖੇਤਰ ਵਿਚ ਵੀ ਇਕ ਪ੍ਰਮੁੱਖ ਨਾਮ ਹੈ, ਹੋਰੀਂ ਵੀ ਇਸ ਸਮੇਂ ਹਾਜ਼ਰ ਸਨ।ਇੰਜ ਹੀ ਗੁਰਮਤਿ ਚਿੰਤਨ. ਮੀਡੀਆ ਪੱਤਰਕਾਰੀ ਅਤੇ ਸਮਾਜਿਕ ਪਰਿਵਰਤਨ ਲਈ ਸਦਾ ਹੀ ਯਤਨਸ਼ੀਲ ਪੰਜਾਬੀਆਂ ਦੀ ਮਾਣਮੱਤੀ ਹਸਤੀ ਸ. ਕੁਲਵੰਤ ਸਿੰਘ ਢੇਸੀ ਹੋਰਾਂ ਦੀ ਮੌਜੂਦਗੀ ਇਸ ਮਿਲਣੀ ਦਾ ਖ਼ਾਸ ਹਾਸਿਲ ਸੀ।

-----

ਇਸ ਦੇਸ਼ ਵਿਚ ਵਸਦੇ ਦੱਖਣੀ ਏਸ਼ੀਆ ਦੇ ਵਿਭਿੰਨ ਭਾਈਚਾਰਿਆਂ ਦੀ ਦਿਨ ਰਾਤ ਸੇਵਾ ਵਿਚ ਜੁਟੀ ਪ੍ਰਸਿੱਧ ਹਸਤੀ ਸ. ਦਲ ਸਿੰਘ ਢੇਸੀ ਕੌਂਸਲਰ ਗੁਰਦੇਵ ਸਿੰਘ ਮਣਕੂ ਹੋਰਾਂ ਨੂੰ ਨਾਲ ਲੈ ਕੇ ਹਾਜ਼ਰ ਹੋਏ।ਅੱਜ ਦੀ ਮਿਲਣੀ ਵਿਚ ਉਹਨਾਂ ਨੇ ਬਾਬਾ ਬਲਬੀਰ ਸਿੰਘ ਜੀ ਨੂੰ ਉਹਨਾਂ ਦੀਆਂ ਪ੍ਰਦੂਸ਼ਣ ਮੁਕਤੀ ਸੰਬੰਧੀ ਸੇਵਾਵਾਂ ਨੂੰ ਮੁੱਖ ਰੱਖਦਿਆਂ ਸਨਮਾਨ ਪੱਤਰ ਦੇ ਕੇ ਸਨਮਾਨਿਤ ਕੀਤਾ।ਢੇਸੀ ਹੋਰਾਂ ਵਲੋਂ ਪੰਜਾਬੀ ਸੱਥ ਲਾਂਬੜਾ ਦੇ ਸੇਵਾਦਾਰ ਡਾਕਟਰ ਨਿਰਮਲ ਸਿੰਘ ਜੀ ਨੂੰ ਵੀ ਸਨਮਾਨ ਪੱਤਰ ਦੇ ਸਨਮਾਨਿਤ ਕੀਤਾ ਗਿਆ।

-----

ਸ੍ਰੀ ਮਹਿੰਦਰ ਸਿੰਘ ਦਿਲਬਰ ਜੋ ਕਿ ਸੱਥ ਦੇ ਕਾਰਜਾਂ ਵਿਚ ਕਈ ਮਹੱਤਵਪੂਰਨ ਸੇਵਾਵਾਂ ਨਿਭਾਉਂਦੇ ਹਨ ਅਤੇ ਖ਼ੁਦ ਸਮਾਜ ਸੁਧਾਰਕ ਅਤੇ ਅਗਾਂਹ ਵਧੂ ਕਵੀ ਹਨ, ਇਸ ਸਮੇਂ ਮੌਜੂਦ ਸਨ।‘ਦਿਲਬਰ’ ਹੋਰਾਂ ਦੀ ਕਿਤਾਬ ‘ ਕਾਲਾ ਗੁਲਾਬ ਚਿੱਟੀ ਮਹਿਕ’ ਅਜੇ ਹੁਣੇ ਹੀ ਪੰਜ ਸਤੰਬਰ ਨੂੰ ਪੰਜਾਬੀ ਸੱਥ ਦੀ ਦਸਵੀਂ ਪਰ੍ਹਿਆ ਵਿਚ ਲੋਕ ਅਰਪਣ ਕੀਤੀ ਗਈ ਹੈ।ਯੂਰਪੀ ਪੰਜਾਬੀ ਸੱਥ ਵਲੋਂ ਛਾਪੀ ਗਈ ‘ਦਿਲਬਰ’ ਹੋਰਾਂ ਦੀ ਇਹ ਪਲੇਠੀ ਕਿਤਾਬ ਹੈ।

ਹੋਰ ਹਸਤੀਆਂ ਵਿਚੋਂ ਪੰਜਾਬ ਦੀ ਮਾਂ ਖੇਡ ਕਬੱਡੀ ਨੂੰ ਪ੍ਰੋਤਸਾਹਿਤ ਕਰਨ, ਆਪਣੇ ਮੰਜਕੀ ਖੇਤਰ ਦੇ ਪੁਸ਼ਤੈਨੀ ਪਿੰਡ ਸ਼ਾਦੀ ਪੁਰ ਦੀ ਬਾਬਾ ਸੀਚੇਵਾਲ ਜੀ ਦੀ ਅਗਵਾਈ ਨਾਲ ਕਾਇਆ ਕਲਪ ਕਰਨ ਵਾਲੇ ਅਣਥੱਕ ਸਮਾਜ ਸੁਧਾਰਕ ਸ. ਅਜਾਇਬ ਸਿੰਘ ਗਰਚਾ, ਯੂਰਪੀ ਪੰਜਾਬੀ ਸੱਥ ਦੇ ਇਕ ਹੋਰ ਅਹਿਮ ਬੇਲੀ ਸ. ਨਛੱਤਰ ਸਿੰਘ, ਗੁਰਦੁਆਰਾ ਵਿਲਨਹਾਲ ਦੇ ਸਾਬਕਾ ਹੈੱਡ ਗ੍ਰੰਥੀ ਭਾਈ ਜਰਨੈਲ ਸਿੰਘ ਪ੍ਰਭਾਕਰ ਆਪਣੀ ਅਰਧੰਗਣੀ ਸਮੇਤ ਹਾਜ਼ਿਰ ਹੋਏ।

-----

ਇਹਨਾਂ ਸਾਰਿਆਂ ਭੈਣਾਂ ਭਰਾਵਾਂ ਅਤੇ ਸੰਤ ਜੀ ਨੂੰ ਜੀ ਆਇਆਂ ਆਖਦਿਆਂ ਮੋਤਾ ਸਿੰਘ ਸਰਾਏ ਹੋਰਾਂ ਸਭ ਦਾ ਹਾਰਦਿਕ ਧੰਨਵਾਦ ਕੀਤਾ।ਉਹਨਾਂ ਪੰਜਾਬੀ ਸੱਥ ਵਲੋਂ ਕੀਤੇ ਜਾਂਦੇ ਕਾਰਜਾਂ ਅਤੇ ਕਾਲੀ ਵੇਈਂ ਦੀ ਕਾਰ ਸੇਵਾ ਦੀ ਮੁਹਿੰਮ ਸੰਬੰਧੀ ਖੋਲ੍ਹ ਕੇ ਦੱਸਿਆ।ਉਹਨਾਂ ਮਾਂ-ਬੋਲੀ ਦੀ ਯੂਰਪੀ ਦੇਸ਼ਾਂ ਵਿਚ ਹਾਲਤ ਬਾਰੇ ਬੋਲਦਿਆਂ ਕਿਹਾ ਕਿ ਜੇਕਰ ਆਪਾਂ ਸਾਰੇ ਨਿੱਕੇ ਮੋਟੇ ਗਿਲੇ ਸ਼ਿਕਵੇ ਮੁਕਾ ਕੇ ਸੰਤ ਜੀ ਵਾਂਗ ਸਰਬੱਤ ਦੇ ਭਲੇ ਨੂੰ ਮੁੱਖ ਰੱਖ ਕੇ ਭਾਈਚਾਰੇ ਦੀ ਸੇਵਾ ਵਿਚ ਜੁੱਟ ਜਾਈਏ ਤਾਂ ਨਤੀਜੇ ਜ਼ਰੂਰ ਹੀ ਹਾਂ ਪੱਖੀ ਨਿਕਲਣਗੇ।ਉਹਨਾਂ ਬਾਬਾ ਜੀ ਵਲੋਂ ਕੀਤੇ ਕਾਰਜਾਂ ਤੋਂ ਸੇਧ ਲੈਂਦਿਆਂ, ਧੜੇਬੰਦੀਆਂ, ਵੰਡਾਂ ਦਰ ਵੰਡਾਂ ਨੂੰ ਇਕ ਪਾਸੇ ਰਖਦਿਆਂ, ਸੌੜੀਆਂ ਸਿਆਸਤਾਂ ਅਤੇ ਘੜੰਮ ਚੌਧਰੀਆਂ ਤੋਂ ਬਚਦਿਆਂ ਸਾਰਿਆਂ ਨੂੰ ਇਕ ਲੜੀ ਵਿਚ ਪ੍ਰੋ ਕੇ ਗੰਭੀਰਤਾ ਨਾਲ ਸੋਚਣ ਲਈ ਹੀ ਨਹੀਂ ਸਗੋਂ ਅਮਲ ਕਰਨ ਦੀ ਸਲਾਹ ਦਿਤੀ।

-----

ਯੂਰਪੀ ਪੰਜਾਬੀ ਸੱਥ ਵਲੋਂ ਛਾਪੀਆਂ ਗਈਆਂ 85 ਕਿਤਾਬਾਂ, ਵਿਰਾਸਤੀ ਕੈਲੰਡਰ, ਦੋ ਦੋ ਤੋਲੇ ਦੇ ਖਰੇ ਸੋਨੇ ਦੇ ਮੈਡਲਾਂ ਨਾਲ ਹਰੇਕ ਸਾਲ ਹੋਣ ਵਾਲੇ ਸਨਮਾਨ ਸਮਾਗਮ, ਕੁਇੰਟਲਾਂ ਦੇ ਹਿਸਾਬ ਨਾਲ ਪੰਜਾਬ ਤੋਂ ਆਪਣੇ ਖ਼ਰਚੇ ‘ਤੇ ਲਿਆਂਦੀਆਂ ਕਿਤਾਬਾਂ ਨੂੰ ਸਿਰਫ਼ ਯੂ.ਕੇ. ਹੀ ਨਹੀਂ ਸਗੋਂ ਯੂਰਪ ਭਰ ਤੀਕ ਪਹੁੰਚਾਉਣ ਸੰਬੰਧੀ ਜਾਣਕਾਰੀ ਦੇ ਕੇ ਅਜਿਹੇ ਸਾਰੇ ਖ਼ਦਸ਼ਿਆਂ ਤੋਂ ਸਾਰਿਆਂ ਨੂੰ ਮੁਕਤ ਕਰ ਦਿਤਾ ਕਿ ਪੰਜਾਬੀ ਬੋਲੀ ਮਰ ਰਹੀ ਹੈ।ਸੱਥ ਵਲੋਂ ਪਾਈ ਨਵੀਂ ਪਿਰਤ, ਲੇਖਕਾਂ ਅਤੇ ਵਿਦਵਾਨਾਂ ਦੀਆਂ ਸੁਪਤਨੀਆਂ ਨੂੰ ਸਨਮਾਨਿਤ ਕਰਨਾ, ਆਪਣੇ ਆਪ ਵਿਚ ਹੀ ਪੰਜਾਬੀ ਸਭਿਆਚਾਰ ਦਾ ਇਕ ਇਤਿਹਾਸਕ ਮੋੜ ਹੈ।ਮੋਤਾ ਸਿੰਘ ਹੋਰਾਂ ਬਾਬਾ ਜੀ ਨੂੰ ਆਪਣੇ ਪ੍ਰਵਚਨਾਂ ਰਾਹੀਂ ਸਰੋਤਿਆਂ ਨੂੰ ਨਿਹਾਲ ਕਰਨ ਲਈ ਬੇਨਤੀ ਕੀਤੀ।

-----

ਬਾਬਾ ਜੀ ਨੇ ਵੇਈਂ ਦੇ ਕਾਰਜਾਂ ਤੋਂ ਵੀ ਪਹਿਲਾਂ ਰਸਤਿਆਂ,ਸੜਕਾਂ ਦੀ ਸੇਵਾ, ਖੇਡਾਂ, ਰੁੱਖ ਲਾਉਣ, ਕਵੀ ਦਰਬਾਰਾਂ ਅਤੇ ਸਕੂਲ ਖੋਲ੍ਹਣ ਸੰਬੰਧੀ ਦੱਸਦਿਆਂ ਕਿਹਾ ਕਿ ਜੇ ਅਸੀਂ ਨਾਂਹ-ਪੱਖੀ ਵਿਚਾਰਾਂ ਤੋਂ ਖਹਿੜਾ ਛੁਡਵਾ ਕੇ ਹਾਂ-ਪੱਖੀ ਵਿਚਾਰਾਂ ਦੇ ਧਾਰਨੀ ਬਣ ਜਾਈਏ ਤਾਂ ਕੁਝ ਵੀ ਅਸੰਭਵ ਨਹੀਂ।15 ਜੁਲਾਈ 2010 ਵਿਚ ਜਲੰਧਰ ਵਿਖੇ ‘ਪੰਜਾਬੀ ਸੱਥ’ ਅਤੇ ‘ਧਰਤਿ ਸੁਹਾਵੀ’ ਦੇ ਇਕ ਭਰਵੇਂ ਸਮਾਗਮ ਸਮੇਂ ਸੰਤਾਂ ਵਲੋਂ ਕਾਲੀ ਵੇਈਂ ਦੀ, ਸਿੱਖੀ ਦੇ ਸੋਮੇ ਸੁਲਤਾਨ ਪੁਰ ਲੋਧੀ ਤੋਂ ਸ਼ੁਰੂ ਹੋਈ ਕਾਰ ਸੇਵਾ ਦਾ ਪਿਛਲੇ ਦਸਾਂ ਸਾਲਾਂ ਦਾ ਲੇਖਾ ਕਰਦਿਆਂ ਉਹਨਾਂ ਕਿਹਾ ਕਿ ਬਦਲਵੇਂ ਵਿਕਾਸ ਦਾ ਸੰਗਤ ਦੇ ਸਹਿਯੋਗ ਨਾਲ ਗੁਰਮਤਿ ਵਾਲਾ ਇਹ ਇਕ ਅਦਭੁੱਤ ਨਮੂਨਾ ਹੈ।ਇਹਦੀ ਸ਼ੋਭਾ ਪੰਜਾਬ, ਭਾਰਤ, ਤੋਂ ਹੁੰਦੀ ਹੋਈ ਅੱਜ ਅੰਤਰਰਾਸ਼ਟਰੀ ਪੱਧਰ ‘ਤੇ ਹੋ ਰਹੀ ਹੈ।ਸਾਨੂੰ ਪੰਜਾਬੀਆਂ ਨੂੰ ਮਾਣ ਹੈ ਕਿ ਅਸੀਂ ਆਪਣੇ ਗੁਰੂ ਸਾਹਿਬ ਦੀ ਬਖ਼ਸ਼ਿਸ਼ ਦੇ ਨਾਲ ਅੱਜ ਹੀਣ ਭਾਵਨਾ ਤੋਂ ਮੁਕਤ ਹੋ ਕੇ ਕੁੱਲ ਸੰਸਾਰ ਨੂੰ ਸੇਧ ਦੇਣ ਤੱਕ ਦਾ ਪੈਂਡਾ ਮਾਰਿਆ ਹੈ।ਬਾਬਾ ਜੀ ਨੇ ਉਹਨਾਂ ਦੇ ਰਾਹ ਵਿਚ ਪਾਏ ਗਏ ਅੜਿੱਕੇ ਤੇ ਆਈਆਂ ਦੁਸ਼ਵਾਰੀਆਂ ਦਾ ਜ਼ਿਕਰ ਵੀ ਬੇਬਾਕੀ ਨਾਲ ਕੀਤਾ ਤੇ ਦੱਸਿਆ ਕਿ ਜੇ ਆਪਾਂ ਸਾਰੇ ਇਵੇਂ ਹੀ ਰਲ ਮਿਲ ਕੇ, ਆਪਸੀ ਰੰਜ਼ਿਸ਼ਾਂ ਮਿਟਾ ਕੇ ਚਲਦੇ ਰਹੇ ਤਾਂ ਕੁਝ ਸਾਲਾਂ ਵਿਚ ਹੀ ਪੰਜਾਬ ਦੀ ਧਰਤੀ ਉੱਤੇ ਮੋੜ ਅਵੱਸ਼ ਆਵੇਗਾ।ਉਹਨਾਂ ਦੇਸ਼ਾਂ ਵਿਦੇਸ਼ਾਂ ਵਿਚ ਵਸਦੇ ਭੈਣਾਂ ਭਰਾਵਾਂ ਦਾ ਧੰਨਵਾਦ ਕੀਤਾ ਜਿਹਨਾਂ ਨੇ ਉਹਨਾਂ ਦੀ ਏਸ ਮੁਹਿੰਮ ਵਿਚ ਹਰੇਕ ਪ੍ਰਕਾਰ ਦਾ ਸਾਥ ਦਿਤਾ।

-----

ਪੰਜਾਬੀ ਸੱਥ ਲਾਂਬੜਾ ਤੋਂ ਆਏ ਡਾਕਟਰ ਨਿਰਮਲ ਸਿੰਘ ਹੋਰਾਂ ਨੇ ਦੇਸ ਪ੍ਰਦੇਸ ਦੀਆਂ ਸੱਥਾਂ ਦੀਆਂ ਸਰਗ਼ਰਮੀਆਂ, ਬਾਬਾ ਸੀਚੇਵਾਲ ਤੇ ਬਾਬਾ ਸੇਵਾ ਸਿੰਘ ਖਡੂਰ ਸਾਹਿਬ ਵਾਲਿਆਂ ਵਲੋਂ ਕੀਤੀਆਂ ਜਾ ਰਹੀਆਂ ਸੇਵਾਵਾਂ ਨੂੰ ਇਤਿਹਾਸਕ ਮੋੜ ਦੱਸਦਿਆਂ ਇਹਨਾਂ ਦੇ ਲੁਕੇ ਹੋਏ ਪੱਖਾਂ ਉੱਤੇ ਚਾਨਣਾ ਪਾਇਆ।ਉਹਨਾਂ ਬਾਬਾ ਜੀ ਨੂੰ ਅਤੇ ਸਾਰੀਆਂ ਸੰਗਤਾਂ ਨੂੰ ਮਿਲ ਬੈਠ ਕੇ ਸੰਜੀਦਗੀ ਨਾਲ ਸੋਚਣ ਦੀ ਇਸ ਪ੍ਰਕਿਰਿਆ ਦੀ ਵਧਾਈ ਦਿਤੀ।ਗੁਰਬਾਣੀ ਦੇ ਫ਼ਲਸਫ਼ੇ ਮੁਤਾਬਿਕ ਕਿਸੇ ਉੱਤੇ ਆਸ ਰੱਖਣ ਦੀ ਥਾਂ ਆਪਣੇ ਕਾਰਜ ਆਪ ਸੰਵਾਰਨ ਵਲ ਪਰਤਣ ਲਈ ਉਹਨਾਂ ਨੇ ਉਚੇਚੀ ਬੇਨਤੀ ਕੀਤੀ।ਕੁਲਵੰਤ ਸਿੰਘ ਢੇਸੀ, ਅਜਾਇਬ ਸਿੰਘ ਗਰਚਾ, ਨਿਰਮਲ ਸਿੰਘ ਕੰਧਾਲਵੀ ਹੋਰਾਂ ਨੇ ਕਈ ਮੁੱਲਵਾਨ ਸੁਝਾਉ ਦਿਤੇ।

-----

ਸਰਾਏ ਪਰਿਵਾਰ ਵਲੋਂ ਬੜੀ ਸ਼ਰਧਾਪੂਰਵਕ ਸਾਰੀ ਸੰਗਤ ਨੂੰ ਜਲ-ਪਾਣੀ ਛਕਾਇਆ ਗਿਆ। ਅਸਲ ਵਿਚ ਇਹ ਸਾਰਾ ਸਮਾਗਮ ਇਕ ਹਿਸਾਬ ਨਾਲ ਏਸ ਨਵੇਂ ਘਰ ਵਿਚ ਗ੍ਰਹਿ-ਪ੍ਰਵੇਸ਼ ਵਾਂਗ ਹੀ ਹੋ ਨਿਬੜਿਆ।ਸੰਤਾਂ ਨਾਲ ਨਿੱਘੀਆਂ ਤੇ ਮੋਹ ਭਰੀਆਂ ਗੱਲਾਂ ਕਾਰਨ ਮਾਹੌਲ ਸਹਿਜ ਵੀ ਸੀ ਤੇ ਸੁਹਾਵਣਾ ਵੀ।ਸਭ ਨੇ ਰਲ ਮਿਲ ਕੇ ਤਕਰੀਬਨ ਦੋ ਘੰਟੇ ਚੱਲੇ ਇਸ ਮਿਲਾਪ ਰੂਪੀ ਗੰਭੀਰ ਸਮਾਗਮ ਦਾ ਆਨੰਦ ਮਾਣਿਆ।ਬਾਬਾ ਜੀ ਨੂੰ ਲਿਆਉਣ ਦੀ ਸੇਵਾ ਸ. ਬਲਦੇਵ ਸਿੰਘ ਦਿਉਲ ਅਤੇ ਸ. ਅਰਜਨ ਸਿੰਘ ਹੋਰਾਂ ਨੇ ਨਿਭਾਈ।

ਪੰਜਾਬੀ ਲੇਖਕ ਮੰਚ ਦੀ ਸਾਲਾਨਾ ਮੀਟਿੰਗ ਵਿਚ ਚੋਣ - ਰਿਪੋਰਟ

2010-09-14T19:55:00.000-07:00

ਸਰੀ, ਕੈਨੇਡਾ:- (ਪੱਤਰ ਪ੍ਰੇਰਕ) ਪੰਜਾਬੀ ਲੇਖਕ ਮੰਚ ਵੈਨਕੂਵਰ ਦੀ ਵਾਰਸ਼ਿਕ ਇਕੱਤਰਤਾ 12 ਸਤੰਬਰ ਨੂੰ ਨਿਊਟਨ ਪਬਲਿਕ ਲਾਇਬ੍ਰੇਰੀ ਵਿਚ ਹੋਈ। ਸਭ ਤੋਂ ਪੰਜਾਬੀ ਦੇ ਨਾਮਵਰ ਕਹਾਣੀਕਾਰ ਮੰਚ ਮੈਂਬਰ ਅਮਰਜੀਤ ਚਾਹਲ ਦੀ ਧਰਮਪਤਨੀ ਅਤੇ ਪੰਜਾਬੀ ਦੇ ਉੱਘੇ ਲੇਖਕ, ਪ੍ਰਕਾਸ਼ਕ ਤੇ ਤ੍ਰੈਮਾਸਕ ‘ਮੀਰ’ ਦੇ ਸੰਪਾਦਕ ਪਰਦੁਮਨ ਸਿੰਘ ਬੇਦੀ ਦੇ ਅਕਾਲ ਚਲਾਣੇ ‘ਤੇ ਦੁੱਖ ਦਾ ਪਰਗਟਾ ਕੀਤਾ ਗਿਆ ਤੇ ਦੋ ਮਿੰਟ ਦੀ ਚੁੱਪ ਧਾਰ ਕੇ ਉਹਨਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਗਈ।

-----

ਸੂਚਨਾ ਹਿਤ ਮੰਚ ਮੈਂਬਰਾਂ ਨੂੰ ਜਾਣੂੰ ਕਰਵਾਇਆ ਗਿਆ ਕਿ 26 ਸਤੰਬਰ ਨੂੰ ਵਰਾਸਤ ਫਾਊਂਡੇਸ਼ਨ ਵੱਲੋਂ ਪ੍ਰੋ. ਪ੍ਰੀਤਮ ਸਿੰਘ ਦੀਆਂ ਦੋ ਪੁਸਤਕਾਂ ਬੰਬੇ ਬੈਂਕੁਇਟ ਹਾਲ ਵਿਚ, ਉਹਨਾਂ ਦੀ ਬੇਟੀ ਡਾ. ਹਰਸ਼ਿੰਦਰ ਕੌਰ ਰਾਹੀਂ, ਦੁਪਹਿਰ 12 ਵਜੇ ਰੀਲੀਜ਼ ਕੀਤੀਆਂ ਜਾ ਰਹੀਆਂ ਹਨ। ਦੂਜੀ ਸੂਚਨਾ ਇਹ ਦਿੱਤੀ ਗਈ ਕਿ ਗ਼ਜ਼ਲਗੋ ਪਾਲ ਢਿੱਲੋਂ ਦੀ ਗਜ਼ਲਾਂ ਦੀ ਕਿਤਾਬ ‘ਖੰਨਿਓਂ ਤਿੱਖਾ ਸਫ਼ਰ’ ਦੇਸ਼ ਭਗਤ ਸੈਂਟਰ ਸਰੀ ਵਿਖੇ 18 ਸਤੰਬਰ ਨੂੰ ਇਕ ਵਜੇ ਰਿਲੀਜ਼ ਕੀਤੀ ਜਾਵੇਗੀ। ਤੀਜੀ ਸੂਚਨਾ ਵਿਚ ਦੱਸਿਆ ਗਿਆ ਕਿ ਜਾਰਜ ਮੈਕੀ ਲਾਇਬ੍ਰੇਰੀ ਡੈਲਟਾ ਵਿਚ 28 ਸਤੰਬਰ ਨੂੰ ਸ਼ਾਮ ਸਾਢੇ ਛੇ ਵਜੇ ਜਰਨੈਲ ਸਿੰਘ ਦਾ ਕਹਾਣੀ ਪਾਠ ਹੋਵੇਗਾ ਅਤੇ ਜਤਿੰਦਰ ਤੇ ਹਰਭਜਨ ਮਾਂਗਟ ਕਵਿਤਾ ਪਾਠ ਕਰਨਗੇ।

------

ਦੂਜੇ ਦੌਰ ਵਿਚ ਮੰਚ ਮੈਂਬਰਾਂ ਨੇ ਆਪਣੀਆਂ ਰਚਨਾਵਾਂ ਸੁਣਾਈਆਂ। ਇੰਦਰਜੀਤ ਧਾਮੀ, ਸੁਰਿੰਦਰ ਸਹੋਤਾ, ਨਿਰਮਲ ਗਿੱਲ, ਸੁਸ਼ੀਲ ਕੌਰ, ਹਰਿਭਜਨ ਜੰਡਿਆਲਵੀ ਅਤੇ ਜੁਗਿੰਦਰ ਸ਼ਮਸ਼ੇਰ ਨੇ ਕਵਿਤਾਵਾਂ ਸੁਣਾਈਆਂ। ਕ੍ਰਿਸ਼ ਭਨੋਟ, ਗੁਰਦਰਸ਼ਨ ਬਾਦਲ, ਜੀਵਨ ਰਾਮ ਪੁਰੀ, ਸਤਿਨਾਮ ਸਿੰਘ ਕੋਮਲ ਅਤੇ ਨਦੀਮ ਪਰਮਾਰ ਨੇ ਗ਼ਜ਼ਲਾਂ ਸੁਣਾਈਆਂ। ਜਰਨੈ਼ਲ ਸਿੰਘ ਸੇਖਾ ਨੇ ਆਪਣੇ ਬਚਪਨ ਦੀ ਯਾਦ ਨਾਲ ਸਬੰਧਤ ਇਕ ਲੇਖ ‘ਜਰਨਲ ਮੋਹਣ ਸਿੰਘ ਤੇ ਕਾੜ੍ਹਨੀ ਦਾ ਦੁੱਧ’ ਪੜ੍ਹਿਆ ਫਿਰੇ ਬਰਜਿੰਦਰ ਢਿੱਲੋਂ ਨੇ ਇਕ ਕਹਾਣੀ ‘ਦੇਬੋ ਤੇ ਊਸ਼ਾ” ਸੁਣਾਈ। ਥੋੜ੍ਹੀਆਂ ਰਚਨਾਵਾਂ ਉਪਰ ਹੀ ਕੋਈ ਟਿੱਪਣੀ ਹੋਈ, ਬਹੁਤੀਆਂ ਰਚਨਵਾਂ ਸਲਾਹੀਆਂ ਗਈਆਂ।

-----

ਅਖੀਰਲੇ ਪੜਾਅ ਵਿਚ ਸਾਲ 2010-11 ਲਈ 13 ਮੈਂਬਰੀ ਕਾਰਜਕਾਰਨੀ ਦੀ ਚੋਣ ਸਰਵ ਸੰਮਤੀ ਨਾਲ ਚੋਣ ਕੀਤੀ ਗਈ, ਜਿਸ ਵਿਚ ਸਾਧੂ ਬਿਨਿੰਗ, ਜਰਨੈਲ ਸਿੰਘ ਆਰਟਿਸਟ, ਜਰਨੈਲ ਸਿੰਘ ਸੇਖਾ, ਜੁਗਿੰਦਰ ਸ਼ਮਸ਼ੇਰ, ਅਮਰਜੀਤ ਕੌਰ ਸ਼ਾਂਤ ਮਾਂਗਟ, ਹਰਜੀਤ ਦੌਧਰੀਆ, ਸੁਖਵੰਤ ਹੁੰਦਲ, ਹਰਬੰਸ ਢਿੱਲੋਂ, ਗੁਰਦਰਸ਼ਨ ਬਾਦਲ, ਜਸਵਿੰਦਰ ਕੌਰ ਗਿੱਲ, ਨਦੀਮ ਪਰਮਾਰ ਅਤੇ ਦਰਸ਼ਨ ਮਾਨ ਚੁਣੇ ਗਏ। ਫਿਰ ਕਾਰਜ ਕਾਰਨੀ ਨੇ ਆਪਣੇ ਵਿਚੋਂ ਜਰਨੈਲ ਸਿੰਘ ਆਰਟਿਸਟ ਅਤੇ ਜਰਨੈਲ ਸਿੰਘ ਸੇਖਾ ਨੂੰ ਸੰਚਾਲਕ, ਨਦੀਮ ਪਰਮਾਰ ਨੂੰ ਖ਼ਜ਼ਾਨਚੀ ਅਤੇ ਦਰਸ਼ਨ ਮਾਨ ਨੂੰ ਸਹਾਇਕ ਖ਼ਜ਼ਾਨਚੀ ਚੁਣ ਲਿਆ। ਲੇਖਕ ਮੰਚ ਦੀ ਅਗਲੀ ਮੀਟਿੰਗ ਨਿਊਟਨ ਪਬਲਿਕ ਲਾਇਬ੍ਰੇਰੀ ਸਰੀ ਵਿਚ 3 ਅਕਤੂਬਰ ਨੂੰ ਦੁਪਹਿਰ 1.30 ਵਜੇ ਹੋਵੇਗੀ।

ਸੰਚਾਲਕ

ਜਰਨੈਲ ਸਿੰਘ ਸੇਖਾ 604 543 8721

ਜਰਨੈਲ ਸਿੰਘ ਆਰਟਿਸਟ 604 825 4659

ਪੰਜਾਬੀ ਅਤੇ ਉਰਦੂ ਸ਼ਾਇਰੀ ਦੇ ਰੰਗ - ਵਿਦਵਾਨ ਦੋਸਤਾਂ ਦੇ ਸੰਗ - ਰਿਪੋਰਟ

2010-09-14T19:53:00.000-07:00

ਡੈਲਟਾ, ਬੀ.ਸੀ. (ਬਿੱਕਰ ਸਿੰਘ ਖੋਸਾ)-ਅਗਸਤ 31, ਦਿਨ ਮੰਗਲਵਾਰ ਨੂੰ ਇੱਥੋਂ ਦੀ ਜਾਰਜ ਮੈਕੀ ਲਇਬ੍ਰੇਰੀ ਵਿੱਚ ਸਰਬਜੀਤ ਕੌਰ ਰੰਧਾਵਾ ਅਤੇ ਸਰਵਨ ਸਿੰਘ ਰੰਧਾਵਾ ਜੋ ਪੰਜਾਬੀ ਦੇ ਅਕਸ ਨੂੰ ਉਚਾਈਆਂ ਤੇ ਵੇਖਣ ਲਈ ਯਤਨਸ਼ੀਲ ਹਨ, ਦੇ ਉੱਦਮਾਂ ਸਦਕਾ ਪੰਜਾਬੀ ਜਗਤ ਦੀਆਂ ਤਿੰਨ ਪ੍ਰਸਿੱਧ ਹਸਤੀਆਂ ਦਰਸ਼ਨ ਗਿੱਲ, ਪਿੰਸੀਪਲ ਸੁਰਿੰਦਰਪਾਲ ਕੌਰ ਬਰਾੜ ਅਤੇ ਨਦੀਮ ਪਰਮਾਰ ਹੋਰਾਂ ਦਿਆਂ ਗੀਤਾਂ, ਗ਼ਜ਼ਲਾਂ ਅਤੇ ਕਵਿਤਾਵਾਂ ਦੀ ਮਹਿਫ਼ਿਲ ਸਜਾਈ ਗਈ ।ਇਸ ਵਿੱਚ ਪੰਜਾਬੀ ਦੇ ਉਸਤਾਦ ਗ਼ਜ਼ਲਕਾਰ, ਕਵੀ, ਲੇਖਕ ਅਤੇ ਸੂਝਵਾਨ ਪਾਠਕਾਂ ਨੇ ਹਾਜ਼ਰੀ ਲਵਾਈ।ਭਾਰਤ ਤੋਂ ਪਹੁੰਚੇ ਪ੍ਰੋ:ਕਰਮਜੀਤ ਸਿੰਘ ਗਿੱਲ ਅਤੇ ਹਿੰਦੀ ਦੇ ਵਿਦਵਾਨ ਆਚਾਰੀਆ ਦਿਵੇਦੀ ਜੀ ਵਿਸ਼ੇਸ਼ ਤੌਰ ਤੇ ਸ਼ਾਮਿਲ ਹੋਏ।

-----

ਸੰਖੇਪ ਜਾਣ-ਪਛਾਣ ਤੋਂ ਬਾਦ ਦਰਸ਼ਨ ਗਿੱਲ ਨੇ ਆਪਣੀਆਂ ਗ਼ਜ਼ਲਾਂ ਨਾਲ ਪ੍ਰੋਗਰਾਮ ਨੂੰ ਰੰਗੀਨੀ ਦਿੱਤੀ ।ਸਿਰਫ਼ ਮੈਂ ਹੀ ਨਹੀਂ ਬਲ਼ਿਆ ਚਿਰਾਗ਼ਾਂ ਦੀ ਤਰ੍ਹਾਂ ਯਾਰੋ, ਜੋ ਮੇਰੇ ਸਾਹਮਣੇ ਸਨ ਵਾਂਗ ਮੇਰੇ ਦਹਿਕੀਆਂ ਸੜਕਾਂ।ਗ਼ਜ਼ਲ ਦਾ ਇੱਕ ਇੱਕ ਸ਼ੇਅਰ ਦਾਦ ਦੇ ਕਾਬਿਲ ਸੀ। ਮੱਛੀ ਦੀ ਅੱਖ ਵਿੱਚ ਲੱਗੇ ਨਾ ਤੀਰ ਕੋਈ, ਅੱਜ ਕੱਲ੍ਹ ਵੇਲਾ ਨਹੀਂ ਸਵੰਬਰ ਦਾ। ੳਨ੍ਹਾਂ ਨੇ ਆਪਣੀ ਕਿਤਾਬ “ਉਕਾਬ ਦੀ ਉਡਾਨ” ਵਿੱਚੋਂ ਆਦਿਵਾਸੀ ਕਵੀ ਚੀਫ਼ ਡਾਨ ਜਾਰਜ ਦੀ ਪੰਜਾਬੀ ਅਨੁਵਾਦਿਤ ਕਵਿਤਾ ੳਤੇ ਹੋਰ ਕਵਿਤਾਵਾਂ ਪੜ੍ਹ ਕੇ ਆਪਣੀ ਕਾਵਿ ਕਲਾ ਦੀ ਪੁਖ਼ਤਗੀ ਦਾ ਨਮੂਨਾ ਪੇਸ਼ ਕੀਤਾ।

-----

ਪਿੰਸੀਪਲ ਸੁਰਿੰਦਰਪਾਲ ਕੌਰ ਬਰਾੜ ਦੀ ਵਾਰੀ ਆਈ ਜਿਸ ਦੌਰਾਨ ਉਨ੍ਹਾਂ ਨੇ ਨਿਮਰਤਾ ਨਾਲ ਡਾ: ਦਰਸ਼ਨ ਗਿੱਲ ਨੂੰ ਆਪਣਾ ਉਸਤਾਦ ਕਹਿੰਦਿਆਂ ਸਾਰੇ ਆਉਂਣ ਵਾਲਿਆਂ ਦਾ ਧੰਨਵਾਦ ਕੀਤਾ।ਉਨ੍ਹਾਂ ਨੇ ਆਪਣੀਆਂ ਮਿਆਰੀ ਰਚਨਾਵਾਂ: “ਨਾ ਮੇਰਾ ਸੂਰਜ ਠਰਿਆ ਸੀ , ਨਾ ਮੇਰਾ ਗੀਤ ਹੀ ਮਰਿਆ ਸੀ”, “ਟੁੱਟਦੇ ਭੱਜਦੇ ਰਿਸ਼ਤਿਆਂ ਦੇ ਸੰਸਾਰ ਬੜੇ ਨੇ” ਅਤੇ ਕਵਿਤਾ ਸੁਪਨਾ ’ਤੇ ਕੁੜੀ, ਭਾਣਾ, ਹਿੰਦੀ ਦੀ ਕਵਿਤਾ ਮੋਮਬੱਤੀਆਂ ਅਤੇ ਲੈਅ ਭਰਪੂਰ ਕਵਿਤਾ- ਸਿਖਰ ਦੁਪਿਹਰੇ ਦਮ ਘੁੱਟਦਾ ਹੈ , ਹੁਣ ਛਾਵਾਂ ਵਿੱਚ ਜਾਣ ਦਿਉ ਸੁਣਾਈ । ਅੰਤ ਵਿੱਚ ਉਨ੍ਹਾਂ ਨੇ ਵਧੇਰੇ ਪ੍ਰਵਾਨ ਹੋਈ ਕਵਿਤਾ “ਮੌਸਮ” ਪੜ੍ਹੀ ।

----

ਨਦੀਮ ਪਰਮਾਰ ਹੋਰਾਂ ਨੇ ਆਪਣੀ ਜਾਣ-ਪਛਾਣ ਕਰਵਾਉਂਦਿਆਂ ਆਪਣੀ ਕਵਿ ਕਲਾ ਦਾ ਮੁੱਢ ਉਰਦੂ ਗ਼ਜ਼ਲਾਂ ਨਾਲ ਸ਼ੁਰੂਆਤ ਕੀਤੀ।“ਹਰ ਇਨਾਇਤ ਕਰਮ ਨਹੀਂ ਹੋਤੀ – ਹਰ ਮੁਹੱਬਤ ਭਰਮ ਨਹੀਂ ਹੋਤੀ” ਤੋਂ ਇਲਾਵਾ ਪ੍ਰਵਾਸ ਦਾ ਦੁੱਖ ਹੰਡਾਵਣ ਦੀ ਕਵਿਤਾ-“ਸ਼ਾਇਦ ਤੁਮਨੇ ਸੋਚਾ ਹੋਗਾ” ਵੀ ਸੁਣਾਈ। ਦੋ ਹਾਸ ਵਿਅੰਗ ਭਰਪੂਰ ਰਚਨਾਵਾਂ ਅਤੇ ਦੋ ਪੰਜਾਬੀ ਗ਼ਗ਼ਲਾਂ ਪੇਸ਼ ਕੀਤੀਆਂ ਜਿਨ੍ਹਾਂ ਵਿੱਚ “ਤੇ ਆਉਂਦਾ ਅਸਤ ਆਪਣੇ ਇੱਕ ਨਦੀ ਵਿੱਚ ਤਾਰ ਆਇਆਂ ਹਾਂ” ਪੜ੍ਹੀ ।

-----

ਸਮਾਪਤੀ ‘ਤੇ ਸਰਬਜੀਤ ਕੌਰ ਰੰਧਾਵਾ ਨੇ ਆਪਣੀਆਂ ਕਵਿਤਾਵਾਂ ਵਿੱਚੋਂ ਇੱਕ ਕਵਿਤਾ “ਮਨ ਦੀ ਸੋਚ ਦੇ ਸੁੱਚੇ ਮੋਤੀ ਬਿਖਰੇ-2 ਬਿਖਰੇ ਰਹਿੰਦੇ, ਜਦ ਦੇ ਅਸੀਂ ਪਰਾਏ ਦੇਸ਼ ਨੂੰ ਆਪਣਾ-ਆਪਣਾ ਕਹਿੰਦੇ” ਤਰੰਨੁਮ ਵਿੱਚ ਸੁਣਾ ਕੇ ਆਪਣੀ ਕਾਵਿ ਕਲਾ ਦਾ ਨਮੂਨਾ ਪੇਸ਼ ਕੀਤਾ।ਇਹ ਪ੍ਰੋਗਰਾਮ ਸਾਡੇ ਛੇ ਵਜੇ ਸ਼ੁਰੂ ਹੋਇਆ ਅਤੇ ਠੀਕ ਅੱਠ ਵਜੇ ਸਮਾਪਤ ਹੇਇਆ। ਸਰਬਜੀਤ ਨੇ ਅਗਲਾ ਕਵੀਆਂ ਦੀ ਸ਼ਾਮ ਪ੍ਰੋਗਰਾਮ 28 ਸਤੰਬਰ ਨੂੰ ਸਾਡੇ ਛੇ ਵਜੇ ਇਸੇ ਲਾਇਬ੍ਰੇਰੀ ਵਿੱਚ ਹੋਣ ਬਾਰੇ ਵੀ ਜਾਣਕਾਰੀ ਦਿੱਤੀ।

ਪੰਜਾਬੀ ਸੱਥ ਦੀ ਯੂਰਪੀਨ ਇਕਾਈ ਵੱਲੋਂ ਵਿਲਨਹਾਲ (ਇੰਗਲੈਂਡ) ਵਿਖੇ ਸ਼ਾਨਦਾਰ ਸਨਮਾਨ ਸਮਾਗਮ - ਰਿਪੋਰਟ

2010-09-10T20:35:00.000-07:00

ਰਿਪੋਰਟ: ਪੰਜਾਬੀ ਸੱਥ, ਵਾਲਸਾਲ : ਯੂਰਪੀ ਪੰਜਾਬੀ ਸੱਥ ਵਾਲਸਾਲ ਦਾ ਦਸਵਾਂ ਸਨਮਾਨ ਸਮਾਗਮ ਕਈ ਵਿਲੱਖਣ ਪੈੜਾਂ ਪਾਉਂਦਾ, ਪੰਜਾਬੀ ਸਾਹਿਤ, ਸਭਿਆਚਾਰ ਅਤੇ ਵਾਤਾਵਰਣ ਨੂੰ ਕਿੰਨੇ ਹੀ ਇਤਿਹਾਸਕ ਮੋੜ ਦਿੰਦਾ ਸਫ਼ਲਤਾ ਪੂਰਬਕ ਨੇਪਰੇ ਚੜ੍ਹਿਆ।ਕੁੱਲ ਆਲਮ ਵਿਚ ਹਰ ਕਿਸਮ ਦੇ ਫ਼ੈਲੇ ਪ੍ਰਦੂਸ਼ਣ ਵਿਰੁੱਧ ਆਮ ਲੋਕਾਂ ਦੇ ਸਹਿਯੋਗ ਨਾਲ ਗੁਰਮਤਿ ਅਨੁਸਾਰ ਕਾਲੀ ਵੇਈਂ ਨੂੰ ਪਵਿੱਤਰਤਾ ਦਾ ਖੋਇਆ ਹੋਇਆ ਰੁਤਬਾ ਬਹਾਲ ਕਰਨ ਦੇ ਮੋਢੀ ਸੰਤ ਬਾਬਾ ਬਲਬੀਰ ਸਿੰਘ ਜੀ ਸੀਚੇਵਾਲ ਨੇ ਸਮਾਗਮ ਦੀ ਪ੍ਰਧਾਨਗੀ ਤਵਾਰੀਖ਼ੀ ਮੋੜ ਦਾ ਮੁੱਢ ਬੰਨ੍ਹਿਆ।

-----

ਸ਼ਾਈਨ ਸਟਾਰ ਬੈਂਕਿਉਟਿੰਗ ਸੁਈਟ ਵਿਲਨਹਾਲ ਵਿਖੇ ਯੂ.ਕੇ. ਦੇ ਵੈਸਟ ਮਿਡਲੈਂਡਜ਼, ਯਾਰਕਸ਼ਾਇਰ ਅਤੇ ਲੰਡਨ ਦੇ ਦੂਰ-ਦੁਰਾਡੇ ਇਲਾਕਿਆਂ ‘ਚੋਂ ਘੁੱਗ ਵਸਦੇ ਪੰਜਾਬੀ ਭਾਈਚਾਰੇ ਦੇ ਸਿਰਮੌਰ ਸਾਹਿਤਕ ਵਿਦਵਾਨਾਂ, ਖੋਜੀਆਂ, ਅਧਿਆਪਕਾਂ, ਡਾਕਟਰਾਂ, ਮੀਡੀਆ ਕਰਮੀਆਂ ਤੇ ਪੰਜਾਬੀ ਭਾਸ਼ਾ ਨਾਲ ਮੋਹ ਰੱਖਣ ਵਾਲੇ ਢਾਈ ਸੌ ਤੋਂ ਵੀ ਵੱਧ ਭੈਣਾਂ,ਵੀਰਾਂ, ਬਜ਼ੁਰਗਾਂ ਤੇ ਬੱਚਿਆਂ ਨੇ ਚਾਰ ਘੰਟੇ ਤੋਂ ਵੀ ਵੱਧ ਚੱਲੇ ਏਸ ਰੌਚਕ ਸਮਾਗਮ ਦਾ ਆਨੰਦ ਮਾਣਿਆ।ਦੁਨੀਆਂ ਭਰ ਵਿਚ ਫ਼ੈਲੇ ਤਾਣੇ ਬਾਣੇ ਕਾਰਨ ਪੰਜਾਬੀ ਸੱਥ ਦੇ ਸਮਾਗਮ ਮਾਂ ਬੋਲੀ ਦੀ ਚੜ੍ਹਤ ਲਈ ਅਹਿਮ ਕਾਰਜ ਤਾਂ ਪਹਿਲਾਂ ਹੀ ਨਿਭਾਅ ਰਹੇ ਹਨ ਪਰ ਪਿਛਲੇ ਇਕ ਮਹੀਨੇ ਵਿਚ ਹੀ ਪੰਜਾਬੀ ਸੱਥ ਨੇ ਤਿੰਨ ਅਜਿਹੇ ਦੇਸ਼ਾਂ ਵਿਚ ਚਾਰ ਸਫ਼ਲ ਸਮਾਗਮ ਕਰਨ ਦਾ ਜਿਹੜਾ ਮਾਣ ਪ੍ਰਾਪਤ ਕੀਤਾ ਹੈ ਉਹ ਸਾਡੇ ਸਦੀਆਂ ਪੁਰਾਣੇ ਸਭਿਆਚਾਰ ਦੀ ਅਹਿਮ ਤੇ ਇਤਿਹਾਸਕ ਪ੍ਰਾਪਤੀ ਹੈ।ਯੂੁਰਪੀ ਪੰਜਾਬੀ ਸੱਥ ਵਲੋਂ ਯੂਰਪ ਦੇ ਮਹਾਨ ਦੇਸ਼ ਜਰਮਨੀ ਵਿਚ ਪੰਜਾਬੀ ਸੱਥ ਦੀ ਇਕਾਈ ਅਜੇ ਇਕ ਸਾਲ ਪਹਿਲਾਂ ਹੀ ਸਥਾਪਤ ਕੀਤੀ ਗਈ ਸੀ। 14 ਅਗਸਤ 2010 ਨੂੰ ਜਰਮਨ ਪੰਜਾਬੀ ਸੱਥ ਦਾ ਦੂਜਾ ਸਮਾਗਮ ਕੀਤਾ ਗਿਆ ਅਤੇ ਏਨੇ ਥੋੜ੍ਹੇ ਸਮੇਂ ਵਿਚ ਹੀ ਏਥੇ ਵਸਦੇ ਕਵੀਆਂ ਦਾ ਕਾਵਿ-ਸੰਗ੍ਰਹਿ ‘ ਘਿਉ ਚੂਰੀ ਦੀਆਂ ਬਾਤਾਂ’ ਛਾਪ ਕੇ ਬੀਬੀ ਅੰਜੂ ਜੀਤ ਸ਼ਰਮਾ ਨੇ ਮਾਅਰਕਾ ਮਾਰਿਆ ਹੈ।ਇਹ ਸਮਾਗਮ ‘ਮੀਡੀਆ ਪੰਜਾਬ’ ਦੇ ਸਹਿਯੋਗ ਨਾਲ ਕੀਤੇ ਕਵੀ ਦਰਬਾਰ ਤੇ ਯੂ.ਕੇ. ਤੋਂ ਮੋਤਾ ਸਿੰਘ ਸਰਾਏ, ਨਿਰਮਲ ਸਿੰਘ ਕੰਧਾਲਵੀ ਅਤੇ ਹਰਜਿੰਦਰ ਸਿੰਘ ਸੰਧੂ ਦੀ ਸ਼ਮੂਲੀਅਤ ਨਾਲ ਮਾਂ-ਬੋਲੀ ਦਾ ਪਰਚਮ ਕਾਮਯਾਬੀ ਨਾਲ ਲਹਿਰਾਇਆ ਗਿਆ।

-----

ਏਸੇ ਹੀ ਦੁਨੀਆਂ ਦੀ ਦੂਜੀ ਨੁੱਕਰੇ ਪੱਛਮੀ ਕੈਨੇਡਾ ਦੇ ਸ਼ਹਿਰ ਐਬਟਸਫੋਰਡ ਬੀ.ਸੀ. ਵਿਖੇ ਪੰਜਾਬੀ ਭੈਣਾਂ ਭਰਾਵਾਂ ਨੇ ਸ. ਹਰਭਜਨ ਸਿੰਘ ਅਠਵਾਲ ਦੀ ਦੇਖ ਰੇਖ ਹੇਠ ਕਾਰਜਸ਼ੀਲ ‘ ਪੰਜਾਬੀ ਸੱਥ, ਸਰੀ ਵੈਨਕੂਵਰ’ ਨੇ ਹਰਵਿੰਦਰ ਸਿੰਘ ਚਾਹਲ ਤੇ ਗੁਰਮਤਿ ਸੈਂਟਰ ਐਬਟਸਫੋਰਡ ਨੂੰ ਡਾਕਟਰ ਰਘਬੀਰ ਸਿੰਘ ਬੈਂਸ ਅਤੇ ਪ੍ਰੋਫ਼ੈਸਰ ਗੁਰਵਿੰਦਰ ਸਿੰਘ ਧਾਲੀਵਾਲ ਹੋਰਾਂ ਕੋਲੋਂ ਸਨਮਾਨਿਤ ਕਰਵਾ ਕੇ ਸਫ਼ਲਤਾ ਦੇ ਝੰਡੇ ਗੱਡੇ।ਕੈਨੇਡਾ ਦੇ ਸਭ ਤੋਂ ਵੱਡੇ ਅਤੇ ਦੁਨੀਆਂ ਦੇ ਪ੍ਰਸਿੱਧ ਨਗਰ ਟੋਰਾਂਟੋ ਵਿਖੇ ਸ. ਪਰਮਜੀਤ ਸਿੰਘ ਸੰਧੂ ਹੋਰਾਂ ਦੀ ਅਗਵਾਈ ਹੇਠ ਸਰਗਰਮ ਪੰਜਾਬੀ ਸੱਥ ਨੇ ਸਰਦਾਰ ਬਲਬੀਰ ਸਿੰਘ ਸਿਕੰਦ, ਬੀਬੀ ਬਲਬੀਰ ਕੌਰ ਸੰਘੇੜਾ ਅਤੇ ਆਜ਼ਾਦ ਹਿੰਦ ਫੌਜ ਦੇ 90 ਸਾਲਾ ਬਜ਼ੁਰਗ਼ ਸ. ਜਰਨੈਲ ਸਿੰਘ ਤੱਖਰ ਨੂੰ ਡਾਕਟਰ ਗੁਰਨਾਮ ਕੌਰ ਬੱਲ ਤੋਂ ਸਨਮਾਨਿਤ ਕਰਵਾਉਣ ਦਾ ਮਾਣ ਪ੍ਰਾਪਤ ਕੀਤਾ। ਇਹ ਤੀਜਾ ਸਮਾਗਮ 29 ਅਗਸਤ 2010 ਨੂੰ ਹੋਇਆ।ਕੈਨੇਡਾ ਵਾਲੇ ਦੋਹਾਂ ਸਮਾਗਮਾਂ ਵਿਚ ਸੱਥ ਦੇ ਸੰਕਲਪਾਂ ਅਤੇ ਮੁੱਖ ਸੱਥ ਤੋਂ ਇਲਾਵਾ ਵੀਹ ਸਰਗਰਮ ਇਕਾਈਆਂ, ਛਾਪੀਆਂ ਜਾ ਰਹੀਆਂ ਪੁਸਤਕਾਂ, ਕੈਲੰਡਰਾਂ ਅਤੇ ਵਿਰਾਸਤੀ ਅਜਾਇਬ-ਘਰ ਬਾਬਤ ਡਾਕਟਰ ਨਿਰਮਲ ਸਿੰਘ, ਸੇਵਾਦਾਰ ਪੰਜਾਬੀ ਸੱਥ ਲਾਂਬੜਾ, ਜਲੰਧਰ ਨੇ ਭਾਈਚਾਰੇ ਨੂੰ ਵਿਸਥਾਰਿਤ ਜਾਣਕਾਰੀ ਦਿਤੀ।

-----

5 ਸਤੰਬਰ 2010 ਵਾਲੇ ਅੱਜ ਦੇ ਸਮਾਗਮ ਨੇ ਮਾਂ-ਬੋਲੀ, ਸਭਿਆਚਾਰ, ਤੇ ਵਿਰਾਸਤ ਲਈ ਮੁੱਲਵਾਨ ਕਾਰਜ ਕਰਨ ਵਾਲਿਆਂ ਦੀ ਏਸ ਲੜੀ ਵਿਚ ਚੌਥੀ ਕੜੀ ਜੋੜਦਿਆਂ ਦੋ ਅਜਿਹੀਆਂ ਮਹਾਨ ਬੀਬੀਆਂ ਨੂੰ ਸਨਮਾਨਿਤ ਕਰਨ ਦਾ ਮਾਣ ਹਾਸਲ ਕੀਤਾ ਜਿਨ੍ਹਾਂ ਨੇ ਉਮਰ ਭਰ ਆਪਣੇ ਸਤਿਕਾਰਯੋਗ ਪਤੀਆਂ ਦੀ ਪੰਜਾਬੀ ਸਾਹਿਤ, ਪੱਤਰਕਾਰੀ ਤੇ ਗੀਤਕਾਰੀ ਦੇ ਖੇਤਰਾਂ ਵਿਚ ਮੱਲਾਂ ਮਾਰਨ ਲਈ ਸਹਿਯੋਗ ਦੇ ਕੇ ਉਨ੍ਹਾਂ ਨੂੰ ਪੰਜਾਬੀ ਜਗਤ ਵਿਚ ਸਿਖ਼ਰਾਂ ਛੂਹਣ ਦੇ ਕਾਬਿਲ ਬਣਾਇਆ।ਏਸ ਮੌਕੇ ਸੰਸਾਰ ਦੇ ਸਿਰਮੌਰ ਸ਼ਹਿਰ ਲੰਡਨ ਵਸਦੀ ਬੀਬੀ ‘ ਯਸ਼ਵੀਰ ਸਾਥੀ’ ਸੁਪਤਨੀ ਪ੍ਰਸਿੱਧ ਸਾਹਿਤਕਾਰ ਤੇ ਪੱਤਰਕਾਰ ਸ੍ਰੀ ਸਾਥੀ ਲੁਧਿਆਣਵੀ ਅਤੇ ਬੀਬੀ ਹਰਜੀਤ ਕੌਰ ਸੁਪਤਨੀ, ਅੱਧੀ ਸਦੀ ਤੋਂ ਵੀ ਵੱਧ ਸਿਹਤਮੰਦ ਗਾਇਕੀ ਵਿਚ ਪਿਰਤਾਂ ਪਾਉਣ ਵਾਲੇ ਸ. ਤਰਲੋਚਨ ਸਿੰਘ ਚੰਨ ਜੰਡਿਆਲਵੀ, ਨੂੰ ਆਦਰ ਸਾਹਿਤ ਮਾਣ ਸਨਮਾਨ ਭੇਟ ਕੀਤਾ ਗਿਆ।ਇਹਨਾਂ ਦੋਹਾਂ ਬੀਬੀਆਂ ਨੂੰ ਸ਼ੁੱਧ ਸੋਨੇ ਦੇ ਚੌਵੀ ਕੈਰੇਟ ਦੇ ਮੈਡਲ, ਸਨਮਾਨ ਪੱਤਰ ਅਤੇ ਸਾਲੂ ਭੇਟ ਕੀਤੇ ਗਏ।ਦੋਹਾਂ ਦੇ ਪਤੀਆਂ ਨੂੰ ਸਿਰੋਪੇ ਦੇ ਕੇ ਸਨਮਾਨਿਆ ਗਿਆ।ਸਨਮਾਨ ਭੇਟ ਕਰਨ ਦੀ ਰਸਮ ਸੰਤ ਬਲਬੀਰ ਸਿੰਘ ਸੀਚੇਵਾਲ ਹੋਰਾਂ ਨੇ ਅਦਾ ਕੀਤੀ।

-----

ਸੰਤਾਂ ਦਾ ਏਸ ਮੌਕੇ ਸਾਥ ਦੇਣ ਲਈ ਬੀਬੀ ਰਸ਼ਵਿੰਦਰ ਕੌਰ, ਬੀਬੀ ਦਲਬੀਰ ਕੌਰ ਸੰਧੂ, ਮੋਤਾ ਸਿੰਘ ਸਰਾਏ, ਹਰਜਿੰਦਰ ਸਿੰਘ ਸੰਧੂ, ਨਿਰਮਲ ਸਿੰਘ ਕੰਧਾਲਵੀ, ਨਕੋਦਰ, ਪੰਜਾਬ ਤੋਂ ਆਏ ਹਰਜਿੰਦਰ ਸਿੰਘ ਸੰਧੂ ਦੇ ਭਰਾਤਾ ਇੰਦਰਜੀਤ ਸਿੰਘ ਸੰਧੂ ਅਤੇ ਸੱਥ ਦੇ ਸੇਵਾਦਾਰ ਡਾ.ਨਿਰਮਲ ਸਿੰਘ ਉਚੇਚੇ ਰੂਪ ਵਿਚ ਹਾਜ਼ਰੀ ਭਰ ਰਹੇ ਸਨ।

-----

ਸਮਾਗਮ ਦਾ ਮੁੱਢ ਨਿਰਮਲ ਸਿੰਘ ਕੰਧਾਲਵੀ ਹੋਰੀਂ ਬੰਨ੍ਹਿਆਂ ਤੇ ਸਟੇਜ ਦੀ ਸੇਵਾ ਕੰਧਾਲਵੀ ਹੋਰੀਂ ਅਤੇ ਹਰਜਿੰਦਰ ਸਿੰਘ ਸੰਧੂ ਨੇ ਰਲ ਕੇ ਨਿਭਾਈ।ਦਲਜੀਤ ਸਿੰਘ ਰੰਧਾਵਾ ਦੀ ਦਿਲ ਨੂੰ ਧੂ ਪਾਉਣ ਵਾਲੀ ਕਵਿਤਾ ਤੋਂ ਪਿੱਛੋਂ ਮੋਤਾ ਸਿੰਘ ਸਰਾਏ ਹੋਰਾਂ ਨੇ ਸਾਰਿਆਂ ਨੂੰ ਨਿੱਘੀ ਜੀ ਆਇਆਂ ਆਖਦਿਆਂ ਪਿਛਲੇ ਸਾਲਾਂ ਵਿਚ ਯੂਰਪੀ ਪੰਜਾਬੀ ਸੱਥ ਵਲੋਂ ਕੀਤੇ ਕਾਰਜਾਂ ਦੀ ਸੰਖੇਪ ਜਾਣਕਾਰੀ ਦਿਤੀ।ਯੂਰਪ ਭਰ ਵਿਚੋਂ ਹੁਣ ਤੀਕ ਸਨਮਾਨੀਆਂ ਵੀਹ ਹਸਤੀਆਂ, ਪੱਚਾਸੀ ਤੋਂ ਵੱਧ ਛਾਪੀਆਂ ਕਿਤਾਬਾਂ, ਵਿਰਾਸਤੀ ਕੈਲੰਡਰਾਂ ਅਤੇ ਹਰ ਸਾਲ ਸ਼ੁੱਧ ਸੋਨੇ ਦੇ ਗੋਲਡ ਮੈਡਲਾਂ ਨਾਲ ਕੀਤੇ ਸਨਮਾਨ ਸਮਾਗਮ ਸਫ਼ਲਤਾ ਨਾਲ ਕਰਨ ਲਈ ਉਨ੍ਹਾਂ ਏਥੇ ਵਸਦੇ ਭਾਈਚਾਰੇ ਦਾ ਧੰਨਵਾਦ ਕੀਤਾ।ਉਨ੍ਹਾਂ ਨੇ ਸੌੜੀਆਂ ਸਿਆਸਤਾਂ, ਮਜ਼੍ਹਬੀ ਪਾੜਿਆਂ, ਵੰਡ ਵਿਤਕਰਿਆਂ, ਸਸਤੀਆਂ ਸ਼ੋਹਰਤਾਂ ਤੋਂ ਇਕ ਪਾਸੇ ਰਹਿ ਕੇ ਆਪਣੀ ਜ਼ੁਬਾਨ, ਵਿਰਾਸਤ, ਸਭਿਆਚਾਰ ਤੇ ਵਾਤਾਵਰਣ ਨੂੰ ਬਚਾਉਣ ਵਾਸਤੇ ਭਾਈਚਾਰੇ ਨੂੰ ਇਕ ਜੁੱਟ ਹੋ ਕੇ ਚੱਲਣ ਦੀ ਅਪੀਲ ਕੀਤੀ।

-----

ਉਨ੍ਹਾਂ ਤੋਂ ਬਾਅਦ ਡਾ.ਨਿਰਮਲ ਸਿੰਘ ਹੋਰੀਂ ਸੰਸਾਰ ਭਰ ਵਿਚ ਚਲ ਰਹੇ ਵਿਕਾਸ ਦੇ ਅਜੋਕੇ ਨਮੂਨੇ ਨੂੰ ਮੁੱਢੋਂ ਰੱਦ ਕਰਦਿਆਂ ਬਦਲਵੇਂ ਸਹਿਜ ਵਿਕਾਸ ਦੇ ਨਮੂਨੇ ਆਪਣੀ ਵਿਰਾਸਤ, ਫ਼ਲਸਫ਼ੇ, ਸਭਿਆਚਾਰ ਅਨੁਸਾਰ ਉਸਾਰਨ ਲਈ ਅਮਲੀ ਤੌਰ ‘ਤੇ ਇਕ ਜੁੱਟ ਹੋਣ ਲਈ ਸੁਝਾਅ ਦਿਤਾ।

-----

ਬਾਬਾ ਬਲਬੀਰ ਸਿੰਘ ਜੀ ਵਲੋਂ ਕਾਲੀ ਵੇਈਂ ਨੂੰ ਕਾਰ ਸੇਵਾ ਰਾਹੀਂ ਪਲੀਤੀ ਮੁਕਤ ਕਰਨ ਦੀ ਮੁਹਿੰਮ ਦਾ ਜ਼ਿਕਰ ਕਰਦਿਆਂ ਏਸ ਕਾਰਜ ਨੂੰ ਦੁਨੀਆਂ ਭਰ ਲਈ ਇਕ ਨਮੂਨਾ ਦੱਸਦਿਆਂ ਏਥੋਂ ਸਿੱਖਿਆ ਲੈਣ ਦੀ ਸਲਾਹ ਦਿਤੀ।ਵੇਈਂ ਦੀ ਕਾਰ ਸੇਵਾ ਨੇ ਜਿੱਥੇ ਵਾਤਾਵਰਣ ਨੂੰ ਸ਼ੁੱਧ ਕੀਤਾ ਹੈ ਉੱਥੇ ਸ਼ਹਿਰਾਂ ਅਤੇ ਪਿੰਡਾਂ ਦੇ ਨਿਕਾਸੀ ਪਾਣੀ ਦੇ ਸਿੰਜਾਈ ਲਈ ਵਰਤੇ ਜਾਣ ਕਾਰਨ ਪੈਦਾਵਾਰ ਵਿਚ ਹੋਏ ਵਾਧੇ, ਜ਼ਮੀਨ ਹੇਠਲੇ ਪਾਣੀ ਦੀ ਸਤਾਹ ਦਾ ਉੱਪਰ ਆਉਣਾ ਅਤੇ ਸੇਮ ਦੀ ਮਾਰ ਤੋਂ ਬਚਾਉ ਵਰਗੇ ਕਾਰਜਾਂ ਦੀ ਜਾਣਕਾਰੀ ਦਿਤੀ। ਸਮਾਗਮ ਮੌਕੇ ਲਹਿੰਦੇ ਪੰਜਾਬ ਲਾਹੌਰ ਵਿਚ ਵਸਦੇ ਲੋਕਾਂ ਦੇ ਸ਼ਾਇਰ ਵਜੋਂ ਜਾਣੇ ਜਾਂਦੇ ਬਾਬਾ ਨਜਮੀ ਦੀ ਚੋਣਵੀਂ ਕਵਿਤਾ ਦੀ ਹਰਭਜਨ ਸਿੰਘ ਹੁੰਦਲ ਵਲੋਂ ਲਿਪੀਅੰਤਰ ਅਤੇ ਸੰਧੂ ਪਰਿਵਾਰ ਦੇ ਸਹਿਯੋਗ ਨਾਲ ਛਪੀ ਕਿਤਾਬ ਲੋਕ ਅਰਪਣ ਕੀਤੀ ਗਈ।ਇਸੇ ਤਰ੍ਹਾਂ ਜ਼ਾਹਿਦ ਇਕਬਾਲ ਦੀ ਵਡ ਆਕਾਰੀ ਖੋਜੀ ਪੁਸਤਕ ‘ ਵਾਰਿਸ ਦੀ ਹੀਰ ਵਿਚ ਮਿਲਾਵਟੀ ਸ਼ੇਅਰਾਂ ਦਾ ਵੇਰਵਾ’ ਦੇ ਗੁਰਮੁਖੀ ਐਡੀਸ਼ਨ ਬਾਬਤ ਜਾਣਕਾਰੀ ਦਿਤੀ।ਯੂਰਪੀ ਪੰਜਾਬੀ ਸੱਥ ਵਲੋਂ ਢਿੱਲੋਂ ਪਰਿਵਾਰ ਦੇ ਸਹਿਯੋਗ ਨਾਲ ਛਪੀ ਕਿਤਾਬ ‘ ਵੁਲਵਰਹੈਂਪਟਨ, ਕਵੀਆਂ ਦਾ ਸ਼ਹਿਰ’ ਜਿਸ ਨੂੰ ਇੰਦਰਜੀਤ ਸਿੰਘ ਜੀਤ ਨੇ ਸੰਕਲਿਤ ਕੀਤਾ ਹੈ ਅਤੇ ਜਰਮਨੀ ਪੰਜਾਬੀ ਸੱਥ ਦੀ ਕਿਤਾਬ ‘ ਘਿਉ ਚੂਰੀ ਦੀਆਂ ਬਾਤਾਂ’ ਦੇ ਦਰਸ਼ਨ ਕਰਵਾਏ ਗਏ। ਮੁਹਿੰਦਰ ਸਿੰਘ ਦਿਲਬਰ ਦੀ ਕਿਤਾਬ ‘ਕਾਲਾ ਗੁਲਾਬ ਚਿੱਟੀ ਮਹਿਕ’ ਵੀ ਇਸ ਮੌਕੇ ਰੀਲੀਜ਼ ਕੀਤੀ ਗਈ।ਇਸ ਕਿਤਾਬ ਦਾ ਸਮੁੱਚਾ ਖ਼ਰਚ ਸ. ਦਲਜੀਤ ਸਿੰਘ ਰੰਧਾਵਾ ਹੋਰਾਂ ਵਲੋਂ ਕੀਤਾ ਗਿਆ ਹੈ।

-----

ਦੋਹਾਂ ਸਨਮਾਨਿਤ ਬੀਬੀਆਂ ਸਬੰਧੀ ਸੰਖੇਪ ਪਰ ਭਾਵਪੂਰਤ ਜਾਣਕਾਰੀ ਬੀਬੀ ਦਲਵੀਰ ਕੌਰ, ਡਾ. ਦਵਿੰਦਰ ਕੌਰ ਅਤੇ ਸੰਤੋਖ ਸਿੰਘ ਧਾਲੀਵਾਲ ਵਲੋਂ ਦਿਤੀ ਗਈ।ਡਾ.ਦਵਿੰਦਰ ਕੌਰ ਨੇ ਹੀਰ ਸੁਣਾ ਕੇ ਅਸ਼ ਅਸ਼ ਕਰਵਾਈ।ਦਲਬੀਰ ਕੌਰ ਨੇ ਵੀ ਆਪਣੀ ਮਧੁਰ ਆਵਾਜ਼ ਵਿਚ ਸਰੋਤਿਆਂ ਨੂੰ ਕੀਲਿਆ।ਪ੍ਰਸਿੱਧ ਹਾਸ-ਰਸ ਕਵੀ ਤੇਜਾ ਸਿੰਘ ਤੇਜ ਨੇ ਸਮਾਜ ਵਿਚ ਛੜਿਆਂ ਦੇ ਹਾਂ ਪੱਖੀ ਕਿਰਦਾਰ ਨੂੰ ਕਵਿਤਾ ਰਾਹੀਂ ਪੇਸ਼ ਕਰ ਕੇ ਵਾਹ ਵਾਹ ਖੱਟੀ।ਕਵੀਆਂ ਵਿਚ, ਪ੍ਰਕਾਸ਼ ਸਿੰਘ ਆਜ਼ਾਦ, ਗੁਰਚਰਨ ਸਿੰਘ ਲੋਟੇ, ਪਰਮਿੰਦਰ ਸਿੱਧੂ, ਮਲਕੀਅਤ ਸਿੰਘ ਸੰਧੂ, ਟਹਿਲ ਸਿੰਘ ਪੀਟਰਬਰ੍ਹੋ, ਹਰਿੰਦਰ ਕੌਰ, ਜਸਵੰਤ ਕੌਰ ਬੈਂਸ, ਮਹਿੰਦਰ ਸਿੰਘ ਰਾਏ, ਕਸ਼ਮੀਰ ਸਿੰਘ ਘੁੰਮਣ, ਹਰਭਜਨ ਸਿੰਘ ਬਾਗੜੀ, ਨਛੱਤਰ ਸਿੰਘ ਭੋਗਲ, ਜੰਡੂ ਲਿੱਤਰਾਂਵਾਲਾ ਅਤੇ ਪੰਜਾਬ ਰੇਡੀਓ ਲੰਡਨ ਤੋਂ ਸ਼ਮਸ਼ੇਰ ਸਿੰਘ ਰਾਏ ਹੋਰਾਂ ਵਿਸ਼ੇਸ਼ ਹਾਜ਼ਰੀਆਂ ਭਰੀਆਂ।

------

ਸੰਤ ਬਾਬਾ ਬਲਬੀਰ ਸਿੰਘ ਜੀ ਨੇ ਸਮਾਜ ਵਿਚੋਂ ਹਰੇਕ ਪ੍ਰਕਾਰ ਦੇ ਪ੍ਰਦੂਸ਼ਣ ਨੂੰ ਦੂਰ ਕਰਨ ਲਈ ਪੰਜਾਬੀ ਸੱਥ ਵਲੋਂ ਮੁੱਢ ਤੋਂ ਹੀ ਦਿਤੇ ਗਏ ਸਹਿਯੋਗ ਦੀ ਸ਼ਲਾਘਾ ਕੀਤੀ।ਉਨ੍ਹਾਂ, ਇਸ ਸਮਾਗਮ ਵਿਚ ਬੀਬੀਆਂ ਨੂੰ ਸਨਮਾਨਿਤ ਕਰ ਕੇ ਪੰਜਾਬੀਆਂ ਸਿਰੋਂ ਕਈ ਕਲੰਕ ਲਾਹੁਣ ਲਈ ਪੰਜਾਬੀ ਸੱਥ ਨੂੰ ਵਧਾਈ ਦਿਤੀ।ਬਾਬਾ ਜੀ ਹੋਰੀਂ ਵਿਸਥਾਰ ਸਹਿਤ ਦੱਸਿਆ ਕਿ ਕਿਵੇਂ ਵੇਈਂ ਨੂੰ ਪ੍ਰਦੂਸ਼ਣ ਮੁਕਤ ਕਰਨ ਦੀ ਗਾਥਾ ਗੁਰੂ ਨਾਨਕ ਦੀ ਕਰਮ ਭੂਮੀ ਤੋਂ ਅੰਤਰ ਰਾਸ਼ਟਰੀ ਪੱਧਰ ਤੱਕ ਸੰਗਤਾਂ ਦੇ ਸਹਿਯੋਗ ਨਾਲ ਪਹੁੰਚਾਈ ਗਈ।

-----

ਸਮਾਗਮ ਦੀਆਂ ਰੌਣਕਾਂ ਨੂੰ ਵਧਾਉਣ ਅਤੇ ਆਪਣੇ ਤੌਰ ‘ਤੇ ਮਾਂ-ਬੋਲੀ ਅਤੇ ਆਪਣੇ ਵਿਰਸੇ ਲਈ ਕਾਰਜ ਕਰਨ ਵਾਲੀਆਂ ਕਈ ਸੰਸਥਾਵਾਂ ਦੇ ਨੁਮਾਇੰਦਿਆਂ ਨੇ ਵੀ ਹਾਜ਼ਰੀਆਂ ਭਰੀਆਂ।ਪੰਜਾਬੀ ਲਿਖ਼ਾਰੀ ਸਭਾ ਕਵੈਂਟਰੀ ਤੋਂ ਕਿਰਪਾਲ ਸਿੰਘ ਪੂਨੀ, ਕਵੈਂਟਰੀ ਤੋਂ ਹੀ ਬਜ਼ੁਰਗ਼ ਖੋਜੀ ਤੇ ਸਾਹਿਤਕਾਰ ਅਤੇ ਸੱਥ ਦੇ ਅਹਿਮ ਸਲਾਹਕਾਰ ਅਜਮੇਰ ਕਵੈਂਟਰੀ, ਲਮਿੰਗਟਨ ਦੇ ਸਾਬਕਾ ਮੇਅਰ ਅਤੇ ਮੌਜੂਦਾ ਕੌਂਸਲਰ ਮੋਤਾ ਸਿੰਘ, ਬੀਕਾਸ ਸੰਸਥਾ ਬਰੈਡਫੋਰਡ ਤੋਂ ਤਰਲੋਚਨ ਸਿੰਘ ਦੁੱਗਲ, ਕਸ਼ਮੀਰ ਸਿੰਘ ਘੁੰਮਣ ਅਤੇ ਸਾਥੀ, ਬਰੈਡਫੋਰਡ ਪੰਜਾਬੀ ਕਲਚਰਲ ਸੁਸਾਇਟੀ ਵਲੋਂ ਮਹਿੰਦਰ ਸਿੰਘ ਖਿੰਡਾ ਅਤੇ ਸਾਥੀ, ਸਿੱਖ ਕਮਿਊਨਿਟੀ ਸੈਂਟਰ ਬਰਮਿੰਘਮ ਵਲੋਂ ਦਲ ਸਿੰਘ ਢੇਸੀ, ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਕਵੈਂਟਰੀ ਤੋਂ ਕੁਲਵੰਤ ਸਿੰਘ ਢੇਸੀ, ਪ੍ਰਸਿੱਧ ਸਪੋਰਟਸਮੈਨ ਝਲਮਣ ਸਿੰਘ ਵੜੈਚ, ਬੀਬੀ ਜਗਜੀਤ ਕੌਰ ਜੌਹਲ, ਰਾਜ ਕੁਮਾਰ ਲਾਲੀ ਮੀਸ਼ਮ, ਜਸਵਿੰਦਰ ਕੌਰ ਬਾਹੜਾ ਬਰੈਡਫੋਰਡ, ਗੁਰੂ ਰਵਿਦਾਸ ਗੁਰਦੁਆਰਾ ਬਰੈਡਫੋਰਡ ਦੇ ਪ੍ਰਧਾਨ ਸ੍ਰੀ ਮੂਰਤੀ ਰਾਮ, ਰਗ੍ਹਬੀ ਤੋਂ ਗੁਰਮੁਖ ਸਿੰਘ ਕੋਹਲੀ, ਲਾਇਬ੍ਰੇਰੀਅਨ ਜਸਪਾਲ ਸਿੰਘ ਗਰੇਵਾਲ, ਕੁਲਵੰਤ ਕੌਰ ਲੰਡਨ, ਗੁਰੂ ਨਾਨਕ ਗੁਰਦੁਆਰਾ ਵਾਲਸਾਲ ਤੋਂ ਜਸਵੀਰ ਸਿੰਘ ਬਚਰਾ, ਲੀਡਜ਼ ਤੋਂ ਨਵਜੋਤ ਕੌਰ ਅਤੇ ਪਰਿਵਾਰ, ਕਵੈਂਟਰੀ ਤੋਂ ਗੁਰਜੀਤ ਸਿੰਘ ਤੱਖਰ, ਨੌਟਿਘਮ ਤੋਂ ਚੂਹੜ ਸਿੰਘ ਤੱਖਰ, ਵੁਲਵਰਹੈਂਪਟਨ ਤੋਂ ਬੀਬੀ ਹਰਭਜਨ ਕੌਰ, ਬਰਮਿੰਘਮ ਤੋਂ ਬੀਬੀ ਕੁਲਦੀਪ ਕੌਰ ਜੱਬਲ ਅਤੇ ਪਰਿਵਾਰ, ਪਲਵਿੰਦਰ ਸਿੰਘ ਢਿੱਲੋਂ, ਸੁਰਿੰਦਰ ਸਿੰਘ ਕੰਦੋਲਾ ਸੋਲੀਹਲ, ਕੁਲਵੰਤ ਸਿੰਘ ਸਿੱਧੂ ਅਤੇ ਗੁਰਜਿੰਦਰ ਸਿੰਘ ਸਿੱਧੂ।

-----

ਯਾਦ ਰਹੇ ਕਿ ਪੰਜਾਬੀ ਸੱਥ ਵਲੋਂ ਕਵਿੰਟਲਾਂ ਦੇ ਹਿਸਾਬ ਕਿਤਾਬਾਂ ਛਪਵਾ ਕੇ ਬਿਲਕੁਲ ਮੁਫ਼ਤ ਵੰਡੀਆਂ ਜਾਂਦੀਆਂ ਹਨ।ਅੱਜ ਦੇ ਸਮਾਗਮ ਵਿਚ ਵੀ ਪੰਜ ਸੌ ਦੇ ਕਰੀਬ ਕਿਤਾਬਾਂ ਅਤੇ ਵਿਰਾਸਤੀ ਕੈਲੰਡਰ ਵੰਡਿਆ ਗਿਆ।ਸੰਤ ਬਾਬਾ ਬਲਬੀਰ ਸਿੰਘ ਸੀਚੇਵਾਲ ਜੀ ਨੂੰ ਸਮਾਗਮ ਵਿਚ ਲਿਆਉਣ ਲਈ ਸ. ਅਰਜਨ ਸਿੰਘ ਮਾਹਲ ਅਤੇ ਸ. ਮਨਜੀਤ ਸਿੰਘ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ ਜਾਂਦਾ ਹੈ। ਪ੍ਰੋਗਰਾਮ ਦੇ ਅੰਤ ‘ਤੇ ਮੱਕੀ ਦੀ ਰੋਟੀ ਤੇ ਸਰ੍ਹੋਂ ਦੇ ਸਾਗ ਨਾਲ ਲੰਗਰ ਛਕਾਇਆ ਗਿਆ। ਸ਼ਾਈਨ ਸਟਾਰ ਬੈਂਕੁਇਟਿੰਗ ਹਾਲ ਦੇ ਮਾਲਕ ਸ. ਸੁਰਿੰਦਰ ਸਿੰਘ ਭੋਗਲ ਹੋਰਾਂ ਦਾ ਵੀ ਧੰਨਵਾਦ ਕੀਤਾ ਜਾਂਦਾ ਹੈ ਜੋ ਕਿ ਹਰੇਕ ਸਾਲ ਸੱਥ ਦੇ ਪ੍ਰੋਗਰਾਮ ਨੂੰ ਕਾਮਯਾਬ ਕਰਨ ਲਈ ਬਹੁਤ ਹੀ ਸਹਿਯੋਗ ਦਿੰਦੇ ਹਨ।

ਪ੍ਰਸਿੱਧ ਸ਼ਾਇਰ ਅਤੇ ਚਿੱਤਰਕਾਰ ਇੰਦਰਜੀਤ ਇਮਰੋਜ਼ ਕੁਰੂਕਸ਼ੇਤਰ ਯੁਨੀਵਰਸਿਟੀ ਦੇ ਵਿਦਿਆਰਥੀਆਂ ਦੇ ਰੂ-ਬ-ਰੂ - ਰਿਪੋਰਟ

2010-09-10T20:33:00.000-07:00

ਰਿਪੋਰਟ: ਨਿਸ਼ਾਨ ਸਿੰਘ ਰਾਠੌਰ: ਕੁਰੂਕਸ਼ੇਤਰ ਯੁਨੀਵਰਸਿਟੀ ਪੰਜਾਬੀ ਵਿਭਾਗ ਵੱਲੋਂ 6 ਸਤੰਬਰ 2010 ਨੂੰ ਦਿਨੇ 11 ਵਜੇ ਸੀਨੇਟ ਹਾਲ ਵਿਖੇ ਪ੍ਰਸਿੱਧ ਸ਼ਾਇਰ ਅਤੇ ਚਿੱਤਰਕਾਰ ਇੰਦਰਜੀਤ ਇਮਰੋਜ਼ ਨੂੰ ਵਿਦਿਆਰਥੀਆਂ ਦੇ ਰੂ-ਬ-ਰੂ ਕਰਵਾਇਆ ਗਿਆ। ਇਸ ਪ੍ਰੋਗਰਾਮ ਦੀ ਪ੍ਰਧਾਨਗੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਡਾ. ਡੀ.ਡੀ. ਐੱਸ ਸੰਧੂ ਨੇ ਕੀਤੀ।

-----

ਸਭ ਤੋਂ ਪਹਿਲਾਂ ਪੰਜਾਬੀ ਵਿਭਾਗ ਦੇ ਚੇਅਰਮੈਨ ਡਾ. ਰਜਿੰਦਰ ਸਿੰਘ ਭੱਟੀ ਨੇ ਇੰਦਰਜੀਤ ਇਮਰੋਜ਼, ਪ੍ਰਸਿੱਧ ਸ਼ਾਇਰਾ ਸਫ਼ੀਨਾ ਬਿੱਟੂ ਸੰਧੂ ਅਤੇ ਬਾਹਰੋਂ ਆਏ ਸਾਰੇ ਮਹਿਮਾਨਾਂ ਨੂੰ ਜੀਅ ਆਇਆਂ ਆਖਿਆ। ਉਹਨਾਂ ਕਿਹਾ ਕਿ ਅਜਿਹੇ ਪ੍ਰੋਗਰਾਮਾਂ ਨਾਲ ਵਿਭਾਗ ਦੇ ਵਿਦਿਆਰਥੀਆਂ ਨੂੰ ਲਾਭ ਹੋਵੇਗਾ।

-----

ਇਸ ਤੋਂ ਬਾਅਦ ਡੀਨ ਆਫ਼ ਅਕੈਡਮਿਕ ਅਫ਼ੇਸਰ ਅਤੇ ਪ੍ਰਸਿੱਧ ਪੰਜਾਬੀ ਅਲੋਚਕ ਡਾ. ਅਮਰਜੀਤ ਸਿੰਘ ਕਾਂਗ ਨੇ ਇੰਦਰਜੀਤ ਇਮਰੋਜ਼ ਬਾਰੇ ਵਿਦਿਆਰਥੀਆਂ ਨੂੰ ਜਾਣੂ ਕਰਵਾਇਆ। ਡਾ. ਕਾਂਗ ਨੇ ਕਿਹਾ ਕਿ ਇੰਦਰਜੀਤ ਇਮਰੋਜ਼ ਦੇ ਕੁਰੂਕਸ਼ੇਤਰ ਯੂਨੀਵਰਸਿਟੀ ਵਿਚ ਆਉਣ ਨਾਲ ਸਾਡਾ ਸਾਰਿਆਂ ਦਾ ਮਾਣ ਵਧਿਆ ਹੈ।

------

ਉਨ੍ਹਾਂ ਵੀ.ਸੀ. ਡਾ. ਡੀ.ਡੀ.ਐੱਸ ਸੰਧੂ ਦਾ ਵਿਸ਼ੇਸ਼ ਧੰਨਵਾਦ ਕਰਦਿਆਂ ਕਿਹਾ ਕਿ ਵੀ.ਸੀ. ਸਾਹਬ ਯੂਨੀਵਰਸਿਟੀ ਵਿਚ ਅਜਿਹੇ ਪ੍ਰੋਗਰਾਮ ਕਰਵਾਉਣ ਵਿਚ ਵਿਸ਼ੇਸ਼ ਦਿਲਚਸਪੀ ਰੱਖਦੇ ਹਨ। ਉਨ੍ਹਾਂ ਦੇ ਇਸ ਉੱਦਮ ਸਦਕਾ ਹੀ ਅੱਜ ਇਕ ਮਹਾਨ ਸ਼ਾਇਰ/ਚਿੱਤਰਕਾਰ ਸਾਡੇ ਵਿਚ ਆਇਆ ਹੈ।

-----

ਇਸ ਤੋਂ ਬਾਅਦ ਇੰਦਰਜੀਤ ਇਮਰੋਜ਼ ਨੇ ਅੰਮ੍ਰਿਤਾ ਪ੍ਰੀਤਮ ਨਾਲ ਬਿਤਾਏ ਆਪਣੇ ਜੀਵਨ ਦੇ ਸੁਨਹਿਰੀ ਪਲਾਂ ਨੂੰ ਵਿਦਿਆਰਥੀਆਂ ਨਾਲ ਸਾਂਝਾ ਕੀਤਾ। ਉਨ੍ਹਾਂ ਆਪਣੀ ਜ਼ਿੰਦਗੀ ਦੇ ਨਿਜੀ ਤਜਰਬਿਆਂ ਬਾਰੇ, ਚਿੱਤਰਕਲਾ ਬਾਰੇ ਅਤੇ ਸ਼ਾਇਰੀ ਬਾਰੇ ਵਿਦਿਆਰਥੀਆਂ ਨੂੰ ਜਾਣੂੰ ਕਰਵਾਇਆ। ਉਨ੍ਹਾਂ ਨੇ ਅਮ੍ਰਿਤਾ ਪ੍ਰੀਤਮ ਅਤੇ ਆਪਣੀਆਂ ਨਜ਼ਮਾਂ ਵੀ ਸੁਣਾਈਆਂ। ਇੰਦਰਜੀਤ ਇਮਰੋਜ਼ ਨਾਲ ਵਿਸ਼ੇਸ਼ ਤੌਰ ‘ਤੇ ਆਈ ਸ਼ਾਇਰਾ ਸਫ਼ੀਨਾ ਬਿੱਟੂ ਸੰਧੂ ਨੇ ਆਪਣੀਆਂ ਨਜ਼ਮਾਂ ਰਾਹੀਂ ਹਾਜ਼ਿਰ ਸਰੋਤਿਆਂ ਨੂੰ ਝੂੰਮਣ ਲਈ ਮਜਬੂਰ ਕਰ ਦਿੱਤਾ।

-----

ਪੰਜਾਬੀ ਵਿਭਾਗ ਅਤੇ ਫਾਈਨ ਆਰਟ ਵਿਭਾਗ ਦੇ ਵਿਦਿਆਰਥੀਆਂ ਨੇ ਇੰਦਰਜੀਤ ਇਮਰੋਜ਼ ਅਤੇ ਸਫ਼ੀਨਾ ਬਿੱਟੂ ਸੰਧੂ ਤੋਂ ਉਹਨਾਂ ਦੀ ਕਲਾ ਬਾਰੇ ਜਾਣਕਾਰੀ ਲੈਣ ਹਿੱਤ ਕਈ ਸਵਾਲ ਵੀ ਪੁੱਛੇ ਜਿਹਨਾਂ ਦਾ ਉਹਨਾਂ ਨੇ ਵਧੀਆ ਢੰਗ ਨਾਲ ਜਵਾਬ ਦਿੱਤਾ।

-----

ਆਪਣੇ ਪ੍ਰਧਾਨਗੀ ਭਾਸ਼ਣ ਵਿਚ ਵੀ.ਸੀ. ਡਾ. ਡੀ.ਡੀ.ਐੱਸ ਸੰਧੂ ਨੇ ਕਿਹਾ ਕਿ ਇਹ ਯੂਨੀਵਰਸਿਟੀ ਲਈ ਬੜੇ ਮਾਣ ਵਾਲੀ ਗੱਲ ਹੈ ਕਿ ਅੱਜ ਮਹਾਨ ਸ਼ਾਇਰ ਅਤੇ ਚਿੱਤਰਕਾਰ ਇੰਦਰਜੀਤ ਇਮਰੋਜ਼ ਸਾਡੇ ਵਿਚ ਆਏ ਹਨ। ਉਹਨਾਂ ਪੰਜਾਬੀ ਵਿਭਾਗ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਪੰਜਾਬੀ ਵਿਭਾਗ ਦਾ ਇਹ ਇਕ ਵਧੀਆ ਉਪਰਾਲਾ ਹੈ ਅਤੇ ਯੂਨੀਵਰਸਿਟੀ ਦੇ ਦੂਜੇ ਵਿਭਾਗਾਂ ਨੂੰ ਵੀ ਇਸ ਤੋਂ ਪ੍ਰੇਰਣਾ ਲੈ ਕੇ ਆਪਣੇ ਖੇਤਰ ਵਿਚ ਸਥਾਪਤ ਲੋਕਾਂ ਨੂੰ ਵਿਦਿਆਰਥੀਆਂ ਦੇ ਰੂ-ਬ-ਰੂ ਕਰਵਾਉਣਾ ਚਾਹੀਦਾ ਹੈ ਤਾਂ ਕਿ ਵਿਦਿਆਰਥੀਆਂ ਨੂੰ ਉਤਸ਼ਾਹਿਤ ਕੀਤਾ ਜਾ ਸਕੇ।

-----

ਅੰਤ ਵਿਚ ਡਾ. ਅਮਰਜੀਤ ਸਿੰਘ ਕਾਂਗ ਨੇ ਆਏ ਸਾਰੇ ਮਹਿਮਾਨਾਂ ਦਾ ਸਮਾਗਮ ਨੂੰ ਸਫ਼ਲ ਬਣਾਉਣ ਲਈ ਧੰਨਵਾਦ ਕੀਤਾ। ਇਸ ਪ੍ਰੋਗਰਾਮ ਵਿਚ ਸਟੇਜ ਸਕੱਤਰ ਦੀ ਭੂਮਿਕਾ ਪੰਜਾਬੀ ਵਿਭਾਗ ਦੇ ਪ੍ਰੋਫ਼ੈਸਰ ਡਾ. ਕਰਮਜੀਤ ਸਿੰਘ ਨੇ ਨਿਭਾਈ। ਇਸ ਮੌਕੇ ਤੇ ਯੂਨੀਵਰਸਿਟੀ ਦੇ ਵਿਭਿੰਨ ਵਿਭਾਗਾਂ ਦੇ ਡੀਨ, ਚੇਅਰਮੈਨ, ਪ੍ਰੋਫ਼ੈਸਰ, ਕਵੀ, ਸ਼ਾਇਰ ਅਤੇ ਵਿਭਿੰਨ ਵਿਭਾਗਾਂ ਦੇ ਵਿਦਿਆਰਥੀ ਵੀ ਹਾਜ਼ਿਰ ਸਨ।